ފަހު ވަގުތު ޕެރިސިޗް އިންޓަ ސަލާމަތްކޮށްދީފި

ފަހަތުން އަރައި ދެ ލަނޑު ޖަހައި އިންޓަ މިލާނުން ހޮނިހިރު ދުވަހުގެރޭ އިޓާލިއަން ލީގުގައި ޕާމާ އަތުން ބަލިނުވެ ސަލާމަތްވެއްޖެއެވެ.

އިންޓަގެ ދަނޑުގައި ކުޅުނު މި މެޗު އެއްވަރުވީ 2-2 ގެ ނަތީޖާއަކުންނެވެ.

މި މެޗުގެ ފުރަތަމަ ހާފުގައި ލަނޑެއް ނުފެނުނު ނަމަވެސް، ދެވަނަ ހާފު ފަށައިގެން ފުރަތަމަ މިނެޓުގައި ޕާމާއިން ވަނީ ލަނޑު ޖަހާ ލީޑު ނަގާފައެވެ. މި ލަނޑު އެ ޓީމަށް ކާމިޔާބުކޮށްދިނީ ޖާވީނިއޯއެވެ. އަދި މެޗުގެ 62 ވަނަ މިނެޓުގައި ޖާވީނިއޯ ވަނީ އިތުރު ލަނޑެއް ޖަހާ ޕާމާގެ ލީޑު ފުޅާކޮށްދީފައެވެ.

އެކަމަކު އޭގެ ދެ މިނެޓު ފަހުން އިންޓައިން ވަނީ ލަނޑެއް ޖަހާ ފަރަގު ކުޑަކޮށްފައެވެ. މި ލަނޑު އެ ޓީމަށް ކާމިޔާބުކޮށްދިނީ މާސެލޯ ބްރޮޒޮވިޗެވެ. އަދި މި މެޗުން އިންޓަ ބަލިނުވެ ސަލާމަތްވީ އިވާން ޕެރިސިޗް ޖެހި ލަނޑުންނެވެ.

މި މެޗު އެއްވަރުވިއިރު، ލީގުގައި އިންޓައިން ކުޅުނު ފުރަތަމަ ހަ މެޗުގެ ތެރެއިން އެ ޓީމަށް މޮޅުވެވުނީ ތިން މެޗުންނެވެ. ދެ މެޗެއް އެއްވަރުވިއިރު، އެއް މެޗުން ވަނީ ބަލިވެފައެވެ. އެހެންކަމުން އިންޓަ އޮތީ ތާވަލުގެ ފަސްވަނައިގައި 11 ޕޮއިންޓާއެކުއެވެ. އިންޓައާ އެންމެ ވާދަވެރި އޭސީ މިލާން އޮތީ ތާވަލުގެ އެއްވަނައިގައި ފަސް މެޗުން 13 ޕޮއިންޓާއެކުއެވެ. އަދި ހޮނިހިރު ދުވަހުގެރޭ އިންޓައާ އެއްވަރުކުރި ޕާމާ އޮތީ ތާވަލުގެ 16 ވަނައިގައި ހަ މެޗުން ފަސް ޕޮއިންޓާއެކުއެވެ.

އިންޓައިން ދެން ލީގުގައި މެޗެއް ކުޅޭނީ މި މަހުގެ އަށްވަނަ ދުވަހުއެވެ. އެ ދުވަހު ރަށުން ބޭރުގައި އިންޓަ ނުކުންނާނީ އެޓަލާންޓާއާ ދެކޮޅަށެވެ.