ވެންޓިލޭޓަރުތަކުގެ މައްސަލާގައި ކުރީގެ ހެލްތް މިނިސްޓަރު އަބްދުﷲ އަމީން ގަސްތުގައި މަޖިލީހަށް އުޅުވާލައްވައިގެން މައުލޫމާތު ދެއްވިކަމަށް ނިންމައި، ރައްޔިތުންގެ މަޖިލީހުގެ އިމްތިޔާޒު އަދި ސުލޫކީ ކޮމެޓީން އެމައްސަލަ ނިންމުމަށްފަހު، ކޮމެޓީގެ ރިޕޯޓް މަޖިލީހުގެ ތަޅުމަށް ފޮނުވައިފި އެވެ.

ރައްޔިތުންގެ މަޖިލީހުން އާދިއްތަ ދުވަހުގެ ހަވީރު 16:30 ބޭއްވާ ޖަލްސާއަށް އެރިޕޯޓް ވަނީ އެޖެންޑާވެސް ކޮށްފަ އެވެ.

ކޮމެޓީ ރިޕޯޓްގައި ފާހަގަ ކޮށްފައިވާ ކަންކަމުގެ ތެރޭގައި، ވެންޓިލޭޓަރުތަކުގެ މައްސަލައާ ގުޅިގެން މައްޗަންގޮޅި ދެކުނު ދާއިރާގެ މެމްބަރު އަހުމަދު ހައިތަމް ލިޔުމުން ޖަވާބު ހޯއްދެވުމަށް އޭރު ހެލްތް މިނިސްޓަރުގެ މަގާމުގައި ހުންނެވި އަމީންއަށް ފޮނުއްވި ސުވާލުގެ ޖަވާބުގައި، އެމިނިސްޓްރީ 28 އޭޕްރީލް 2020 ގައި ސިޓީން ދެއްވާފައިވާ މައުލޫމާތާއި، 20 އޮކްޓޯބަރު 2020 ގައި އޮތް ކޮމެޓީގެ ބައްދަލުވުމުގައި އަމީން ދެއްވި މައުލޫމާތުތަކަށް ބަލާއިރު، އެއްވެސް ތަފާތެއް ހުރިކަމަށް ކޮމެޓީން މެމްބަރުންނަށް ފާހަގަ ކުރެވިފައިނުވާކަން ފާހަގަކޮށްފައި ވެއެވެ. ނަމަވެސް، 16 އޮގަސްޓް 2020 ގައި އޮޑިޓަރ ޖެނެރަލް ނެރުއްވި "ކޮވިޑް-19 އާގުޅޭ ޚަރަދުތަކުގެ ކޮމްޕްލަޔަންސް އޮޑިޓް ރިޕޯޓް" ގައި ބަޔާންކޮށްފައިވާ މައުލޫމާތުތަކަށް ބަލާއިރު، ކޮމެޓީން އަމީންއާ ކުރިމަތި ކުރިވި ސުވާލުތަކަށް ދެއްވާފައިވާ ޖަވާބު އޮޑިޓް ރިޕޯޓްގައި ބަޔާންކޮށްފައިވާ މައުލޫމާތުތަކާ ހިލާފުކަން ކޮމެޓީއަށް ފާހަގަ ކުރެވިފައިވާ ކަމަށެވެ.

މީގެއިތުރުން، ކޮމެޓީއަށް ހާޒިރުވެ، އަމީން ދެއްވި މައުލޫމާތުތަކަށް ބަލާއިރު، ވެންޓިލޭޓަރުތައް ހޯދުމުގައި ޑަބްލިޔުއެޗްއޯ އާ ހެލްތް މިނިސްޓްރީއާ ދެމެދު ރަސްމީކޮށް މުއާމަލާތް ކުރެވުނުކަން ފާހަގަކުރައްވައި، އެ މުއާމަލާތްކުރިކަމުގެ ހެއްކެއްގެ ގޮތުން އަމީން ކޮމެޓީއަށް ހުށަހެޅުއްވި އީމެއިލް ބެލިބެލުމުން، އެ އީމެއިލްއިން މުއާމަލާތްކޮށްފައިވަނީ ހެލްތް މިނިސްޓްރީގެ މުވައްޒަފަކާކަން ނުވަތަ މިނިސްޓްރީއާ ގުޅުންހުރި ފަރާތަކާކަން އެ ލިޔުމުން އެނގެން ނެތް ކަމަށެވެ. އަދި އެފަދަ ރަސްމީ ލިޔުމެއް އޮތްނަމަ ހުށަހެޅުމަށް އަމީންއަށް އިތުރު ފުރުސަތު ކޮމެޓީން ދެއްވި ކަމަށާއި ނަމަވެސް އިތުރު އެއްވެސް ލިޔުމެއް ހުށަހަޅާފައިނުވާ ކަމަށް ކޮމެޓީން ރިޕޯޓުގައި ބުނެފައި ވެއެވެ.

