މިއީ ވަކި ބައެއްގެ ވެރިކަމެއް ނޫން، އަމާނާތަށް ހިޔާނާތްތެރި ނުވޭ: މަލީހު
ރައްޔިތުން ހަވާލުކުރި އަމާނާތަށް ސަރުކާރުން ހިޔާނާތްތެރި ނުވޭ
\"ވޯލްޑް ޕްރެސް ފްރީޑޮމް ޑޭ\" ގައި މިނިސްޓަރު މަލީހު ބައިވެރިވެވަޑައިގަންނަވަނީ
ފުޅާ ކޯލިޝަނަކުން އައި ވެރިކަމެއް ވަކި ބައެއްގެ އެއްޗަކަށް ހެދުމަށް ކުރެވޭ މަސައްކަތަކީ ވަރަށް ދެރަކަމެއް ކަމަށް ވިދާޅުވެ، ރައްޔިތުން ހަވާލުކުރި އަމާނާތަށް ސަރުކާރުން ހިޔާނާތްތެރި ނުވުމަށް މިނިސްޓަރ އޮފް ކޮމިއުނިކޭޝަން، ސައެންސް އެންޑް ޓެކްނޮލޮޖީ މުހައްމަދު މަލީހު ޖަމާލު އެމްޑީޕީގެ ޕާލިމެންޓްރީ ގްރޫޕަށް ގޮވާލައްވައިފި އެވެ.
މަލީހުގެ އިތުބާރު ނެތްކަމަށް އެމްޑީޕީގެ ޕާލިމެންޓްރީ ގްރޫޕުން ނިންމައި ރައީސް އިބްރާހީމް މުހައްމަދު ޞާލިހަށް ދެންނެވުމަށް އާދިއްތަ ދުވަހު އެމްޑީޕީގެ ޕީޖީން، ނިންމި ނިންމުމާއި ގުޅިގެން ރާއްޖެޓީވީއަށް ދެއްވި އިންޓަވިއުއެއްގައި މަލީހު ވިދާޅުވީ، ވަކި ފަރާތަކަށް ނުޖެހި ކަމުގެ ހަގީގަތަށް ބުރަވެ އެއްޗެއް ވިދާޅުވުމުން، އެކަމުގައި އެމްޑީޕީގެ މަދު މެންބަރުން އަމަލު ކުރައްވަމުން ގެންދަވަނީ ވަރަށް ހުދުމުހުތާރުކޮށް ކަމަށެވެ.
މަލީހު ވިދާޅުވީ، މިއަދު ފެނިގެން މިދަނީ މި ސަރުކާރަކީ ވަކި ބައެއްގެ އެއްޗަކަށް ހަދައި، އެކި ވުޒާރާތަކުގައި ތިބި ކޯލިޝަންގެ އެކި މިނިސްޓަރުން މަގާމުން ދުރުކުރަމުންދާ މަންޒަރު ކަމަށެވެ. އަދި އެކަމުން ދައްކުވައިދެނީ މި ސަރުކާރުން ރައްޔިތުން ހަވާލުކުރި އަމާނާތާއި ހިޔާނަތްތެރިވުން ކަމަށް މަލީހު ވިދާޅުވިއެވެ.
މަލީހު ވިދާޅުވީ، މި ސަރުކާރު ވެރިކަމަށް އައީ ރައްޔިތުންނަށް ވަރަށް ބޮޑެތި ވައުދުތަކެއް ވެގެން ކަމަށާއި، އެމްޑީޕީއަށް މަޖިލީހުގެ ސުޕަރ މެޖޯރިޓީ ލިބުމުން މިހާތަނަށް އައިއިރުވެސް، ކޯލިޝަން ދެމެހެއްޓުމަށްޓަކައި ހަދަން ވައުދުވި ގާނޫނު ހެދިފައިނުވާ ކަމަށެވެ. އޭނާ އިތުރަށް ވިދާޅުވީ، ވަޒީފާއަށް ބިރު ދައްކައިގެން ފަހަތަށް ނުޖެއްސޭނެ ކަމަށާއި، އަދި ދޫ ބަންދުވެސް ނުކުރެވޭނެ ކަމަށެވެ.
މަލީހު ވިދާޅުވީ، ލިބިފައިވާ ނިއުމަތެއް އޭގެ އެންމެ ފުރިހަމަ ގޮތުގައި ހިފުމަކީ ހަމަ ކޮންމެ މީހަކު ކުރަން އަންގަވާފައި އޮންނަ އެންމެ ރަނގަޅު ގޮތް ކަމަށާއި ނަމަވެސް ލިބިފައިވާ ނިއުމަތަށް ޝުކުރުވެރި ނުވުމަކީ ވަރަށް ބޮޑު ބަލިމަޑުކަމެއް ކަމަށެވެ.
މަލީހު ވަނީ ކެބިނެޓުގެ މިނިސްޓަރަކަށް ހިޔާލު ފާޅުކުރުމުގެ މިނިވަންކަމެއް ނެތްނަމަ، އެ މިނިވަންކަން ދެން އޮންނާނީ ކޮން ފަރާތަކަށްތޯ ސުވާލު އުފައްދަވާފައެވެ. އޭނާ ވިދާޅުވީ މިނިވަންކަމާއެކު ހިޔާލު ފާޅުކުރުމުން، އޭނާއާއި ދެކޮޅަށް އަޅުއްވާ ފިޔަވަޅުތަކުން ހައްލެއް ހޯދުމަށް ޔޫއެންގެ ސިސްޓަމްގެ ތެރެއިންނާއި، ހިއުމަން ރައިޓްސް ކޮމިޝަނުގެ އެހީތެރިކަން ހޯއްދަވާނެ ކަމަށެވެ.
