މިނިވަން ޗެމްޕިއަންޝިޕްގައި މިދިޔަ ހޮނިހިރު ދުވަހު ލ.މާމެންދޫ އާއި ލ.މުންޑޫ ބައްދަލުކުރި މެޗުގައި ދެޓީމުގެ ފަރާތުންވެސް ކުޅިވަރުގެ ރޫހާ ހިލާފު އަމަލުތައް ހިންގާފައިވާ ކަމަށް ބަލާ އެ ދެޓީމުވެސް ޖޫރިމާނާކޮށްފި އެވެ.

މިނިވަން ޗެމްޕިއަންޝިޕްގެ ޑިސިޕްލިނަރީ ކޮމެޓީ އިން މައްސަލަ ބެލުމަށްފަހު، ލ.މުންޑޫ ޓީމު 4،000 ރުފިޔާ އިން ޖޫރިމާނާކޮށްފައިވާއިރު، ލ.މާމެންދޫ ޓީމު 6،000 ރުފިޔާ އިން ވަނީ ޖޫރިމައިނާކޮށްފައެވެ.

ޑިސިޕްލިނަރީ ކޮމެޓީން ބުނީ ލ.މުންޑޫ އަދި ލ.މާމެންދޫ ޓީމު ބައްދަލުކުރި މެޗުގެ ފުރިހަމަވަގުތު ހަމަވެ ދެއްކި ދެ މިނެޓުގެ އިތުރުވަގުތުގައި މާމެންދޫ ޓީމުގެ އަހުމަދު ރައްޔާން އަދި މުންޑޫ ޓީމުގެ އަހުމަދު އައްސަދުގެ ފަރާތުން ކުޅިވަރުގެ ރޫހާ ހިލާފު ކަންތައްތަކެއް ފެނުނު ކަމަށް އެ ކޮމެޓީއަށް ފާހަނގަކުރެވިފައިވާ ކަމަށެވެ.

އެގޮތުން އެފްއޭއެމް ޑިސިޕްލިނަރީ ކޯޑުގެ 38،39 އަދި 40 ވަނަ މާއްދާގެ ދަށުން އަހުމަދު އައްސަދު އަދި މުހައްމަދު ރައްޔާން ހަތަރު މެޗަށް ސަސްޕެންޑުކޮށް ކޮންމެ ކުޅުންތެރިޔަކު 4،000 ރުފިޔާއިން ޖޫރިމާނާ ކުރަންވެސް ނިންމާފައިވާ ކަމަށް ޑިސިޕްލިނަރީ ކޮމެޓީން ބުނެއެވެ.

މީގެއިތުރުން މި މަހުގެ 17 ވަނަ ދުވަހު ލ. މާމެންދޫ އާއި ލ.މާބައިދޫ ބައްދަލުކުރި މެޗުގައި ލ.މާމެންދޫ ޓީމުގެ ފަރާތުން ފެނިފައިވާ ކުޅިވަރުގެ ރޫހާ ހިލާފު އަމަލްތަކުގެ މައްސަލަވެސް އެ ކޮމެޓީން ވަނީ ބަލާފައެވެ.

އެގޮތުން ޑިސިޕްލިނަރީ ކޮމެޓީން ބުނީ މާމެންދޫ ޓީމުގެ މުހައްމަދު ނައުފަލް އަށް މާބައިދޫ ޓީމުގެ ކުޅުންތެރިޔަކަށް ކުރި ނުރައްކާތެރި ފައުލްއަކާ ގުޅިގެން ދެޓީމުގެ ކުޅުންތެރިން ދެމެދުގައި ހަމަނުޖެހުން ހިނގައިދިޔަ ވަގުތެއްގައި މާމެންދޫ ޓީމުގެ އެސިސްޓެން މެނޭޖަރު އަލީ ޝިފާޒް ދަނޑުމައްޗަށް އަރާ މެޗުގައި ހަމަނުޖެހުން ހިންގިކަމަށް ބުނާ މައްސަލަވެސް ބަލާފައިވާ ކަމަށެވެ.

އެގޮތުން މި އަމަލުގެ ސަބަބުން މެޗުގެ ކުޅުން 10 މިނެޓަށް ހުއްޓަން ޖެހި، މެޗުގެ ހަމަނުޖެހުން އަލީ ޝިފާޒް ހިންގިކަން ޑިސިޕްލިނަރީ ކޮމެޓީއަށް ފާހަނގަކުރެވޭތީ އެފްއޭއެމްގެ ޑިސިޕްލިނަރީ ކޯޑުގެ 38 އަދި 38 ވަނަ މާއދާގެ ދަށުން އޭނާ ހަތަރު މެޗަށް ސަސްޕެންޑުކޮށް، 4،000 ރުފިޔާ އިން ޖޫރިމައިނާކުރުމަށް ނިންމާފައިވާކަމަށްވެސް ޑިސިޕްލިނަރީ ކޮމެޓީން ބުނެއެވެ.