ޔުނިސެފްގެ އެހީގައި ހަތަރު ހާހަށް ވުރެ ގިނަ މުދައްރިސުންނަށް ޓްރެއިނިންގ ދީފިން: އެޑިއުކޭޝަން މިނިސްޓަރ
ބައެއް ސްކޫލްތަކުގެ ހުރިހާ މުދައްރިސުންނަށް ތަމްރީނު ދެވުން
އެޑިއުކޭޝަން މިނިސްޓަރ އައިޝަތު އަލީ
ޔުނިސެފްގެ އެހީގައި މިހާތަނަށް 4 ހާހަށް ވުރެ ގިނަ މުދައްރިސުންނަށް އޮންލައިން ޕްލެޓްފޯމްތަކަށް އަހުލުވެރިވުމުގެ ގޮތުން ޓްރެއިނިންގ ދީފައިވާކަމަށް އެޑިއުކޭޝަން މިނިސްޓަރ އައިޝަތު އަލީ ވިދާޅުވެއްޖެއެވެ.
ރާއްޖެޓީވީއަށް ދެއްވި އިންޓަރވިއުއެއްގައި މިނިސްޓަރ ވިދާޅުވީ ކޮވިޑް-19 ގެ މިހާލަތުގައި މެދު ނުކެނޑި އޮންލައިން ޕްލެޓްފޯމްތަކުގައި ދަރިވަރުންނަށް ކިޔަވައިދިނުމަށް ވަރަށް ގިނަ ގޮންޖެހުންތަކަކާ ކުރިމަތިވިކަމަށެވެ. މީގެއިތުރުން ދިމާވި އެންމެ ބޮޑު އެއް މައްސަލައަކީ ބައެއް ދަރިވަރުންގެ އިތުރުން ބައެއް މުދައްރިސުން ޕްލެޓްފޯމްތަކަށް އަހުލުވެރި ނުވުން ކަމަށް މިނިސްޓަރ ވިދާޅުވި އެވެ. އެގޮތުން މައްސަލަ ހައްލުކުރުމުގެ ގޮތުން ޔުނިސެފްގެ އެހީގައި މުދައްރިސުން ގޫގަލް ކްލާސްރޫމަށް އަހުލުވެރި ކުރުވުމުގެ ގޮތުން ޓްރެއިނިންގތަކެއް ދެވިގެން ދިޔަކަމަށާ ބައެއް ސްކޫލްތަކުގެ ހުރިހާ މުދައްރިސުންނަށް ވެސް މިގޮތަށް ތަމްރީނު ދެވިގެން ގޮސްފައިވާނެ ކަމަށް މިނިސްޓަރ ވިދާޅުވިއެވެ.
އެންމެ ފުރަތަމަ މިކަން ފެށިގެން ދިޔައިރާ އަޅާބަލާއިރު މިހާތަނަށް ނުހަނު ގިނަ ކުރިއެރުންތަކެއް ސްކޫލްތަކަށް ލިބިގެންދިޔަކަމަށް ވެސް އެޑިއުކޭޝަން މިނިސްޓަރ ވިދާޅުވިއެވެ.
ފާއިތުވި ދެއަހަރަށް ބަލާއިރު މިނިސްޓަރ ވިދާޅުވީ އެންމެ ބޮޑު ކާމިޔާބީއެއްގެ ގޮތުގައި ފާހަގަކޮށްލެވެނީ ނާސްތާ ޕްރޮގްރާމް ކަމަށެވެ. އަދި ކުރިއަށް އޮތް ދުވަސްތަކުގައި ކުރައްވަން ހުރި ބައެއް މަސައްކަތްތައް ވެސް މިނިސްޓަރ ވަނީ ހިއްސާ ކުރައްވާފައެވެ. އެގޮތުން ހާއްސަ އެހީއަށް ބޭނުންވާ ކުދިންނަށް އަމާޒުކޮށްގެން ރާއްޖޭގެ އެކި ކަންކޮޅުތަކުގައި 9 ހަބް ސްކޫލެއް ގާއިމް ކުރެއްވުމުގެ މަސައްކަތް ކުރިއަށް ދާކަމަށް ވަނީ ވިދާޅުވެފައެވެ.
