ކޮވިޑުގެ 43 ވަނަ މަރު: 79 އަހަރުގެ ދިވެހި ފިރިހެނެއް

ރާއްޖެއިން ކޮވިޑް-19 އަށް ފަރުވާ ހޯދަމުން ދިޔަ އިތުރު މީހަކު ނިޔާވެއްޖެއެވެ.

ހެލްތް ޕްރޮޓެކްޝަން އޭޖެންސީ (އެޗްޕީއޭ) އިން ހާމަ ކޮށްފައިވާ ގޮތުގައި ހޮނިހިރު ދުވަހުގެ ހެނދުނު 10:50 ގައި ނިޔާވީ އުމުރުން 79 އަހަރުގެ ދިވެހި ފިރިހެނެކެވެ. އޭނާއަށް ފަރުވާދެމުން ދިޔައީ ހުޅުމާލޭ މެޑިކަލް ފެސިލިޓީގެ އައިސީޔޫގައެވެ.

އެއާއެކު ރާއްޖެއިން ކޮވިޑް ޖެހިގެން މަރުވި މީހުންގެ ޖުމުލަ އަދަދު ވަނީ 43 އަށް އަރާފައެވެ. މިއީ މި މަސް ތެރޭގައި ރާއްޖެއިން މި ބަލީގައި ނިޔާވި ފަސްވަނަ މީހާއެވެ. މި ބަލީގައި މިހާތަނަށް 35 ދިވެހިންނާއި 8 ބިދޭސީއަކު ވަނީ ދުނިޔެ ދޫކޮށްފައެވެ.

ކޮވިޑް-19 ގެ އެހެނިހެން ތަފާސް ހިސާބުތަކަށް ބަލާއިރު ހޮނިހިރު ދުވަހު މި ބައްޔަށް ޕޮޒިޓިވްވި މީހުންގެ އަދަދު 42 އަށް އަރާފައިވާއިރު، މި ވަގުތު އެކްޓިވް ކޭސްގެ އަދަދު ވަނީ 843 އަށް އިތުރުވެފައެވެ. އޭގެ ތެރެއިން 49 މީހަކަށް ހޮސްޕިޓަލުގައި އެޑްމިޓްކޮށްގެން ފަރުވާދެމުން އަންނައިރު، އައިސޮލޭޝަން ފެސިލިޓީތަކުގައި ތިބީ 246 މީހެކެވެ.