ވޭތިވެދިޔަ ދެ އަހަރު ކުރެވުނީ ޤާނޫނީ އޮނިގަނޑު ހަރުދަނާ ކުރުމުގެ މަސައްކަތް: މިނިސްޓަރ ޔުމްނާ
10 ނޮވެމްބަރު 2020 | އަންގާރަ 20:18ސަޤާފީ ތަރިކަ ހިމާޔަތްކުރާ ޤާނޫނުނެއް ވަނީ ފާސްކޮށްފައި
މިނިސްޓަރ އޮފް އާޓްސް ކަލްޗަރ އެންޑް ހެރިޓޭޖް ޔުމްނާ މައުމޫން
ޤާނޫނީ އޮނިގަނޑު ހަރުދަނާ ކުރުމާއި ސިޔާސަތުތައް އެކުލަވާލުމުގެ މަސައްކަތް ވޭތިވެދިޔަ ދެއަހަރުތެރޭގައި ކުރެވިފައިވާކަމަށް މިނިސްޓަރ އޮފް އާޓްސް ކަލްޗަރ އެންޑް ހެރިޓޭޖް ޔުމްނާ މައުމޫން ވިދާޅުވެއްޖެ އެވެ.
ރައީސް އިބްރާހިމް މުހައްމަދު ސާލިޙުގެ ސަރުކާރަށް ދެ އަހަރު ފުރުމާއި ގުޅިގެން ހެރިޓޭޖް މިނިސްޓްރީން ފާއިތުވި ދެ އަހަރު ކުރެވުނު މަސައްކަތްތަކާއި ގުޅޭގޮތުން ރާއްޖެޓީވީން ގެނެސްދޭ ޚާއްސަ ކަވަރޭޖަށް މައުލޫމާތުދެއްވަމުން ޔުމްނާ ވިދާޅުވީ މި ދާއިރާގެ ޤާނޫނީ އޮނިގަނޑު ހަރުދަނާ ކުރުމަށްޓަކައި ވަރަށް ބޮޑު އިސްކަމެއް ދީގެން މަސައްކަތް ކުރަމުންދާ ކަމަށެވެ. އެގޮތުން ތަރިކައިގެ ދާއިރާއިން ވެސް ސަޤާފީ ތަރިކަ ހިމާޔަތްކުރާ ޤާނޫނު މަޖިލީހުން ފާސްކުރައްވާ ރައީސް ވަނީ ތަސްދީގު ކުރައްވާފައި އަދި އެއާއި ގުޅޭ ޤަވާއިދުތައް މާރޗް މަހުގެ ކުރީކޮޅު ވަނީ ގެޒެޓް ކުރެވިފައިވާކަން ފާހަގަ ކުރައްވާ މިނިސްޓަރ ވިދާޅުވީ އެއާއި ގުޅޭ އުސޫލުތައް މިހާރު ތައްޔާރު ކުރެވެމުންދާ ކަމަށެވެ.
އޭގެ އިތުރަށް ދަރަޖަ ކުރުމާއި ގިންތި ކުރުމުގެ ޤާނޫނުގެ ފުރަތަމަ ޑްރާފްޓް ދާދިފަހުން އޭޖީ އޮފީހަށް ފޮނުވާފައިވާނެ ކަމަށް މިނިސްޓަރ ވިދާޅުވި އެވެ.
މިނިސްޓަރ ވިދާޅުވީ ފުރަތަމަ ޑްރާފްޓް ފޮނުވާފައިވީ ނަމަވެސް އާޓްސް ޖަމުއިއްޔާތަކާއި، އެކިއެކި ޖަމުއިއްޔާ ޖަމާއަތްތަކާއި، ފަންނާނުންގެ ޚިޔާލުތައް އަދިވެސް ހޯދަމުންދާ ކަމަށެވެ. އަދި އޭޖީ އޮފީހުންނާއި މަޖިލީހުން ވެސް މި މަސައްކަތް އަދި ކުރިއަށް ގެންދާނެ ކަމަށް މިނިސްޓަރ ވިދާޅުވިއެވެ.
އޭގެ އިތުރަށް ލައިބްރަރީ ޤާނޫނެއްގެ މަސައްކަތްވެސް ކުރެވެމުންދާ ކަމަށާއި ޤައުމީ ކުތުބުޚާނާއާއި މިނިސްޓްރީ އާއި ގުޅިގެން ފުރަތަމަ ޑްރާފްޓް ތައްޔާރު ކުރުމުގެ މަސައްކަތް ފަށާފައިވާ ކަމަށެވެ.
މިނިސްޓަރ ވިދާޅުވީ ޤައުމީ އަރުޝީފްގެ ޤާނޫނަކީ ކުރިން އެކުލަވާލެވިފައި އޮތް ޤާނޫނެއް ނަމަވެސް މިޒަމާނާއިގުޅޭގޮތަށް ރިވިއުކޮށް އިސްލާހު ކުރުމުގެ މަރުހަލާތަކެއް ކުރިއަށްގެންދާ ކަން މިނިސްޓަރ ފާހަގަ ކުރެއްވިއެވެ.
