އިސްލާމީ ޝަރީއަތާ ޚިލާފުވާ ގޮތަކަށް ހަނގުރާމައަކަށް ނުނިކުމެވޭނެ: ޚުތުބާ
13 ނޮވެމްބަރު 2020 | ހުކުރު 08:07ޙާކިމުގެ އިޒުނައަކާ ނުލައި ހަނގުރާމައަކަށް ނުނިކުމެވޭނެ
ހުކުރު ޚުތުބާގައި ވަނީ އިސްލާމީ ތާރީޚުގެ މިސާލުތަކުން މިސާލު ނެގުމަށް ހަނދާން ކޮށްދީފައި
އިސްލާމީ ޝަރީއަތާ ޚިލާފުވާ ގޮތަކަށް ހަނގުރާމައަކަށް ނުނިކުމެވޭނެ ކަމަށް މިއަދުގެ ހުކުރު ޚުތުބާގައި ބުނެފި އެވެ.
"ނަޞްރު ލިބޭނީ ﷲ ގެ ދީނަށް ނަޞްރު ދީގެން" މި މައުޟޫގެ މައްޗަށް ބިނާ ކޮށްފައިވާ ޚުތުބާގައި ބުނީ، ހަނގުރާމަ ކުރަން ނުކުންނަ ކޮންމެ މީހަކީ ﷲ ގެ ރުއްސެވުމާއި، ފާފަ ފުއްސެވުން ލިބިވަޑައިގެންފައިވާ މީހެއް ނޫންކަން ﷲ ގެ ވަޙީ ބަސްފުޅުން އެނގޭ ކަމަށެވެ. އަދި ހަނގުރާމައަށް ނުކުންނަން ޖެހޭނީ ކޮމާންޑަރުގެ އަމުރުވެރިކަމުގެ ދަށުން އެއް ޖަމާއަތެއްގެ ގޮތުގައިކަން ފާހަގަކޮށް ޚުތުބާގައި ބުނީ، އިސްލާމީ ޝަރިއަތާ ޚިލާފުވާ ފަދަ ގޮތަކަށް އަދި ޙާކިމުގެ އިޒުނައަކާ ނުލައި ހަނގުރާމައަކަށް ނުނިކުމެވޭނެ ކަމަށެވެ.
އޭގެ އިތުރުން، އިސްލާމީ އުއްމަތަށް ކުރިމަތިވެފައިވާ ބޮޑެތި ފިތުނަތައް ކުރިމަތިވެފައިވާ ސަބަބުތަކާ ގުޅޭގޮތުން ޚުތުބާގައި ބުނީ، މުސްލިމުން މުސްލިމުންނާ ހަނގުރާމަ ކުރުމާއި، މުސްލިމުން އެއްބަޔަކު އަނެއް ބަޔަކާ ދެކޮޅުވުމުގެ ގޮތުން ދުޝްމަނުންނަށް ވާގޮވެރި ވުމަކީ އެކަމަށް މަގުފަހިވާ ސަބަބުތަކެއް ކަމަށެވެ.
މުސްލިމުންނަށް ނަސްރު ހޯދޭނީ ސަބަބުތަކުގައި ހިފަހައްޓައިގެންކަން ފާހަގަކޮށް ޚުތުބާގައި އިތުރަށް ބުނީ، އެކަން ކުރެވޭނީ މުސްލިމުންނަށް މާތް ﷲ ނަސްރު ދެއްވާނެކަން ޤަބޫލުކޮށް އެކަމަށްޓަކައި ދުޢާކޮށް ވަކީލު ކޮށްގެން ކަމަށެވެ. އަދި އިބުނު ބަތޫތާގެ ދަތުރުނާމާގައި ދިވެހިންނަކީވެސް އެފަދައިން ދުޢާ ކުރާ ބައެއްގެ ގޮތުގައި ސިފަކޮށްފައިވާ ކަމަށް ޚުތުބާގައި ބުނެފައިވެ އެވެ. އެގޮތުން ދިވެހިންގެ ހަތިޔާރަކީ ދުޢާ ކަމަށާއި، ރަށްތައް ލޫޓުވަން އަންނަ މީހުން ބަލިކަށިވަނީ ކުރާ ދުޢާގެ ސަބަބުންކަން ދަތުރުނާމާއާ ޙަވާލާދީ ޚުތުބާގައި ފާހަގަކޮށްފައިވެ އެވެ.
އެހެން ނަމަވެސް ގިނަ ބަޔަކު މިއަދު އެ ހަތިޔާރުގެ މަތިން ހަނދާން ނައްތާލާފައިވާކަން ފާހަގަކޮށް ޚުތުބާގައި ބުނީ، ﷲ އަށް އިޙްލާސްތެރިވެ އެކަލާނގެ ހަޟްރަތަށް ކުއްތަން ވެވުނު ވަރަކަށް ދުޢާ އިޖާބާ ކުރެއްވުން އަވަސްވެގެންވާ ކަމަށެވެ.
އޭގެ އިތުރުން، އިސްލާމީ ތާރީޚަށް ބަލާއިރު، ކީރިތި ރަސޫލާގެ ސަޙާބީންނާއި، އިސްލާމީ ލަޝްކަރުތަކުގެ ކޮމާންޑަރުން ޢަމަލު ކުރައްވާފައިވަނީވެސް އެގޮތަށްކަން ފާހަގަކޮށް އެކަންކަމުން މިސާލު ނެގުމަށް މުސްލިމު އުއްމަތަށް ޚުތުބާގައި ގޮވާލާފައިވެ އެވެ.
