ރައްޔިތުން ބޭނުންވީ ސަރުކާރު ޖަވާބުދާރީ ކުރެވޭނެ ގޮތެއް، އެކަން މިއަދު ދަނީ ކުރަމުން: ފައްޔާޒް
19 ވަނަ ރައްޔިތުންގެ މަޖިލީހަކީ އެމްޑީޕީގެ ސުޕަރ މެޖޯރިޓީ އޮތް މަޖިލީހެއް
ރައީސް ސޯލިޙުގެ ސަރުކާރަށް 2 އަހަރު ފުރުން ފާހާގަ ކުރުމަށް ރާއްޖެޓީވީން ގެނެސްދިން ޚާއްސަ ކަވަރޭޖަށް އިކޮނޮމިކް މިނިސްޓަރ އިންޓަރވިއު ދެއްވަނީ
ރައްޔިތުން ބޭނުންވީ ސަރުކާރު ޖަވާބުދާރީ ކުރެވޭނެ ގޮތެއް ކަމަށާއި، އެކަން މިއަދު ކުރަމުންދާތަން ފެންނަމުންދާކަމަށް އިކޮނޮމިކް މިނިސްޓަރ ފައްޔާޒް އިސްމާއިލް ވިދާޅުވެއްޖެއެވެ.
ރައީސް ސޯލިޙުގެ ސަރުކާރަށް 2 އަހަރު ފުރުން ފާހާގަ ކުރުމަށް ރާއްޖެޓީވީން ގެނެސްދިން ޚާއްސަ ކަވަރޭޖަށް ދެއްވި އިންޓަރވިއުއެއްގައި މިނިސްޓަރ ވިދާޅުވީ، ދިވެހި ރައްޔިތުން ބޭނުންވީ ދެފުއް ފެންނަ ގޮތަކަށް އަދި ކަންކަމުގައި ޖަވާބުދާރީ ކުރުވޭނެ ގޮތަކަށް ކަންކަން އޮތުމަށް ކަމަށެވެ. އެގޮތުން ސަރުކާރުގެ މައްޗަށް ވައްކަމުގެ ތުހުމަތެއް ކުރެވޭނަމަ އެވާހަކަ ދެއްކުމުގެ ފުރުސަތު މިއަދު ލިއްބައިދީފައިވާކަން ފާހަގަ ކުރައްވައި މިނިސްޓަރ ވިދާޅުވީ، މަޖިލީހުން ސަރުކާރު ޖަވާބުދާރީ ކުރުވުމަށް ކުރަންޖެހޭ ކަންކަންވެސް ކުރިއަށްދާ ކަމަށެވެ.
މިނިސްޓަރ ވިދާޅުވީ، މީގެ ކުރިން ނަމަ ސަރުކާރަށް އަމާޒުވާ އެފަދަ ވާހަކަތައް ދެއްކުމުގެ ފުރުސަތުވެސް ނުލިބޭ ކަމަށާއި، އަދި އެފަދަ ކަންކަމަށް ފިޔަވަޅުވެސް އަޅާތަން ނުފެންނަ ކަމަށެވެ.
އޭގެ އިތުރުން، އިޤްތިސާދެއް ކުރިއަށް ގެންދިއުމަށްޓަކައި ޤާނޫނާ އެއްގޮތަށްކަން ކަންކަން ދާނެ ކަމުގެ ޔަޤީންކަމެއް ވިޔަފާރިވެރިންނަށްވެސް ބޭނުންވާކަން ފާހަގަ ކުރައްވައި މިނިސްޓަރ ވިދާޅުވީ، އެ ޔަޤީންކަން މިއަދު ރައްޔިތުންނަށް ލިބެމުންދާ ކަމަށެވެ. އަދި އެއީ މި ސަރުކާރުގެ މުހިއްމު ކާމިޔާބީއެއްގެ ގޮތުގައި މިނިސްޓަރ ސިފަ ކުރެއްވިއެވެ.
މިނިސްޓަރ ފައްޔާޒު އިސްމާއީލްގެ އިތުބާރު ނެތްކަމުގެ މައްސަލަ ރައްޔިތުންގެ މަޖިލީހަށް ވެއްދުމުގެ މަސައްކަތްވެސް އެމްޑީޕީގެ ބައެއް ޕާލިމެންޓް މެމްބަރުން ކުރައްވާފައިވެއެވެ. އެހެން ނަމަވެސް މިހާތަނަށް އެފަދަ މައްސަލައެއް މަޖިލީހަށް ހުށައަޅާފައެއް ނުވެއެވެ. އަދި މިނިސްޓަރ ފައްޔާޒުގެ އިތުބާރު ނެތް ކަމުގެ މައްސަލަ މަޖިލީހަށް ވެއްދުމަށް ކުރެވެމުންދާ މަސައްކަތް ހުއްޓާލުމަށް އެއްވެސް އިރަކު ރައީސް އިބްރާހިމް މުހައްމަދު ސޯލިހު އެންގެވިތޯ ކުރެވުނު ސުވާލަށް ޖަވާބުދެއްވަމުން މަޖިލީހުގެ ރައީސް، ރައީސް ނަޝީދު ވަނީ އެކަމަށް އިންކާރު ކުރައްވާފައެވެ.
19 ވަނަ ރައްޔިތުންގެ މަޖިލީހުން ދަނީ ސަރުކާރު ޖަވާބުދާރީ ކުރުވުމަށް މީގެ ކުރިން އެއްވެސް މަޖިލީހަކުން ކޮށްފައިނުވާ މިންވަރަށް ބާރު ސްޕީޑުގައި އެ މަސައްކަތް ކުރަމުންނެވެ. ޚާއްސަކޮށް ވެރިކަން ކުރާ މައި ޕާޓީ އެމްޑީޕީގެ މެޖޯރިޓީ އޮތް މަޖިލީހަކުން ސަރުކާރު ޖަވާބުދާރީ ކުރުވުމަށް މި ކުރާ މަސައްކަތަކީ 3 ބާރު ވަކިވެފައި އޮންނަ ނިޒާމެއް ޙަޤީޤީ މާނައިގައި ފެންނަމުންދާ ކަމުގެ ހެއްކެއް ކަމަށް ގިނަ ބަޔަކު ޤަބޫލު ކުރެއެވެ.
