ފުލުހުންގެ އިންޓެލިޖެންސް ކަމަށް ބުނެ، ފޭރުނު މައްސަލާގައި އިތުރު ދެ މީހަކު ހައްޔަރު ކޮށްފައިވާ ކަމަށް ފުލުހުން ބުނެފި އެވެ. މިމައްސަލާގައި އެކުޖުމްލަ ތިން މީހަކު ވަނީ ހައްޔަރު ކޮށްފަ އެވެ.

ފުލުހުން ބުނީ، މިމަހުގެ 11 ވީ ބުދަ ދުވަހުގެ ހެނދުނު ވަގުތެއްގައި މާލެ މަޖީދީމަގު ފަރިވާ ސްޓޭއަށް ވަން ތިން މީހަކު ވަނީ ތިމަންނާމެންނަކީ ޕޮލިސް އިޓެލިޖެންސުގެ ބަޔެއް ކަމަށް ބުނެ އެތަނުގައި ތިބި ތިން މުވައްޒަފުންގެ ކްލިޕް އަޅުވާ ބަނދެފަ އެވެ. އަދި އެތަނުގެ ބައެއް ތަކެތި ފޭރިގަނެގެން ގޮސްފައިވެ އެވެ.

އެމައްސަލައާއި ގުޅިގެން ފުލުހުން ބުނީ ތުހުމަތު ކުރެވޭ މީހަކު ކޯޓު އަމުރެއްގެ ދަށުން މިމަހުގެ 12 ވަނަ ދުވަހުގެ ހެނދުނުގެ ވަގުތުގައި ހައްޔަރުކޮށްފައިވާ ކަމަށެވެ. އެއީ 42 އަހަރުގެ ދިވެހި ފިރިހެނެއް ކަމަށެވެ ފުލުހުން ބުންޏެވެ.

އޭނާގެ ބަންދާއި މެދު ގޮތެއް ނިންމުމަށް ކޯޓަށް ހާޒިރު ކުރުމުން މިނިސްޓްރީ އޮފް ހޯމް އެފެއަރޒް އިން ކަނޑައަޅާ ތަނެއްގައި ބަންދުގައި ބަހައްޓައިގެން ކުރިއަށް ގެންދިއުމަށް 15 ދުވަހުގެ މުއްދަތެއް ވަނީ ދީފައިވާ ކަމަށް ފުލުހުން ބުންޏެވެ.

މިމައްސަލައިގެ އިތުރު ތަފްސީލް ދެއްވަމުން ފުލުހުންގެ މީޑިއާ އޮފިޝަލް ބުދަ ދުވަހު ވިދާޅުވީ، މިމައްސަލާގައި އިތުރު ދެމީހަކު ހައްޔަރުކޮށްފައިވާ ކަމަށެވެ. އެގޮތުން މިމަހުގެ 16 ވަނަ ދުވަހު ޢުމުރުން 43 އަހަރުގެ ދިވެހި ފިރިހެނަކު ހައްޔަރުކޮށްފައިވާއިރު، މިމަހުގެ 15 ވަނަ ދުވަހު 38 އަހަރުގެ ދިވެހި ފިރިހެނަކު ހައްޔަރުކޮށްފައިވާ ކަމަށެވެ.

އަދި ތަހުގީގުގައި މިހާތަނަށް ކުރެވުނު މަސައްކަތުން ފޭރުނު ބައެއް ތަކެތި ހޯދާފައިވާ ކަމަށް ފުލުހުން ބުނެއެވެ.

މިމައްސަލާގައި ފުލުހުން އެންމެފަހުން ހައްޔަރުކުރި 2 މީހުންގެ ބަންދާމެދު ގޮތެއް ނިންމުމަށް ކޯޓަށް ޙާޒިރުކުރުމުން 15 ދުވަސް އެމީހުންގެ ބަންދަށް ވަނީ އިތުރުކޮށްފައެވެ.