ކ. މާލެ
|
21 ނޮވެންބަރ 2020 | ހޮނިހިރު 14:11
މާލެއަށް ބަޔަކު ލޯންޗަކުން ފައިބަން މަސައްކަތް ކުރާ މަންޒަރު
މާލެއަށް ބަޔަކު ލޯންޗަކުން ފައިބަން މަސައްކަތް ކުރާ މަންޒަރު
ޔޫސުފް ސޮފްވާން ރަޝީދު
ބަޖެޓު 2021
ޕީއެސްއައިޕީ ހޭދައިގެ 33.5 އިންސައްތަ ލަފާ ފުރުމުގެ ދަތިކަން ހައްލު ކުރުމަށް
 
އަލަށް ފަށާ މަޝްރޫއުތަކުގެ ތެރޭގައި އުތުރާއި ދެކުނުގެ އިންޓަރނޭޝަނަލް އެއަރޕޯޓުތައް ތަރައްގީ ކުރުން ހިމެނޭ
 
އޭގެ ތެރެއިން އެންމެ ބޮޑު އަދަދެއް ހޭދަކުރަނީ ވައިގެ ބަނދަރު ތަރައްގީ ކުރުމަށާއި، ބްރިޖް އެޅުމަށް އަދި ޕޯޓް އެޅުމަށް
 
ލަފާ ފުރުމުގެ ދަތިކަން ހައްލު ކުރުމަށް 2.78 ބިލިއަން ރުފިޔާ ބަޖެޓުގައި ހިމަނާފައިވޭ

އަންނަ އަހަރަށް ލަފާ ކުރާ ބަޖެޓުގައި، ލަފާ ފުރުމުގެ ދަތިކަން ހައްލު ކުރުމަށް 2.78 ބިލިއަން ރުފިޔާ ހޭދަ ކުރަން ހުށައަޅައިފިއެވެ.

ފިނޭންސް މިނިސްޓްރީގެ ބަޖެޓު ފޮތަށް ބަލާއިރު، ލަފާ ފުރުމުގެ ދަތިކަން ހައްލު ކުރުމަށް ކުރާ ހޭދައިގެ ބޮޑު ބައެއް ހަރަދު ކުރަން ނިންމާފައި ވަނީ ވައިގެ ބަނދަރުތަކަށެވެ. އެގޮތުން ވައިގެ ބަނދަރުތަކަށް 1.35 ބިލިއަން ރުފިޔާގެ ބަޖެޓެއް ހުށައަޅާފައިވާއިރު، އޭގެ ތެރެއިން 1.16 ބިލިއަން ރުފިޔާ ފައިނޭންސް ކުރަނީ ލޯނު އެހީގައެވެ. އަދި ދައުލަތުގެ ޑޮމެސްޓިކް ބަޖެޓުން 131 މިލިއަން ރުފިޔާ ހޭދަ ކުރުމަށް ހުށައަޅާފައިވާއިރު، ބާކީ 50 މިލިއަން ރުފިޔާ އެއީ ހިލޭ އެހީއިން ކުރާ ހޭދައެވެ.

ވައިގެ ބަނދަރުތަކަށް ކުރާ ހޭދައިގެ ތެރެއިން ބޮޑު އިންސައްތައެއް ހޭދަ ކުރާނީ މިހާރު ވެސް ކުރިއަށްދާ ވެލާނާ އިންޓަރނޭޝަނަލް ތަރައްގީ ކުރުމުގެ މަޝްރޫއަށެވެ. މި މަޝްރޫއުއަށް ހިނގާ ހަރަދުތައް ފައިނޭންސް ކުރަމުން ދަނީ އެކުވެރި ގައުމުތަކުންނާއި އޯފިޑް އަދި ޗައިނާ އެގްޒިމް ބޭންކުން ލޯނު ނަގައިގެންނެވެ. މި މަޝްރޫއު ނިންމާލުމަށް އަމާޒު ހިފާފައި ވަނީ 2022 ވަނަ އަހަރަށެވެ.

