މާލީ ކަންކަމުގައި ގައުމުގެ މަސްލަހަތު ހިމާޔަތް ކުރާނަން - އޮޑިޓަރ ޖެނެރަލް
2 ޑިސެމްބަރު 2020 | ބުދަ 02:11ދައުލަތުގެ މުދަލަށް ފާރަވެރިވެ، ވެރިން ޒިންމާދާރު ކުރުވުމާއެކު އިސްރާފާއި ފަސާދަ މަދުކުރުމަށް މަސައްކަތް ކުރައްވާނެ ކަމަށް ވިދާޅުވި
އޮޑިޓަރ ޖެނެރަލް ހަސަން ޒިޔަތު
ދެފުށް ފެންނަ ނިޒާމެއް ދައުލަތުގައި ގާއިމް ކުރުމާއެކު މާލީ ކަންކަމުގައި ގައުމުގެ މަސްލަހަތު ހިމާޔަތް ކުރާނެ ކަމަށް އޮޑިޓަރ ޖެނެރަލް ހަސަން ޒިޔަތު ވިދާޅުވެއްޖެ އެވެ.
ޒިޔަތު މިހެން ވިދާޅުވީ އޮޑިޓަރ ޖެނެރަލްގެ އޮފީހުން 2021 ވަނަ އަހަރުން 2023 ވަނައަހަރަށް އެކުލަވާލާފައިވާ ސްޓެރެޓެޖިކް އެކްޝަން ޕްލޭން އިފްތިތާހު ކުރުމަށް ބޭއްވި ޖަސްލާގައި ވާހަކަ ދައްކަވަމުންނެވެ.
މީގެ އިތުރުން ޒިޔަތު ވިދާޅުވީ އެކުލަވާލައިފައިވާ ސްޓްރެޓެޖިކް އެކްޝަން ޕްލޭންގެ އެހީއާއެކު ދައުލަތުގެ މުދަލަށް ފާރަވެރިވެ، ވެރިން ޒިންމާދާރު ކުރުވުމާއެކު އިސްރާފާއި ފަސާދަ މަދުކުރުމަށް މަސައްކަތް ކުރައްވާނެ ކަމަށެވެ.
ޒިޔަތު ވިދާޅުވީ އޮޑިޓް އޮފީހަކީ އިތުބާރު ހުރި، އަދި ބޭނުންތެރި އޮފީހެއްގެ ގޮތުގައި ދެމި އޮތުމަށްވެސް މަސައްކަތް ކުރައްވާނެ ކަމަށެވެ. އަދި މީގެ ކުރިން އެކުލަވާލި ޕްލޭނާއި އެކު ގިނަ ކާމިޔާބު ތަކެއް ލިބިފައިވާކަމަށެވެ. އަދި އޮޑިޓް އޮފީހުގެ އިމްޕެކްޓް މަތިވެގެން ދިޔުމާއެކު އެ އޮފީހުގެ ރިޕޯޓުތައް ފާއިތުވި އަހަރުތަކުގެ ތެރޭގައި އިތުރުވެގެން ގޮސްފައިވާކަމަށްވެސް ޒިޔަތު ވިދާޅުވިއެވެ.
މީގެ އިތުރުން ޒިޔަތު ވިދާޅުވީ ފާއިތުވި އަހަރުތަކުގައި އޮޑިޓް އޮފީހުގެ ފެންވަރު ރަނގަޅުވެގެން ދިއަކަމަށާ ސަރުކާރާއި ރައްޔިތުންނަށް އެ އޮފީހުގެ ބޭނުންތެރިކަން ބޮޑު ކުރެވިގެން ދިއަކަމަށެވެ.
ޒިޔަތު ވިދާޅުވީ އެންމެ އުފާވާ އެއްކަމަކީ މަޖިލީހުން އެ އޮފީހުގެ އޮޑިޓްތަކަށް ދޭ ސަމާލުކަން އިތުރުވެގެން ދިއުންކަމަށެވެ. ހާއްސަގޮތެއްގައި ޒިޔަތު ވަނީ ރައްޔިތުންގެ މަޖިލީހުގެ މާލިއްޔަތު ކޮމިޓީއިން އެ އޮފީހުގެ އޮޑިޓްތަކަށް ދެމުންދާ ސަމާލުކަން ފާހަގަ ކުރައްވާފަ އެވެ.
އެގޮތުން މިއީ އޭގެ ސަބަބުން އޮޑިޓަރ ޖެނެރަލް އޮފީހުގެ މަސައްކަތްތައް ހަރުދަނާ ކުރުމަށް ލިބިގެންދާ ހިތްވަރެއް ކަމަށް ޒިޔަތު ވަނީ ވިދާޅުވެފަ އެވެ.
