ސިދުރަތުﷲގެ މަރު: ޕޯސްޓްމޯޓަމްއިން ދައްކަނީ މަރުވީ ގެނބިގެން ކަމަށް!
8 ނޮވެމްބަރު 2020 | އާދީއްތަ 18:32ލިބިފައިހުރި ޒަހަމްތަކަކީ މޫދުގައި ހަށިގަނޑު އޮތްއިރު ލިބިފައިހުރި ޒަހަމްތަކެއް
ސިދުރަތުﷲ ރަސްފަންނު މޫދާ ދިމާލަށް ދަނިކޮށް އާންމުކޮށްފައިވާ ވީޑިއޯއިން ނަގާފައިވާ ސްކްރީން ޝޮޓެއް
އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) އާއި ދިމާ ބޭރުން މޫދުގައި މަރުވެފައި އޮއްވާ ފެނުނު ގދ. ވާދޫ، ރިމެމްބަރކަދާވަޑު، އުމުރުން 31 އަހަރުގެ މުހައްމަދު ސިދުރަތުﷲ މަރުވީ ގެނބިގެން ކަމަށް ފުލުހުން ބުނެފިއެވެ.
ޕޯސްޓްމޯޓަމް ރިޕޯޓާ ހަވާލާދީ ފުލުހުން ބުނީ 23 އޮކްޓޫބަރު 2020 ވަނަ ދުވަހު ރަސްފަންނާ ދިމާލުގެ ކަނޑުއަޑީގައި މަރުވެފައި އޮއްވާ ފެނުނު ސިދުރަތުﷲ މަރުވި ސަބަބު ދެނެގަތުމަށް އިންޑިއާއަށް ހަށިގަނޑު ގެންގޮސްގެން ހެދި ޕޯސްޓްމޯޓަމްގެ ޕްރިލިމިނަރީ ރިޕޯޓުގައި ސިދުރަތުﷲ މަރުވެފައިވާ ސަބަބެއްކަމުގައި ފާހަގަކޮށްފައިވަނީ ގެނބިގެން ކަމަށެވެ.
ސިދުރަތުﷲގެ ހަށިގަނޑުގައި ހުރި ޒަހަމްތަކަކީ މޫދުގައި ހަށިގަނޑު އޮތްއިރު އެއްޗެއް ކައިފައިވުމުގެ ސަބަބުން ލިބިފައިހުރި ޒަހަމެއް ކަމަށް ބެލެވޭ ކަމަށް ޕޯސްޓްމޯޓަމް ހެދިފަރާތުން ފުލުހުންނަށް މައުލޫމާތު ދީފައިވާ ކަމަށެވެ.
މީގެ އިތުރުން މިމައްސަލައާ ގުޅިގެން މިހާތަނަށް ކުރެވުނު ބައެއް ތަހުލީލުތަކުން ސިދުރަތުﷲ މަސްތުވާތަކެއްޗަށް ޕޮޒިޓިވްވެފައިވާ ކަމަށް ފުލުހުން ބުނެއެވެ. އަދި ޕޯސްޓްމޯޓަމްއާ ގުޅިގެން ހަދާ އިތުރު ބައެއް ތަހުލީލުތައް ރާއްޖެއިން ބޭރުގައި ކުރިއަށްދާ ކަމަށް ވެސް ފުލުހުން ބުނެއެވެ.
ފުލުހުން ބުނީ މިހާދިސާއާ ގުޅިގެން ފުލުހުން އިތުރަށް ބަލަން ޖެހޭ ކަންކަން އަދިވެސް ބަލައި ތަހުގީގު ކުރިއަށްދާ ކަމަށެވެ.
