އަންނަ އަހަރު ނިމޭއިރު ދަރަނި ގެރެންޓީ ހިމަނައިގެން 82.8 ބިލިއަން ރުފިޔާއަށް އަރާނެ، ދަރަނި މެނޭޖްކުރެވޭނެކަމުގެ އިތުބާރު އެބައޮތް!
9 ނޮވެމްބަރު 2020 | ހޯމަ 05:37މި ވަގުތު ދަރަނި މައްޗަށް ދިޔަ ނަމަވެސް، މެދުރާސްތާގައި ދަރަނި ކުޑަކުރެވޭނެ
ފިނޭންސް މިނިސްޓަރ މަޖިލީހަށް ބަޖެޓު ހުށަހެޅުން
2021 ވަނަ އަހަރު ނިމޭއިރު ރާއްޖޭގެ ދަރަނި ގެރެންޓީ ހިމަނައިގެން 82.8 ބިލިއަން ރުފިޔާއަށް އަރާނެކަމަށް ފިނޭންސް މިނިސްޓަރ އިބްރާހިމް އަމީރު ވިދާޅުވެއްޖެ އެވެ.
ހޯމަ ދުވަހުގެ 20121 ވަނަ އަހަރަށް ލަފާކުރާ ދައުލަތުގެ ބަޖެޓުގެ ތަފްސީލް ދެއްވަމުން މިނިސްޓަރ ވަނީ، މި ވަގުތަކީ އިގްތިސާދީ ހަރަކާތްތައް ހުއްޓުނަނުދީ ހިފަހައްޓަންވީ ވަގުތުކަން ފާހަގަކުރައްވައި އިގްތިސާދުގައި އެންމެ މުހިއްމު ރޯލެއް ކުޅެވޭނީ ސަރުކާރަށް، ފިސްކަލް ޕޮލިސީގެ ތެރެއިންކަމަށް ވިދާޅުވެފަ އެވެ. އަދ، އިގްތިސާދީ ކުރިއެރުން އަވަސްކޮށް، މި އަޑިގަނޑުން އަރައިގަތުމަށް ކުރަންޖެހޭ ކޮންމެ ކަމެއް ސަރުކާރުން ކުރާނެކަމަށާއި ނަމަވެސް އިޤްތިސާދު މެނޭޖްކުރުމަށްޓަކައި މި ވަގުތު ދޭން އޮތް ފަރުވާގެ ސައިޑް އިފެކްޓަކީ ދަރަނި މައްޗަށް ދިއުންކަމަށެވެ.
މިގޮތުން 2021 ވަނަ އަހަރު ނިމޭއިރު ރާއްޖޭގެ ދަރަނި ގެރެންޓީ ހިމަނައިގެން 82.8 ބިލިއަން ރުފިޔާއަށް އަރާނެކަމަށް ލަފާކޮށް މިނިސްޓަރ ވަނީ މިއީ އުފެއްދުންތެރިކަމުގެ ނިސްބަތުން 124.8 އިންސައްތަކަމަށް ވިދާޅުވެފަ އެވެ.
އަދި، މި ވަގުތު ދަރަނި މައްޗަށް ދިޔަ ނަމަވެސް، މެދުރާސްތާގައި ދަރަނި ކުޑަކުރެވޭނެކަމަށާއި މެދުރާސްތާގައި ދަރަނި 'ސަސްޓެއިނަބަލް' މަގަށް ގެންނަން، ގައުމީ އުފެއްދުންތެރިކަން އިތުރުކުރަންޖެހޭކަމަށް މިނިސްޓަރގެ ވާހަކަފުޅުގައި ވަނީ ފާހަގަކުރައްވާފަ އެވެ.
ޖީޑީޕީ މިހާރު ދަށަށްދާ ދިޔުން ހުއްޓުމަކަށް ގެނެސް، 2021 ވަނައަހަރު 'ގްރޯތް ޕާތް' އަކަށް ދާންޖެހޭކަމަށާއި 2021 ވަނައަހަރު ބަޖެޓުގެ އަމާޒަކީ އެއީކަމަށް މިނިސްޓަރ ވަނީ ވިދާޅުވެފައެވެ. އަދި، ސަރުކާރުގެ އަމާޒަކީ ނޮމިނަލް ޖީ.ޑީ.ޕީ ކުރިއަރާ މިންވަރު ދަރަނި މައްޗަށް ދާ މިންވަރަށްވުރެ މަތީގައި ބެހެއްޓުންކަމަށް މިނިސްޓަރ ވިދާޅުވި އެވެ.