އަންނަ އަހަރު ލަފާ ފުރުމުގެ ދާއިރާއިން އަލަށް ފަށާ މަސައްކަތްތަކުގެ ތެރޭގައި މާލޭގެ ޕޯޓް ގުޅީފަޅަށް ބަދަލުކުރުމުގެ މަޝްރޫއު، ގްރޭޓަރ މާލެ ކަނެކްޓިވިޓީ މަޝްރޫއު، ހަނިމާދޫ އިންޓަރނޭޝަނަލް އެއަރޕޯޓް އަދި ގަން އިންޓަރނޭޝަނަލް އެއަރޕޯޓް އަޕްގްރޭޑް ކުރުމުގެ މަޝްރޫއު، އަދި އުތުރުގެ ސަރަހައްދުގައި ހައި ސްޕީޑް ފެރީ ނިޒާމް ގާއިމް ކުރުމުގެ މަޝްރޫއު ފާހަގަކޮށްލެވެއެވެ.

ލަފާ ފުރުމުގެ ދަތިކަން ހައްލުކުރަން ހުށައަޅާފައިވާ ޕީއެސްއައިޕީ ބަޖެޓު

  • ބަނދަރު ހެދުން - 414 މިލިއަން ރުފިޔާ
  • ބްރިޖް އެޅުން - 469 މިލިއަން ރުފިޔާ
  • ވައިގެ ބަނދަރު - 1.35 ބިލިއަން ރުފިޔާ
  • ދަތުރުފަތުރު - 70 މިލިއަން ރުފިޔާ
  • ޕޯޓު ހެދުން - 476 މިލިއަން ރުފިޔާ

އޭގެ އިތުރުން ގިނަ ރަށްތަކެއް ބަނދަރު ހެދުމާއި، ފެރީ ޓަރމިނަލްތައް ހެދުމާއި، މިހާރު ވެސް ކުރިއަށްދާ އެއަރޕޯޓް ތަރައްގީ ކުރުމުގެ މަޝްރުއުގެ މަސައްކަތްތައް ނިންމުމަށް ޕީއެސްއައިޕީ ބަޖެޓުގައި ވަނީ ހިމަނާފައެވެ.

ރައީސް އިބްރާހިމް މުހައްމަދު ސޯލިހުގެ ޖަޒީރާ ދިރިއުޅުން ސިޔާސަތުގެ ދަށުން ދަތުރުފަތުރުގެ ނިޒާމަށް ދިމާވެފައިވާ މައްސަލަތައް ހައްލު ކުރުމަކީ މި ސަރުކާރުގެ ސްޓްރެޓެޖިކް އެކްޝަން ޕްލޭންގައި ވަރަށް ބޮޑު އަހައްމިއްޔަތު ކަމެއް ދީގެން ކުރަން ނިންމާފައިވާ މަސައްކަތެކެވެ.

0%
33%
0%
67%
0%
0%
ކޮމެންޓް
22 ނޮވެންބަރ 2020 | އާދީއްތަ 01:24
ސުލޯބެ
ޕީއެސްއައިޕީއަކީ މަރާމާތުކުރުން. ޕީއެސްއައިޕީއަކީ ބޮޑެތިބިޔަ ޕްރޮޖެކްޓެއްނޫން. ގިފިލީގެ ވަޅުދާނނި ދަނޑި ބިދިގެން އެބަދަލުކުރުމަކީ ޕްރޮޖެކްޓަކަށްކިޔާގެން ފަރުކެއްސޭކަށް މިއަދަކު ނެތް. ކިލާސްރޫމެއްގެ ފަންގިބަދަލުކުރުން، މިސްކިތެއް/ނަމާދުގެއެއްގެ ފުރާޅުޓިނުބަދަލުކުރުން، ހިނެވާގެއެއް އެޅުން އިންޖީނުގެ އެޅުން ނަރުދަމައާއި ފެންހޮޅި އެޅުންމީ ސަރުކާރެއް ނެތަސް އޮތަސް ކުރާންޖެހޭކަންކަން.