މި މައްސަލަ މޯލްޑިވްސް ކޮލިފިކޭޝަން އޮތޯރިޓީންވެސް އަންނަނީ ބަލަމުން
ހަޔަރ އެޑިއުކޭޝަން މިނިސްޓަރ ޑރ. އިބްރާހިމް ހަސަން ރާއްޖެޓީވީގެ ފަލަސުރުހީ ޕްރޮގްރާމްގައި
ފައިސާ ދީގެން އެސައިންމެންޓް ހައްދާ މައްސަލަ މޯލްޑިވްސް ޕޮލިސް ސަރވިސް ގެ ސަމާލުކަަމަށް ގެނެސްފައިވާ ކަމަށް ހަޔަރ އެޑިއުކޭޝަން މިނިސްޓަރ ޑރ. އިބްރާހިމް ހަސަން ވިދާޅުވެއްޖެއެވެ.
އާދީއްތަ ދުވަހުގެ ފަލަސުރުހީ ޕްރޮގްރާމްގައި ވާހަކަދައްކަވަމުން މިނިސްޓަރ ވިދާޅުވީ ފުލުހުންނާއި އެކު މި މައްސަލަ އާއި މެދު މަޝްވަރާ ކުރުމަށް ތާވަލުކުރެވިފައިވާ ކަމަށެވެ.
އަދި މި މައްސަލަ މޯލްޑިވްސް ކޮލިފިކޭޝަން އޮތޯރިޓީންވެސް ބަލަމުން އަންނަ ކަން ވެސް މިނިސްޓަރ ފާހަގަކުރެއްވިއެވެ. އެއީ ފެންވަރު ކަށަވަރުކުރުމަށް ބަލަން ޖެހޭ މައްސަލައެއް ކަން ފާހަގަކުރައްވާ މިނިސްޓަރ ވިދާޅުވީ ކޮލެޖުތަކާއި އެކު ވެސް މި މަޝްވަރާތައް ކުރެވޭނެ ކަމަށެވެ.
މިނިސްޓަރ ވިދާޅުވީ މިހާރު މަޖިލީހުގައި ވާ މަތީ ތައުލީމުގެ ބިލު ގާނޫނަކަށް ވުމުން މައްސަލައަށް ހައްލު އަންނާނެ ކަމަށް ބެލެވޭނެ ކަމަށެވެ. އެ ގާނޫނުގެ ދަށުން 'އެކެޑެމިކް ޕޭޖަރިޒަމް' އަކީ ކުށެއްގެ ގޮތުގައި ކަނޑައެޅުމަށް މިނިސްޓްރީގެ ފަރާތުން ހުށައަޅާފައިވާކަންވެސް ފާހަގަކުރެއްވިއެވެ.
ފައިސާ އަށް އެސައިންމެންޓް ހައްދާ މައްސަލައަކީ ވަރަށް ގިނައިން ފެންމަތިވާ މައްސަލައެކެވެ. އެގޮތުން ފަރސްޓް ލޭޑީ ފަޒްނާ އަހުމަދު ވެސް ވަނީ މި ކަންބޮޑުވުން ފާޅުކުރައްވާފައެވެ.
