ރާއްޖެއިން އެސްޓްރޮނޯޓުންނަށް ވާން ބޭނުންވާ ކުދިންނަށް ފުރުސަތު ހުޅުވާލައިފި

ރާއްޖެއިން އެސްޓްރޮނޯޓުންނަށް ވާން ބޭނުންވާ ކުދިންނަށް އިންސްޓިޓިއުޓް އޮފް ގްލޯބަލް ސަކްސެސް (އައިޖީއެސް) އިން ފުރުސަތު ހުޅުވާލައި ހާއްސަ ޕްރޮގްރާމެއް ކުރިއަށް ގެންދިއުމަށް ނިންމައިފިއެވެ.

ކެނޭޑިއަން ސްޕޭސް އޭޖެންސީ އާއި އައިޖީއެސް ގުޅިގެން ހިންގާ މި ޕްރޮގްރާމަކީ ރާއްޖޭގައި ގްރޭޑް 7، 8 އަދި 9 ގެ ގްރޭޑް ތަކުގައި ސައިންސްގެ ދާއިރާއިން ކިޔަވަމުންދާ ދަރިވަރުންނަށް އަމާޒު ކޮށްގެން ކުރިއަށް ގެންދިއުމަށް ނިންމާފައިވާ ޕްރޮގްރާމެކެވެ.

އައިޖީއެސް އިން ވަނީ ސްޕޭސް ޕްރޮގްރާމުގެ ރިސާޗް ޕްރޮޖެކްޓެއް ވެސް ޔުނިވާސިޓީ ދަރިވަރުންނަށް ހާއްސަކޮށް މަހުގެ 15 ވަނަ ދުވަހު ލޯންޗު ކޮށްފައެވެ.

މި ޕްރޮގްރާމް ލޯންޗު ކުރުމަށް ޒުވާނުންގެ މަރުކަޒުގެ ސެމިނާ ރޫމުގައި ހޮނިހިރު ދުވަހު ބޭއްވި ބައްދަލުވުމެއްގައި، އައިޖީއެސްގެ ޗެއާމަން ރިފްއަތު މުހައްމަދު ވިދާޅުވީ، އައިޖީއެސް އިން ކުރިއަށް ގެންދިއުމަށް ނިންމާފައިވާ ޕްރޮގްރާމުން އެސްޓްރޮނޯޓަކަށް ވުމާއި، ސްޕޭސް އާއި ސައިންސްގެ ދާއިރާއިން ކުރިއަށްދާން ބޭނުންވާ ކުދިންނަށް ފަހި ފުރުސަތުތަކެއް ހުޅުވާލާފައިވާ ކަމަށެވެ.

ރިފްއަތު ވިދާޅުވީ މި ޕްރޮގްރާމުގައި ބައިވެރިވާ ކުދިންނަށް އެމެރިކާގައި ހުންނަ ޖައްވީ އިދާރާ ނާސާގައި ދެވޭ އިތުރު ތަމްރީނުތަކުގައި ބައިވެރިވުމުގެ ފުރުސަތު ލިބިގެންދާއިރު، ކެނޭޑިއަން ސްޕޭސް އޭޖެންސީގެ ސެޓްފިކެޓް ވެސް ލިބޭނެ ކަމަށެވެ.

ރިފްއަތު ވިދާޅުވާ ގޮތުގައި، މި ދާއިރާއިން ކުރިއަށް ދާން ބޭނުންވާ ކުދިންނަށް ޕްރޮގްރާމުގައި ބައިވެރިވުމުން އަމަލީ ގޮތުން މިކަހަލަ ކަމެއް ހިނގަމުންދާ ގޮތާއި، ކަމާއި ގުޅުންހުރި ގިނަ މައުލޫމާތުތަކެއް ފޯރުކޮށްދެވޭނެއެވެ. ހަމައެއާއެކު ޖައްވީ އުޅަނދެއްގައި ކަންކަން ހުންނަ ގޮތް އަމިއްލައަށް ތަޖުރިބާ ކުރުމާއި، ނާސާގައި އަމަލީ ގޮތުން މަސައްކަތް ކުރުމުގެ ފުރުސަތު ލިބިގެންދާނެ ކަމަށެވެ.

އައިޖީއެސް އިން އިންތިޒާމު ކުރާ މި ޕްރޮގްރާމު ކުރިއަށް ދާނީ، ޑިސެމްބަރު މަހުގެ 6 އިން އަންނަ އަހަރުގެ ޖެނުއަރީ މަހުގެ 7 ވަނަ ދުވަހުގެ ނިޔަލަށެވެ. މި ޕްރޮގްރާމުގައި ބައިވެރިވެވޭނީ އައިޖީއެސްގެ ފޭސްބުކް މެދުވެރިކޮށެވެ.