ރާއްޖޭގައި ގަވައިދާ ޙިލާފަށް އުޅޭ ބިދޭސިން ރެގިއުލޭޓް ކުރުމުގެ ޕްރޮގްރާމް މިހާރު ވެސް ކުރިއަށް ގެންދަމުންދާ ކަމަށް އިކޮނޮމިކް މިނިސްޓްރީގެ ޑެޕިއުޓީ މިނިސްޓަރު މަރިޔަމް ނާޒިމާ ވިދާޅުވެއްޖެއެވެ.
ރާއްޖެޓީވީގެ "ފަލަ ސުރުހީ" ޕްރޮގްރާމްގައި ވާހަކަ ދައްކަވަމުން މަރިޔަމް ނާޒިމާ ވިދާޅުވީ 2019 ވަނަ އަހަރުގެ ސެޕްޓެމްބަރު މަހު އިކޮނޮމިކް މިނިސްޓަރ ފައްޓަވައިދެއްވި ޕްރޮގްރާމްގެ ދަށުން، 40،000 އަށް ވުރެ ގިނަ ބިދޭސީން ވަނީ ބައިވެރިވެފައެވެ. އަދި މީގެ ތެރެއިން 5000 މީހަކު ގަވައިދާ އެއްގޮތަށް އުޅޭ ފަރާތްތަކަށް ބަދަލުކުރެވިފައިވާ ކަމަށް ވިދާޅުވިއެވެ.
ރަޖިސްޓްރީ ވުމަށް ބޭނުން ވާ ބިދޭސިންނަށް ދެ ގޮތަކަށް ރަޖިސްޓްރީ ކުރެވޭނެ ކަމަށް ވެސް އޭނާ ވަނީ ވިދާޅުވެފައެވެ. އެއީ ބިދޭސީ މީހާ އަމިއްލައަށް ރަޖިސްޓްރީވާ ރަޖިސްޓްރީ ވުމުގެ އިތުރުން ވަޒީފާ ދޭ ފަރާތަކުން އެ މީހުން ރަޖިސްޓްރީ ކުރުމުގެ އުސޫލެވެ.
ނާޒިމާ އިތުރަށް ވިދާޅުވީ ބިދޭސިން ރެގިއުލަރ ސިސްޓަމްގެ ތެރެއަށް ވެއްދުމަށް ގިނަ ވަގުތު ނަގަމުން ދަނީ ބައެއް މީހުންގެ އަތުގައި ޕާސްޕޯޓު ވެސް ނެތުމާއެކު ކަމަށެވެ. އަދި މި ޕްރޮގްރާމަށް ދިމާވި އެންމެ ބޮޑު ގޮންޖެހުމަކީ މުޅި ދުނިޔެއަށް ދިމާވެފައިވާ ޕެންޑެމިކް ކަމަށެވެ.
އެގޮތުން ކޮވިޑް-19 އާ ދެކޮޅަށް އަޅާފައިވާ ފިޔަވަޅުތަކުގެ ސަބަބުން ބައްދަލުވުންތައް ބޭއްވުމަށް ދަތިތަށް ކުރިމަތި ވަމުން ދިޔަ ނަމަވެސް އޮންލައިންކޮށް މި މަސައްކަތް މިހާރު ވެސް ކުރަމުންދާ ކަމަށް ވިދާޅުވިއެވެ.
ގަވައިދާ ހިލާފަށް ރާއްޖޭގައި 60،000 ވުރެ ގިނަ ބިދޭސީން އުޅެމުން އަންނަ ކަމަށް އެކި މަސްދަރުތަކުން ހާމަކޮށްފައިވާއިރު، އެ ފަރާތްތަކަށް ހާއްސަކޮށްގެން ހިންގާ ރެގިއުލަރައިޒޭޝަން ޕްރޮގްރާމްގެ އިތުރުން، ވޮލުންޓަރީ ރިޕެޓްރިއޭޝަން ޕްރޮގްރާމެއް ވެސް ސަރުކާރުން އަންނަނީ ހިންގަމުންނެވެ.
