ރޫޓްގެ ފައިސާ ފޭރެން އުޅުނު މައްސަލައިގައި އިތުރު ތިން މީހުން ހައްޔަރުކޮށްފި
3 ނޮވެމްބަރު 2020 | އަންގާރަ 15:4920 އަހަރުގެ މީހަކާއި، 21 އަހަރުގެ މީހެއް އަދި 30 އަހަރުގެ މީހެއް ވަނީ ހައްޔަރުކޮށްފައި
ބޭންކް އޮފް ސިލޯން ކުރިމަތިން 4.2 މިލިއަން ރުފިޔާ ފޭރެން އުޅުނު އެ ހާދިސާގެ ވީޑިއޯގެ ބައެއް މަންޒަރުތައް
ރޫޓް ފިހާރައިގެ ހަތަރު މިލިއަނަށް ވުރެ ގިނަ ފައިސާ ފޭރެން މަސައްކަތް ކުރި މައްސަލައިގައި އަމަލީ ގޮތުން ބައިވެރިވި ކަމަށް ތުހުމަތު ކުރެވޭ އިތުރު ތިން މީހަކު ހައްޔަރުކޮށްފިއެވެ.
އަންގާރަ ދުވަހު ފުލުހުން ބުނީ ރޫޓް ފިހާރައިގެ ފައިސާ ފޭރެން މަސައްކަތް ކުރި މައްސަލާގައި 20 އަހަރުގެ މީހަކާއި، 21 އަހަރުގެ މީހެއް އަދި 30 އަހަރުގެ މީހެއް ހައްޔަރުކޮށްފައިވާ ކަމަށެވެ. ފުލުހުން ބުނީ މިތިން މީހުންނަކީ ވެސް ދިވެހި ފިރިހެނުން ކަމަށެވެ.
އެ މީހުންގެ ބަންދާ މެދު ގޮތެއް ނިންމުމަށް ކޯޓަށް ހާޒިރު ކުރުމުން މިނިސްޓްރީ އޮފް ހޯމް އެފެއަރޒުން ކަނޑައަޅާ ތަނެއްގައި ބަންދުގައި ބައިތިއްބައިގެން ތަހުގީގު ކުރިއަށް ގެންދިއުމަށް 15 ދުވަހުގެ މުއްދަތެއް ވަނީ ދީފައިވާ ކަމަށް ފުލުހުން ބުނެއެވެ.
މައްސަލައިގައި އަމަލީ ގޮތުން ބައިވެރިވި ކަމަށް ތުހުމަތު ކުރެވޭ އިތުރު 3 މީހަކު ހައްޔަރުކޮށްފައިވާއިރު، 27 އޮކްޓޫބަރު ވީ އަންގާރަ ދުވަހުގެ ރޭ 20 އަހަރުގެ މީހެއް ހައްޔަރުކޮށްފައެވެ. އަދި 28 އޮކްޓޫބަރު ވީ ބުދަ ދުވަހު 21 އަހަރުގެ މީހެއް ވަނީ ހައްޔަރުކޮށްފައެވެ.
ސޯޝަލް މީޑިއާގައި އާންމުވެފައިވާ ވީޑިއޯއިން ފެންނަ ގޮތުގައި "ރޫޓް" ފިހާރައިގެ ގިނަ އަދަދެއްގެ ފައިސާ ކަރުދާސް ބޮޑު ފޮށިގަނޑަކަށް އަޅާއިގެން އައި ވޭން، ބޭންކް އޮފް ސިލޯން ކުރިމައްޗަށް މަޑު ކުރުމާއެކު، ދެ ސައިކަލެއްގައި އައި ހަތަރު މީހަކު ވަނީ އެފައިސާ ފޮށިގަނޑު ފޭރެން މަސައްކަތްކޮށްފައެވެ.
ނަމަވެސް އެމީހުންނަށް އެކަން ކާމިޔާބު ނުވީ، ބޭންކް އޮފް ސިލޯންގެ ސެކިއުޓީ ބަލަހައްޓާ، އެބްސޮލިއުޓް ސެކިއުރިޓީ އެންޑް އެޑްވާންސް ޕްރޮޓެކްޝަން ޕްރައިވެޓް ލިމިޑެޓް (އޭއެސްއޭޕީ) ގެ ސެކިއުރިޓީގެ އޮފިޝަލްގެ ބޭންކުން ނުކުމެ، އެ ފައިސާ ފޮށިގަނޑު އެމީހުންގެ އަތުން އަތުލައިގަތުމުގެ ސަބަބުންނެވެ.
އޭއެސްއޭޕީގެ އެ ސެކިއުރިޓީ އޮފިޝަލްގެ ކުޅާދާނަކަން ފާހަގަ ކޮށް، ވަރަށް ގިނަ ބަޔަކު ވަނީ ސޯޝަލް މީޑިއާގައި ޝުއޫރު ފާޅު ކޮށްފައެވެ. އަދި ބޭންކް އޮފް ސިލޯނުންނާއި އަދި "ރޫޓް" ފިހާރައިން ވެސް އޭއެސްއޭޕީގެ އެ ސެކިއުރިޓީ އޮފިޝަލްގެ ކުޅާދާނަކަން ފާހަގަކޮށް، އޭއެސްއޭޕީގެ ވެރިންނަށް ޝުކުރު އަދާ ކޮށްފައި ވެއެވެ.
ސައިކަލުގައި ދިޔަ ހަތަރު މީހުންގެ ތެރެއިން ތިން މީހަކު ތިބީ ހެލްމެޓް އަޅައިގެންނެވެ. އަނެކަކު ހުރީ މާސްކެއް އަޅައިގެންނެވެ. ފައިސާ ފޭރެން މަސައްކަތް ކުރި އެ ވަގުތަކީ، އެ ސަރަހައްދުގެ ކާރުބާރު ބޮޑު، އަދި މީހުން ގިނަ އަދަދަކަށް ތިބި ވަގުތެއް ނަމަވެސް، ވީޑިއޯއިން ފެންނަ މަންޒަރުން، އާންމުންގެ ގިނަ ބަޔަކު އެކަމަށް މާބޮޑު ސަމާލުކަމެއް ނުދިން އިރު އަނެއްބަޔަކު އުޅުނީ، އެ ސަރަހައްދު ދޫކޮށް ދިއުމުގައެވެ.
ފޭރެން އުޅުނު މީހުން އައީ ދެ ސައިކަލްގައި "ރޫޓް" ފިހާރައިގެން ވޭނަށް ފާރަލައިގެންނެވެ. ފޭރެން އުޅުނު މީހުން ވަނީީ "ރޫޓް" ފިހާރައިގެ ވޭނުގައި އައި މީހުންގެ ލޮލަށް ބޮޑީ ސްޕްރޭ ވެސް ޖަހާފައެވެ.