މިމައްސަލަ ނިންމުމުގައި ކޮމެޓީން ޑަބްލިޔުއެޗްއޯގެ ކަންޓްރީ އޮފީހުން ރަސްމީކޮށް، މައުލޫމާތު ހޯދުމުގެ ބަދަލުގައި މިމައްސަލަ ނިންމާފައިވަނީ، އޮޑިޓް އޮފީހުން ނެރެފައިވާ "ކޮވިޑް-19 އާގުޅޭ ޚަރަދުތަކުގެ ކޮމްޕްލަޔަންސް އޮޑިޓް ރިޕޯޓް" އަށް ރިޔާއަތް ކޮށެވެ.

ކޮވިޑް-19ގެ ބަލި މީހުންނަށް ފަރުވާދޭން ރާއްޖެއަށް ބޭނުންވާ ވެންޓިލޭޓަރުތައް ހޯދުމުގައި އަމީން ހެލްތް މިނިސްޓަރަކަށް ހުންނަވައި، ބޮޑެތި ޖަރީމާތަކެއް ހިންގިކަމުގެ ތުހުމަތުތަކެއް ވަނީ ކުރެވިފަ އެވެ.

ވެންޓިލޭޓަރު މައްސަލައިގައި އޭސީސީން ކުރި ތަހުގީގަށްފަހު ކުރީގެ ހެލްތު މިނިސްޓަރު އަބްދުﷲ އަމީންއާއެކު 11 ބޭފުޅެއްގެ މައްޗަށް ދައުވާކުރަން ޕީޖީގެ އޮފީހަށް ފޮނުވިއެވެ. އެހެންނަމަވެސް ޕީޖީން ނިންމާފައިވަނީ އެކަމުގައި ދައުވާ ކުރެވޭވަރަށް ހެކި ނެތްކަމަށެވެ. އޭސީސީން ދަނީ އެމައްސަލަ އަލުން ބަލަމުން ނެވެ. މި މައްސަލައާއި ގުޅިގެން ކުރިމަތިވީ ފިއްތުންތަކާއި ގުޅިގެން އަމީނު ވަނީ މިނިސްޓަރު ކަމުން އިސްތިއުފާ ދެއްވާފައެވެ.

އޮޑިޓް ރިޕޯޓުގައި ބުނެފައިވަނީ، ދުބާއީގެ އެގްޒެކިއުޓާރސް ޖެނެރަލް ޓްރޭޑިން އަކީ، ވެންޓިލޭޓަރު ގެންނަން ހަވާލު ކުރި ތިން ކުންފުނީގެ ތެރެއިން ސަރުކާރުން އެޑްވާންސްކޮށް ފައިސާ ދޫކުރި ހަމައެކަނި ކުންފުންޏެވެ. އެމީހުން ރާއްޖެއަށް ވެންޓިލޭޓަރެއް ފޯރުކޮށްދޭނެ އަގެއް ކަމަށް ބުނެފައިވަނީ، 32،500 ޑޮލަރަށެވެ. އެއީ އެހެން ކުންފުނިތަކުން ހުށަހެޅި އަގަށްވުރެ މާބޮޑުތަނުން ވެސް ބޮޑު އަގެއް ކަމަށް ވެއެވެ. އެ ކުންފުންޏަށް 75 ވެންޓިލޭޓަރު، 34 މިލިއަން ރުފިޔާއަށް ރާއްޖެއަށް ފޯރުކޮށްދިނުމަށް ހަވާލުކުރިއިރު، މިދިޔަ އޭޕްރީލް މަހުގެ ދެވަނަ ދުވަހު، ވެންޓިލޭޓަރުތައް ގެނައުމުގެ އެގްރީމަންޓްގައި ސޮއިކޮށްފައިވެއެވެ.

އޭޕްރީލް މަހުގެ ތެރޭގައި ދެ ފަހަރެއްގެ މަތިން އެޑްވާންސަށް 30.9 މިލިއަން ރުފިޔާ ވެސް ވަނީ ދައްކާފައެވެ. އެގްރީމަންޓްގައި 14 ދުވަހުގެ ތެރޭގައި ވެންޓިލޭޓަރުތައް ރާއްޖެ ގެނެވޭނެ ކަމަށް ބުނެފައިވާއިރު، މިހާތަނަށް ލިބިފައިވަނީ 10 މޮބައިލް ވެންޓިލޭޓަރެވެ. މިއީ ހެލްތް މިނިސްޓްރީއާއެކު ވެފައިވާ އެއްބަސްވުމުގެ ދަށުން ކުރިން ފޮނުވި ވެންޓިލޭޓަރުތަކުގެ ބަދަލުގައި ފޮނުވާފައިވާ ވެންޓިލޭޓަރު ތަކެކެވެ. ކުރިން ރާއްޖެ ފޮނުވާފައި ހުރީ ހެލްތް މިނިސްޓްރީން ހުށަހެޅި މިންގަނޑުތަކަށް ނުފެތޭ ވެންޓިލޭޓަރުތަކެކެވެ.