އިތުރު 24 މީހަކު ކޮވިޑަށް ޕޮޒިޓިވްވެ، 26 މީހަކު ބަލިން ރަނގަޅުވެއްޖެ
8 ނޮވެމްބަރު 2020 | އާދީއްތަ 18:3118 މީހަކު ޕޮޒިޓިވްވީ މާލެ ސަރަހައްދުން
ކޮވިޑް-19ށް ޓެސްޓު ކުރުމަށް މަގުމަތިން ސާމްޕަލް ނަގަނީ
ރާއްޖެއިން އިތުރު 24 މީހަކު ކޮވިޑަށް ޕޮޒިޓިވްވެ، 26 މީހަކު ބަލިން ރަނގަޅުވެއްޖެއެވެ.
ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ހޮނިހިރު ދުވަހުގެ އިރުއޮއްސި 6:00ން އާދިއްތަ ދުވަހުގެ އިރުއޮއްސި 6:00ށް 24 މީހަކު ޕޮޒިޓިވްވެފައިވާ ކަމަށެވެ. އޭގެ ތެރެއިން 18 މީހަކު ޕޮޒިޓިވްވެފައިވަނީ މާލެ ސަރަހައްދުންނެވެ. އަދި 6 މީހަކު ޕޮޒިޓިވްވެފައިވަނީ އަތޮޅުތެރެއިންނާއި ރިސޯޓުތަކުންނެވެ. އެއީ 18 ދިވެހިންނާއި، އެހެނިހެން ގައުމުތަކަށް ނިސްބަތްވާ 6 މީހުންނެވެ.
އެޗްޕީއޭއިން ބުނީ ފާއިތުވި 24 ގަޑައިރުގެ ތެރޭގައި 1392 ސާމްޕަލެއް ޓެސްޓުކޮށްފައިވާ ކަމަށެވެ.
މިވަގުތު 847 އެކްޓިވް ކޭސް ހިމެނޭއިރު، 226 މީހަކު އައިސޮލޭޝަން ފެސިލިޓީގައި އެބަތިއްބެވެ. އަދި 60 މީހަކަށް ހޮސްޕިޓަލުގައި ދަނީ ފަރުވާ ދެމުންނެވެ.
މާލެސިޓީގެ އިތުރުން އަތޮޅުތެރޭގެ ރަށްތަކުން ވެސް ވަނީ ކޮވިޑްގެ ކޭސްތައް ފެނިފައެވެ. އެގޮތުން މިހާތަނަށް 14 ރަށަކުން، 26 ރިސޯޓަކުން ވަނީ އެކްޓިވް ކޭސް ފެނިފައެވެ. އަދި މިހާތަނަށް 52 ފަތުރުވެރިން، 138 މުއައްޒަފުން ވަނީ ކޮވިޑަށް ޕޮޒިޓިވްވެފައިވެއެވެ.
ރާއްޖެއިން މިހާތަނަށް 11،986 މީހަކު ޕޮޒިޓިވްވެފައިވާއިރު، 11,092 މީހަކު ވަނީ ބަލިން ރަނގަޅުވެފައެވެ. އަދި 40 މީހަކު މިބަލީގައި ވަނީ މަރުވެފައެވެ.
ކޮވިޑް-19ގެ ކޭސްތައް ރިޕޯޓު ކުރާ މިންވަރު މިހާރު ވަނީ ވަރަށް ބޮޑަށް ދަށްވެފައެވެ. ކޭސްތައް މަދުވުމާއި ގުޅިގެން އަޅާފައިވާ ފިޔަވަޅުތަކަށް ވަރަށް ބޮޑެތި ލުއި ތަކެއްދީފައިވާއިރު، މާސްކް އެޅުމާއި، ގިނަގިނައިން އަތްދޮވެ ސެނަޓައިޒް ކުރުމާއި، އިޖްތިމާއީ ގައިދުރު ކަމަށް ޚާއްސަ ސަމާލުކަމެއް ދިނުމަށް ވެސް އެޗްޕީއޭއިން އިލްތިމާސްކޮށްފައިވެއެވެ.
