ދެވަނަ ފަހަރަށް އޮސްޓްރިއާ ލޮކްޑައުންކޮށްފި

ރިކޯޑް އަދަދަކަށް ކޮވިޑް-19 ގެ ކޭސްތަކެއް އިތުރުވުމާ ގުޅިގެން ދެވަނަ ފަހަރަށް އޮސްޓްރިއާއިން ލޮކްޑައުންއަކަށް ހިނގައްޖެއެވެ.

ލޮކްޑައުން އިއުލާންކުރަމުން އެ ގައުމުގެ ޗާންސެލަރ ސަބެސްޓިއަން ކަރޒް ވަނީ ހުރިހާ ރައްޔިތުން ގޭގައި މަޑުކުރުމަށް އިރުޝާދު ދެއްވާފައެވެ. އަދި ގެއިން ބޭރުން މީހުންނާ ބައްދަލު ނުކުރުމަށް އެދިލެއްވިއެވެ.

ލޮކްޑައުންއާ ގުޅިގެން ސްކޫލްތައް ވަނީ ބަންދުކޮށްފައެވެ. އަދި ދަރިވަރުންގެ ކިޔެވުން ކުރިއަށް ގެންދާނީ އޮންލައިންކޮށް ކަމަށް ވަނީ ނިންމާފައެވެ. އަދި ގޭގައި ތިބެގެން މަސައްކަތް ކުރެވޭނަމަ އެގޮތަށް މަސައްކަތް ކުރަން ފުރުސަތު ދިނުމަށް ވިޔަފާރިތަކަށާއި އޮފީސްތަކަށް ވަނީ އަންގާފައެވެ.

އޮސްޓްރިއާގެ ހެލްތް މިނިސްޓަރ ވިދާޅުވީ އެ ގައުމު ލޮކްޑައުން ކުރަން ނިންމީ އެއީ ކޮވިޑް ކޮންޓްރޯލް ކުރުމަށް އެޅޭނެ އެންމެ މުހިއްމު ފިޔަވަޅަކީ ކަމަށް ވާތީ ކަމަށެވެ. އަދި ކުރިން ވެސް އެ ގައުމުގެ ރައްޔިތުން ކާމިޔާބުކަމާއެކު ލޮކްޑައުންއެއް ނިންމާލިކަން ފާހަގަކުރައްވާ އޭނާ ވިދާޅުވީ، މިފަހަރުވެސް ރައްޔިތުންގެ އެއްބާރުލުން ލިބޭނެ ކަމަށް އުއްމީދު ކުރައްވާ ކަމަށެވެ.

މިހާތަނަށް އޮސްޓްރިއާއިން އެންމެ ގިނަ އަދަދަކަށް ކޮވިޑް-19 ޖެހިގެން ރިޕޯޓްކޮށްފައިވަނީ ހުކުރު ދުވަހުގައެވެ. އެ ދުވަހު 9,586 މީހުންނަށް ކޮވިޑް ޖެހުނު ކަމަށް ތަފާސްހިސާބުތަކުން ދައްކައެވެ.