ނަމަވެސް ދުނިޔެއަށް ދިމާވެފައިވާ ކޮވިޑުގެ ހާލަތާއި ގުޅިގެން އަންދާޒާކުރި ގޮތާއި ޚިލާފަށް ޖީޑޕީ 29.3 އިންސައްތަ އިން ދަށްވެ, އާމްދަނީ ދަށްވުމާއި ގުޅިގެން އިތުރު ދަރަނި ނަގަންޖެހުމުން, އުފެއްދުންތެރިކަމުގެ ނިސްބަތުން ދަރަނީގެ މިންވަރު އިތުރުވެފައިވާކަމަށް މިނިސްޓަރ ވިދާޅުވި އެވެ. މިނިސްޓަރ އިތުރަށް ވިދާޅުވީ، ދަރަނި މެނޭޖްކޮށް ބެލެހެއްޓުމަށް ގިނަގުނަ މަސައްކަތްތަކެއް ކުރިއަށް އޮތް ގިނަ އަހަރުތަކުގައި ކުރަން ޖެހޭނެކަމަށާއި މިހާރުވެސް އެ މަސައްކަރް ކުރަމުން ދާކަމަށެވެ.
އަދި، މި މަސައްކަތް ތަކުގައި ސަރުކާރުން ތަޖުރިބާކާރުންގެ ލަފާއާއި އިރުޝާދު ބޭނުންކުރަމުން ދާކަން ފާހަގަކޮށް މިނިސްޓަރ ވަނީ މިކަމުގައި ރައްޔިތުންގެ މަޖިލީހުގެ ލަފާވެ ބޭނުންކުރާނެކަމަށް ވިދާޅުވެފަ އެވެ. ދަރަނީގެ ނިސްބަތް ދެމެހެއްޓެނިވި މަގަށް ގެނައުމަކީ ކުރަންޖެހޭ ކަމެއްކަން ފާހަގަކުރައްވައި މިނިސްޓަރ އިތުރަށް ވިދާޅުވީ، ދެމިހެއްޓެނިވި މަގަށް ގެނައުމަށް 'ފިސްކަލް ކޮންސޮލިޑޭޝަން' އަކީ މިވަގުތު ބުއްދިވެރިކަމެއް ނޫންކަމަށާއި ފިސްކަލް ކޮންސޮލިޑޭޝަންއަކަށް ދާންޖެހޭނީ ރިކަވަރީއަށް ފަހުގައިކަމަށެވެ.
މަޖިލީހުގައި އިތުރަށް ވާހަކަދައްކަވަމުން މިނިސްޓަރ އިތުރަށް ވިދާޅުވީ، ރާއްޖޭގެ ދަރަނި މައްޗަށް ދިއުމާއި އިޤްތިސާދީ ކުރިމަގާމެދު ހިރާސްތަކެއް ހުރިކަން އެއީ ދެބަސްވެވޭކަމެއް ނޫންކަމަށެވެ. ނަމަވެސް މިއީ ރާއްޖެއަށް އެކަނި ދިމާވި ކަމެއް ނޫންކަމަށެވެ. މިނިސްޓަރ އިތުރަށް ވިދާޅުވީ މިއީ ސިޔާސަތުގައި ހުރި ގޯހެއްވެސް ނޫންކަމަށެވެ.
ކޮވިޑް-19ގެ ކުރިން 2020 ވަނައަހަރު ފާސްކުރި ބަޖެޓްގައި މެދު ރާސްތާގައި އުފެއްދުންތެރިކަމުގެ ނިސްބަތުން ދަރަނި ކުޑަކުރުމުގެ ޕްލޭން ފާހަގަކޮށްފައިވާނެކަން ފާހަގަކޮށް މިނިސްޓަރ ވިދާޅުވީ ދަރަނި ރިކޯޑްކުރުމާއި އަދި ޓްރާންސްޕޭރަންސީގައި ފާހަގަކޮށްލެވޭ ކުރިއެރުންތައް މި ސަރުކާރުން ހޯދާފައިވާކަން ރާއްޖޭގެ އިގްތިސާދާ ބެހޭގޮތުން އެކި ފަރާތްތަކުން ނެރޭ ރިޕޯޓްތަކުގައި ފާހަގަކުރަމުންދާކަމަށެވެ. އަދި މިކަމުން، ސަރުކާރުގެ ސިޔާސަތުތައް ހުރީ ރަނގަޅު މަގުގައިކަން އެގިގެންދާކަމަށާއި ކޮވިޑް-19 އާ ގުޅިގެން އިޤްތިސާދު ނެގެހެއްޓުމަށް ކައުންޓަރސިކްލިކަލް ފިސްކަލް ސިޔާސަތެއް ގެންގުޅުމަކީވެސް އިޤްތިސާދަށް އެންމެ ފައިދާހުރި ގޮތްކަމަށެވެ.
މިނިސްޓަރ އިތުރަށް ވިދާޅުވީ ސަރުކާރުން ދަރަނި އަދާކުރާނެކަމަށާއި ދަރަނި އަދާކުރުމަށްޓަކައި ކުރަން ޖެހޭ ޕްލޭންތައް ވަނީ ކޮށް ދަރަނި މެނޭޖްކުރެވޭނެކަމުގެ އިތުބާރުވެސް އެބައޮތްކަމަށެވެ.
