ބުރާސްފަތި ދުވަހު ކޮވިޑަށް ޕޮޒިޓިވްވި މީހުންގެ އަދަދު 71 އަށް!
ފާއިތުވެދިޔަ 24 ގަޑިއިރުގެ ތެރޭގައި 1758 ސާމްޕަލެއް ޓެސްޓްކުރި
އާރުއާރުޓީ އިން މާލޭގެ މަގުމަތީގައި ހަރަކާތްތެރިވަނީ
ކޮވިޑް-19 އަށް އިތުރު 71 މީހަކު ޕޮޒިޓިވްވެފައިވާ ކަމަށް ހެލްތު ޕްރޮޓެކްޝަން އޭޖެންސީއިން ބުނެފިއެވެ.
އެޗްޕީއޭ އިން ބުނީ ބުދަ ދުވަހުގެ އިރުއޮއްސި 6:00 އިން ބުރާސްފަތި ދުވަހުގެ އިރުއޮއްސި 6:00 އަށް 71 މީހަކު ޕޮޒިޓިވްވެފައިވާ ކަމަށެވެ. އެއީ 15 ދިވެހިންނާއި، އެހެނިހެން ގައުމުތަކަށް ނިސްބަތްވާ 56 މީހުންނެވެ.
މީގެ ތެރެއިން 60 މީހަކު ޕޮޒިޓިވްވެފައިވަނީ މާލެ ސަރަހައްދުންނެވެ. އަދި އަތޮޅުތެރެއާ ރިސޯޓުތަކުން 11 މީހަކު ވަނީ ޕޮޒިޓިވްވެފައެވެ.
ފާއިތުވެދިޔަ 24 ގަޑިއިރުގެ ތެރޭގައި 1758 ސާމްޕަލެއް ޓެސްޓްކޮށްފައިވާއިރު، 19 މީހަކު ބަލިން ވަނީ ރަނގަޅުވެފައެވެ. މި ވަގުތު 838 އެކްޓިވް ކޭސް ހިމެނޭއިރު، އައިސޮލޭޝަން ފެސިލިޓީތަކުގައި 185 މީހަކު އެބަތިއްބެވެ. އަދި 56 މީހަކަށް ފަރުވާދެމުން އަންނަނީ ހޮސްޕިޓަލްގައެވެ.
ރާއްޖެއިން މިހާތަނަށް 11،893 މީހަކު ބައްޔަށް ޕޮޒިޓިވްވެފައިވާއިރު، 11010 މީހަކު ވަނީ ބަލިން ރަނގަޅުވެފައެވެ. އަދި 38 މީހަކު ވަނީ ނިޔާވެފައެވެ.
ރައްކާތެރިވުމަށް އަޅާފައިވާ ފިޔަވަޅުތަކަށް ފަރުވާ ކުޑަ ނުކުރުމަށާއި އެކްޓިވް ކޭސްތައް ފެނިފައިވާ ރަށްރަށުގައި ގައިޑްލައިންތަކާ އެއްގޮތަށް އަމަލުކުރުމަށް ކަމާބެހޭ އިދާރާތަކުން ދަނީ އިލްތިމާސްކުރަމުންނެވެ.
