ގިނަ ބާވަތްތަކެއްގެ ހިކި މަސް ލަންކާއަށް އެތެރެކުރުން މަނާކޮށްފި
7 ނޮވެމްބަރު 2020 | ހޮނިހިރު 17:57ދިވެހި ސަރުކާރުން ބުނަނީ ރާއްޖެއިން ލަންކާއަށް މަސް އެކްސްޕޯޓް ކުރުމަށް އެއްވެސް ދަތިކަމެއް ނެތް ކަމަށް
ރާއްޖޭގައި ހިއްކާފައި ހުރި މަހުގެ އުފެއްދުންތަކެއް
ލަންކާގެ ޑިޕާޓްމެންޓް އޮފް ފިޝަރީސް އެންޑް އެކުއާޓިކް ރިސޯސެސް އިން، ހިއްކާފައި ހުރި މަހުގެ ގިނަ ބާވަތްތައް އެތެރެކުރުން ވަގުތީ ގޮތުން މަނާކޮށްފިއެވެ.
އެ ޑިޕާޓްމެންޓުން ނެރުނު ބަޔާނުގައި ވަނީ ކޮވިޑާއި ގުޅިގެން މަހުގެ މާކެޓިންގ ސިސްޓަމަށް ބޮޑެތި ގޮންޖެހުންތަކެއް ކުރިމަތިވެފައިވާ ކަމަށެވެ. އެގޮތުން ލަންކާގެ މަސްވެރިން ބާނާ މަސް ވެސް ހިއްކަމުންދާއިރު އެހެން ގައުމުތަކުން ހިއްކާފައި ހުރި މަސް ލަންކާއަށް އެތެރެ ކުރާނަމަ އެ ގައުމުގެ މަސްވެރިންނަށް ބޮޑެތި ގެއްލުންތަކެއް ވާނެ ކަމަށް ބަޔާނުގައިވެއެވެ.
އެހެންކަމުން އެހެން ގައުމުތަކުން އުފައްދާ ހިއްކާފައި ހުރި މަހުގެ ގިނަ ބާވަތްތައް ލަންކާއަށް އެތެރެކުރުން މަނާކޮށްފައިވާ ކަމަށް އެ ޑިޕާޓްމެންޓުން ބުންޏެވެ.
މިކަމާއި ގުޅިގެން ދިވެހި ސަރުކާރުން ބުނެފައި ވަނީ ދިވެހި ކަނޑު މަހުގެ ބާވަތްތައް ލަންކާއަށް އެތެރެކުރުން މަނާކޮށްފައިވާ ކަމަށް ސްރީލަންކާ ސަރުކާރުން ރާއްޖެއާއި ހިއްސާކޮށްފައި ނުވާ ކަމަށެވެ. ފޮރިން މިނިސްޓްރީން އިތުރަށް ބުނީ ލަންކާއަށް އެހެން ގައުމުތަކުން މަސް އިމްޕޯޓް ކުރުން މަނާކުރި ނަމަވެސް، ރާއްޖެއިން އެގައުމަށް މަސް އެކްސްޕޯޓް ކުރުމަށް އެއްވެސް ހުރަހެއް ނެތް ކަމަށެވެ.
މިހާރު ވެސް ލަންކާގައި ވަނީ އެ ގައުމަށް އެތެރެކުރާ މުދާ ކޮންޓްރޯލްކޮށް، މަސްވެރިންނާއި ދަނޑުވެރިންގެ ވިޔަފާރިތައް ހިމާޔަތްކުރުމަށް ފިޔަވަޅުތައް އަޅާފައެވެ. ލަންކާއަކީ ތައިލެންޑް ނަގާފައި، ރާއްޖެއިން އެންމެ ގިނަ އަދަދަކަށް މަސް ބޭރުކުރާ އެއް ގައުމެވެ. އަދި ރާއްޖޭގެ ހިކަމަހުގެ ބާވަތްތަކަށް ލަންކާގައި އޮންނަ ޑިމާންޑު ވަރަށް ބޮޑެވެ.
