މާވަށު ބަނދަރުގެ މަސައްކަތުގެ ބޮޑު ބައެއް ނިންމާލައިފި
ބޭރުތޮށި ރޭނުމުގެ މަސައްކަތުގެ 57 އިންސައްތަ ވަނީ ނިމިފަ
މިއީ މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރގެ ފަރާތުން އެމްޓީސީސީ އާއި ހަވާލުކޮށްގެން ކުރިއަށްގެންދާ މަޝްރޫއުއެއް
ލ. މާވަށު ބަނދަރުގެ މަސައްކަތުގެ ބޮޑު ބައެއް ނިންމާލައިފިއެވެ.
އެމްޓީސީސީން ލ. މާވަށް ބަނދަރު ތަރައްޤީ ކުރުމުގެ މަޝްރޫޢުގެ މަސައްކަތުގެ 72 އިންސައްތަ ނިމިއްޖެ ކަމަށެވެ. އެގޮތުން މި މަޝްރޫޢުގެ ތެރެއިން ބޭރުތޮށި ރޭނުމުގެ މަސައްކަތުގެ 57 އިންސައްތަ ނިމިފައި ވާކަމަށް ވެސް އެ ކުންފުނިން ބުނެއެވެ.
''ރާއްޖެއެމްވީ'' އަށް މިކަމާ ގުޅޭ މައުލޫމާތު ހިއްސާ ކުރައްވަމުން މާވަށު ކައުންސިލްގެ ރައީސް އަހުމަދު މޫސާ ވިދާޅުވީ އެންމެ ފުރަތަމަ އެ ރަށުގައި ބަނދަރު ގާއިމް ކުރިއިރު ބަނދަރުގެ އުތުރު ކޮޅު ހަދާފައިވަނީ ވެލި ބަސްތާ ޖަހައިގެން ކަމުން އެ ހިސާބު ވަނީ ވަރަށް ބޮޑަށް ހަލާކުވެފައި ކަމަށެވެ. އަދި ބޭރު ތޮށި ހަލާކުވުމުގެ އިތުރުން ބައެއް ހިސާބުތައް ތިލަ ކަމަށް އޭނާ ވަނީ ވިދާޅުވެފައެވެ.
މީގެ އިތުރުން ވެސް މި މަސައްކަތް ނުހަނު ބާރަށް ކުރިއަށް ދާކަން ފާހަގަކުރައްވާ އޭނާ ވިދާޅުވީ ކޮންމެ ދުވަހަކު ވެސް ގާތްގަނޑަކަށް 24 ގަޑިއިރު މި މަޝްރޫއުގެ މަސައްކަތް ކުރިއަށްދާ ކަމަށެވެ. އަދި އެ ރަށުގައި 5 ދޯނި އޮންނައިރު މާލެ ދާ ހަތަރު ބޯޓު އޮންނަ ކަމަށް ވިދާޅުވެ އަހުމަދު މޫސާ ވިދާޅުވީ މި މަޝްރޫއު އެއްކޮށް ނިމިގެން ދިޔުމުން ރަށުގެ ރައްޔިތުންނަށް ނުހަނު ގިނަ ލުއި ފަސޭހަތަކެެއް ލިބިގެން ދާނެ ކަމަށެވެ.
މި މަޝްރޫޢުގެ ދަށުން ކުރުމަށް ހަމަޖެހިފައިވާ މަސައްކަތްތަކުގެ ތެރޭގައި 284 މީޓަރގެ ބޮޑުހިލައިގެ ބޭރުތޮށި ޖެހުމާއި، 110 މީޓަރ އެއްގަމު ތޮށި ހެދުމާއި، 40 މީޓަރ ރިވެޓްމަންޓް ޖެހުމާއި، ރޭމްޕެއް ހެދުމާއި، 550 އަކަމީޓަރުގެ ޕޭވްމަންޓް ހެދުމާއި، 15,300 ކިއުބިކް މީޓަރަށް ބަނދަރު ފުންކުރުމާއި، 11,585 ކިއުބިކް މީޓަރަށް ނެރު ފުންކުރުމާއި، 10 މޫރިންގ ބްލޮކްސް ޖެހުމުގެ އިތުރުން 2 ނެރުބައްތި ޖެހުން ހިމެނެއެވެ.
މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރގެ ފަރާތުން އެމްޓީސީސީ އާއި ހަވާލުކޮށްގެން ކުރިއަށްގެންދާ މި މަޝްރޫޢަކީ 27.3 މިލިއަން ރުފިޔާގެ މަޝްރޫޢެކެވެ. މި މަޝްރޫޢު މޮބިލައިޒް ކުރެވިފައި ވަނީ 07 އޭޕްރީލް 2020 ގައެވެ.
