ދީނީ ހަރުކަށި ފިކުރުގެ ބަޔަކު ރާވަމުން ދަނިކޮށް ހުއްޓުވި ޓެރަރިސްޓު ހަމަލާއާ ގުޅުންހުރި އިތުރު ދެ މީހަކު ހައްޔަރުކޮށްފައިވާ ކަމަށް ފުލުހުން ހާމަކޮށްފިއެވެ.
މި މައްސަލައިގައި ހައްޔަރުކޮށްފައި ވަނީ ދެ ދިވެހި ފިރިހެނުން ކަމަށާއި އެއީ އުމުރުން 28 އަހަރުގެ މީހަކާއި އުމުރުން 34 އަހަރުގެ މީހެކެވެ. މި މައްސަލައިގައި މީގެކުރިން ފުލުހުން ވަނީ ހަ މީހަކު ހައްޔަރުކޮށްފައެވެ.
ދީނީ ގޮތުން ހައްދުފަހަނައަޅާފައިވާ ބަޔަކު ރާވައިގެން ހިންގަން އުޅުނު ޓެރަރިޒަމްގެ އަމަލެއް ހުއްޓުވަން ފުލުހުން ކުރިއަށް ގެންދިޔަ އޮޕަރޭޝަނުގެ ތެރެއިން ހައްޔަރުކުރި މީހުން ހައްޔަރުކުރީ މާލެ އަތޮޅު ކަނޑުމަތިންނާއި ތ. ތިމަރަފުށިންނެވެ. މި މައްސަލައާ ބެހޭ އިތުރު މައުލޫމާތެއް މިހާތަނަށް ފުލުހުން ހާމަކޮށްފައެއް ނުވެއެވެ.
ރާއްޖޭގައި ދީނީ ހަރުކަށި ފިކުރުގެ މީހުންގެ އަދަދު އިތުރުވަމުން އަންނަ ކަމަށާއި، ބޭރުގެ ގައުމުތަކަށް ހަނގުރާމަތަކަށްދާ ދިވެހިންގެ އަދަދުތައް އިތުރުވަމުން އަންނަ ކަމަށް ކަމާ ބެހޭ އިދާރާތަކުން ވަނީ ހާމަކޮށްފައެވެ. އަދި މި މައްސަލަ ހައްލުކުރުމަށް ހޯމް މިނިސްޓްރީއާއި ފުލުހުން އަދި އެމްއެންޑީއެފްގެ ކައުންޓަރ ޓެރަރިޒަމް ސެންޓަރު ގުޅިގެން އަންނަނީ ހާއްސަ މަސައްކަތްތަކެއް ކުރަމުންނެވެ.
އެގޮތުން ރާއްޖެއިން ބޭރުގެ ހަނގުރާމަތުގައި ބައިވެރިވުމަށްފަހު އަނބުރާ އަންނަ މީހުން ރިހެބިލިޓޭޓް ކުރާނެ ސެންޓަރެއް ސަރުކާރުން ވަނީ ގާއިމުކޮށްފައެވެ. މިހާރުވެސް މި ސެންޓަރުގައި ބޭރުގެ ގައުމަކަށް ހަނގުރާމައަށް ދިޔަ މައްސަލައެއްގައި ހައްޔަރުކުރި މީހަކަށް އަންނަނީ އެ ސެންޓަރުގައި ފަރުވާދެމުންނެވެ.
