ފުޓްބޯޅަ ސްކޫލުގެ ކަރިކިއުލަމް ތައްޔާރުކުރަނީ

ގައުމީ ފުޓްބޯޅަ ސްކޫލުގައި ކުޅުންތެރިންނަށް ކިޔަވައިދޭ ކަރިކިއުލަމް ތައްޔާރުކުރުމުގެ މަސައްކަތް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އާއި ތަޢުލީމާ ބެހޭ ވުޒާރާ ގުޅިގެން ފަށައިފިއެވެ.

ސަރުކާރުން ޚަރަދުކޮށްގެން ހެދުމަށް ހަމަޖެހިފައިވާ ގައުމީ ފުޓްބޯޅަ ސްކޫލް ހަދަމުން އަންނަނީ ހުޅުމާލޭގައެވެ. މި މަޝްރޫއަށް ދައުލަތުގެ ބަޖެޓުން ޚަރަދުކުރާއިރު، ސްކޫލުގެ މަސައްކަތް ފެށީ 2018 ވަނަ އަހަރުގެ ޖުލައި މަހުގެ ކުރީކޮޅެވެ. ފުޓްބޯޅަ ސްކޫލުގެ އިމާރާތުގެ މަސައްކަތް ނިމިފައިވާއިރު، ޓާފް ދަނޑާއި އެހެނިހެން ބައެއް މަސައްކަތްތައް ވަރަށް އަވަހަށް ފަށާނެ ކަމަށް އެފްއޭއެމުން މައުލޫމާތުދެއެވެ. މި ސްކޫލުގެ އިމާރާތް މި ވަގުތު ބޭނުންކުރަމުން އަންނަނީ ކުޅިވަރާ ބެހޭ ވުޒާރާ މެދުވެރިކޮށް ކޮވިޑް-19 އާ ގުޅިގެން ވަގުތީ ހިޔާއެއްގެ ގޮތުުގައެވެ. އެކަމަކު ފުޓްބޯޅަ ސްކޫލުގެ މަސައްކަތްތައް ފެށެންވާއިރަށް އިމާރާތް އެފްއޭއެމާ ހަވާލުކުރާނެ ކަމަށް ކުޅިވަރާ ބެހޭ ވުޒާރާއިން ވަނީ މައުލޫމާތުދީފައެވެ.

ފުޓްބޯޅަ ސުކޫލް ހުޅުވުމަށް ތައްޔާރުވަމުން އަންނާތީ، މި މަހުގެ އެއްވަނަ ދުވަހު އެފްއޭއެމުން ވަނީ ތަޢުލީމާ ބެހޭ ވަޒީރު ޑރ. އާއިޝަތު އަލީއާއެކު މަޝްވަރާކޮށްފައެވެ. ވީޑިއޯ ކޮންފަރެންސް މެދުވެރިކޮށް ބޭއްވި މި ބައްދަލުވުމުގައި އެފްއޭއެމްގެ ޖެނެރަލް ސެކްރެޓަރީ ހުސެއިން ޖަވާޒް (ޖަވާ) ގެ އިތުރުން އެފްއޭއެމާއި ތަޢުލީމާ ބެހޭ ވުޒާރާގެ ބައެއް އިސް އޮފިޝަލުންވެސް ބައިވެރިވެވަޑައިގެންނެވިއެވެ.

މައުލޫމާތު ލިބިފައިވާ ގޮތުގައި މި ބައްދަލުވުމުގައި މަޝްވަރާ ކޮށްފައިވަނީ އެފްއޭއެމުގެ ފުޓްބޯލް ސްކޫލް ޕްރޮގްރާމަށް ވަކިން ހާއްސަ ކަރިކިއުލަމެއް ތައްޔާރުކުރުމަށެވެ. އެގޮތުން އަވަސް މުސްތަގުބަލެއްގައި އެ ކަރިކިއުލަމް ފައިނަލް ވެގެންދާނެ ކަމަށް އެފްއޭއެމުން މައުލޫމާތުދެއެވެ.

ހުޅުމާލޭގެ ފުރަތަމަ ފިޔަވަހީގެ މަސައްކަތް ނިންމައި އަންނަ އަހަރު ސްކޫލް ހުޅުވުމަށް މަސައްކަތް ކުރަމުން އަންނައިރު، އެ ސްކޫލުގައި ހިމެނޭނީ އެކޮމެޑޭޝަން ބްލޮކަކާއި ޓާފް ދަނޑެއްގެ އިތުރުން އޮފީހެއް ކަމަށް އެފްއޭއެމުން މީގެ ކުރިން ވަނީ ބުނެފައެވެ.

އެފްއޭއެމުން މީގެ ކުރިން ބުނެފައިވަނީ ފުޓްބޯޅަ ސްކޫލް ހެދުމަށް ހަމަޖެހިފައިވަނީ ދުނިޔޭގެ މަޝްހޫރު އެކެޑަމީއަކާއި ގުޅިގެން ކަމަށެވެ. އަދި އެކެޑަމީ ކުރިއަށްދާނީ ފީފާ އާއި އޭއެފްސީގެ ގަވާއިދުތަކާއި އެއްގޮތަށް ކަމަށްވެސް ވަނީ ބުނެފައެވެ.

މި އެކެޑަމީއަށް ކުދިން ނެގުމަށް ހަމަޖެހިފައިވަނީ އެފްއޭއެމުގެ ޓެކްނިކަލް ސްޓާފުން އަތޮޅު ތެރެއަށް ގޮސްގެން ކަމަށާއި، އެކެޑަމީއަށް ފުރަތަމަ ނަގާނީ 13 އަހަރާއި 17 އަހަރާ ދެމެދުގެ ކުދިން ކަމަށް މައުލޫމާތު ލިބިފައިވެއެވެ. އަދި ކުދިން ނަގާއިރު ބޮޑަށް ބަލާނީ ފުޓްބޯޅައަށް މަޝްހޫރު ރަށްތަކަށް ކަމަށާއި، އެކެޑަމީއަށް ހޮވޭ ކުދިން އެކެޑަމީގައި ދިރިއުޅޭ ގޮތަށް ބަދަލުކޮށް، އެ ކުދިންގެ ކިޔެވުން ހަމަޖައްސައިދޭނެ ކަމަށްވެސް އެފްއޭއެމުން ވަނީ ބުނެފައެވެ.