ފުރަބަންދު ކަރަންޓީން އުވާލުމަށް އަދި ނިންމާފައިނުވޭ: ޑރ.ނަޒްލާ
6 ނޮވެމްބަރު 2020 | ހުކުރު 04:13އެފަދަ ނިންމުމެއް ނިންމާނަމަ އެކަން އިއުލާން ކުރާނެ
ނޫސްވެރިންގެ ބައްދަލުވުމުގައި އެޗްއީއޯސީގެ ތަރުޖަމާނު ޑރ.ނަޒްލާ ރަފީގު ވާހަކަދައްކަވަނީ
ފުރަބަންދު ކަރަންޓީން އުވާލާނީ ވަރަށް ގިނަ ކަންކަމަށް ބެލުމަށްފަހު ކަމަށާއި، އަދި އެގޮތަށް ނިންމާފައިނުވާ ކަމަށް ހެލްތު އެމަރޖެންސީ އޮޕަރޭޝަން ސެންޓަރު (އެޗްއީއޯސީ)ން ބުނެފިއެވެ.
ބުރާސްފަތި ދުވަހުގެ ރޭ އެޗްއީއޯސީން ބޭއްވި ނޫސްވެރިންގެ ބައްދަލުވުމުގައި އެސެންޓަރުގެ ތަރުޖަމާން ޑރ.ނަޒްލާ ރަފީގު ވިދާޅުވީ ފުރަބަންދު ކަރަންޓީން އުވާލާ ގޮތަށް ނުނިންމާ ކަމަށާއި، އެފަދަ ނިންމުމެއް ނިންމާނަމަ އެކަން އިއުލާން ކުރާނެ ކަމަށެވެ.
ޑރ.ނަޒްލާ ވިދާޅުވީ މިފަދަ ނިންމުމެއް ނިންމާނަމަ ވަރަށް ގިނަ ކަންކަމަށް ބަލާނެ ކަމަށާއި، ވަރަށް ގިނަ މަޝްވަރާތައް ކުރިއަށްދާ ކަމަށެވެ.
އެގޮތުން ފްލޫ ކްލިނިކްތަކުން ޕޮޒިޓިވްވާ ރޭޓް، އެކްޓިވް ސަރވައިލެންސްއިން ޕޮޒިޓިވްވާ ރޭޓް، ޚާއްސަކޮން އަންލިންކް ކޭސްތަށް ފެންނަމުންދާ ރޭޓަށް ބަލާނެ ކަމަށް ޑރ.ނަޒްލާ ވިދާޅުވިއެވެ.
ކޮވިޑްގެ ކޭސްތައް ފެންނަމުންދާ ރޭޓަށް ބާލައިރު، މާލެސިޓީން ޕޮޒިޓިވްވާ އަދަދު ވަނީ ވަރަށް ބޮޑަށް ދަށަށް ގޮސްފައެވެ. ނަމަވެސް ބަލީގެ ނުރައްކާ ކުޑަ ނުވާ ކަމަށާއި، ރައްކާތެރިވުމަށް އަޅާފައިވާ ފިޔަވަޅުތަކަށް ޚާއްސަ ސަމާލުކަމެއް ދިނުމަށް އެޗްއީއޯސީން އިލްތިމާސްކޮށްފައިވެއެވެ. އަދި މާލެސިޓީގައި އޮތީ ކޮމިއުނިޓީ ސްޕްރެޑެއް ކަމަށްވާތީ މާލެއިން ފުރައިގެން އަތޮޅުތެރޭގެ ރަށަކަށް ދާނަމަ 14 ދުވަހުގެ ފުރަބަންދު ކަރަންޓީން ފުރިހަމަ ކުރަންޖެހެއެވެ.