މިނިސްޓަރ އިތުރަށް ވިދާޅުވީ ދަރިވަރުންގެ ލިޓްރަސީއާއި ނިއުމަރެސީ ރަނގަޅުކޮށް ތަރައްގީ ކުރުމަށް ޕްރޮގްރާމްތަކެއް ހިންގަމުން ދާކަމަށެވެ. އަދި 2021 ވަނަ އަހަރުގެ ދިރާސީ އާއަހަރު ފަސްކުރެވިގެން ދިޔައީ ވަރަށް ވެސް ގިނަ ސަބަބު ތަކެއްގެ ސަބަބުން ކަމަށް ވިދާޅުވެ މިނިސްޓަރ ވިދާޅުވީ އެހާ ގިނަ ދުވަހު ސްކޫލަށް ނުގޮސް ދަރިވަރުން ތިބުމުގެ ސަބަބުން ދަރިވަރުން ވަރަށް ގިނަ ކަންކަން ހަނދާން ނެތުމުގެ އިތުރަށް އޭގެ ސަބަބުން ފަހަތަށް ޖެހިގެން ދާކަމަށް ގަބޫލު ކުރެވޭކަމަށެވެ.
ދަރިވަރަކު ސްކޫލަށް އަންނަ މިންވަރު އިތުރުވެ ގިނަ ވާނަމަ އެކުއްޖަކަށް އިނގޭ މައުލޫމާތު އަދި ހުނަރު އިތުރުވެގެން ދާކަމަށް މިނިސްޓަރ ފާހަގަކުރެއްވިއެވެ. ކޮވިޑް ތެރޭގައި ކުދިންނަށް ކިޔަވައި ދެމުން ގެންދިޔައީ ކޮންޑެންސް ކަރިކިއުލަމްއަކަށް ކަމަށް މިނިސްޓަރ ވިދާޅުވިއެވެ. އެގޮތުން ދަރިވަރުންނަށް ކިޔަވައިދީފައިވަނީ ހަމަ އެކަނި އެކުދިންނަށް ކޮންމެހެން ބޭނުންވާ މިންވަރަށް އެކަނިކަަމަށް ވިދާޅުވެ މިނިސްޓަރ ވިދާޅުވީ ގެއްލުނު ބައި އަލުން ދަރިވަރުންނަށް ކިޔަވައިދިނުމަކީ މުހިއްމު ކަމެއް ކަމަށެވެ.
މިނިސްޓަރ އިތުރަށް ވިދާޅުވީ ވަރަށް ގިނަ ބަޔަކު މިބަދަލަކީ ދާއިމީ ބަދަލެއްތޯ އަހަމުން ގެންދާއިރު މިކަމުގެ މަޝްވަރާތައް ކުރެވެމުން ދާކަމަށެވެ. އަދި ގިނަ ފަރާތްތަކުން ދެކޭ ގޮތުގައި ކޮންމެ އަހަރަކުވެސް ދިރާސީ އާ އަހަރު، އަހަރުގެ މަދުތެރެއިން ފެށުމަކީ އެންމެ އެދެވޭ އަދި އެންމެ ރަނގަޅު ކަމެއްގެ ގޮތުގައި ދެކެމުން އަންނަ ކަމަށެވެ.
ފާއިތުވި ދެއަހަރުގެ މަސައްކަތްތަކާއި މެދު ހިންހަމަޖެހޭކަމަށް ވިދާޅުވަމުން މިނިސްޓަރ ވިދާޅުވީ ހާއްސަކޮށް 2020 ވަނަ އަހަރު ދިމާވި ގޮންޖެހުންތަކާއެކުވެސް ރަނގަޅު އަދި ކާމިޔާބު މަސައްކަތްތަކެއް ކުރެވިގެން ގޮސްފައިވާކަމަށެވެ.
