ޗައިނާ އަކީ ރާއްޖެއަށް އޮތް އެންމެ ބޮޑު އެއް ނުރައްކާ: މައިކް ޕޮމްޕެއޯ
29 އޮކްޓޯބަރު 2020 | ބުރާސްފަތި 16:50ޕެރިސް އެގްރިމެންޓަކީ ޖޯކެއް
އެމެރިކާގެ ސެކްރެޓަރީ އޮފް ސްޓޭޓް މައިކަލް ރިޗަރޑް ޕޮމްޕެއޯ
ޗައިނާ އަކީ ރާއްޖެއަށް އޮތް އެންމެ ބޮޑު އެއް ނުރައްކާ ކަމަށް އެމެރިކާގެ ސެކެރެޓަރީ އޮފް ސްޓޭޓް މައިކަލް ރިޗަރޑް ޕޮމްޕެއޯ ވިދާޅުވެއްޖެއެވެ.
މައިކް ޕޮމްޕެއޯ މިހެން ވިދާޅުވީ "ރާއްޖެޓީވީ" އަށް ދެއްވި ހާއްސަ އިންޓަވިއުއެއްގައިއެވެ.
މި އިންޓަވައިއުގައި ވާހަކަ ދައްކަވަމުން ޕޮމްޕެއޯ ވަނީ ޕެރިސް އެގްރިމެންޓަކީ ޖޯކެއް ކަމަށާއި އެ އެގްރީމެންޓްގައި ސޮއިކުރި ގައުމުތަކުން އެ އެގްރީމެންޓާއި އެއްގޮތަށް އަމަލުތައް ނުބަހައްޓާކަމަށް ވިދާޅުވެ، އެމެރިކާ އިން އެ އެއްބަސްވުމުން ވަކިވުމަށް ނިންމި ނިންމުމަކީ ރަނގަޅު ނިންމުމެއް ކަމަށް ވިދާޅުވެފައެވެ.
ހާއްސަކޮށް ޗައިނާ އަށް ބަލާނަމަ، ޗައިނާ އަކީ އެންމެ ގިނަ އަދަދުތަކަށް ވައި ތަޣައްޔަރުކުރާ ގައުމު ކަމަށާއި ސީއޯ2 އެންމެ ގިނައިން މިސަރަހައްދުގައި އުފައްދަނީ ބެއިޖިންގައި ކަމަށާއި ޗައިނާ އަކީ ރާއްޖެ އަށާއި ރާއްޖޭގެ އިގްތިސާދަށް އޮތް އެންމެ ބޮޑު ނުރައްރާކަމަށް ޕޮމްޕެއޯ ވިދާޅުވިއެވެ.
އެހެން ނަމަވެސް އެމެރިކާއިން ޕެރިސް އެގްރިމެންޓުން ވަކިވި ނަމަވެސް ސީއޯ2 އުފައްދާ ވަރު ބޮޑުތަނުން މަދުކޮށްފައިވާނެ ކަމަށާއި އެހެން ކަމުން އެމެރިކާ އަށް އިތުބާރު ކުރެވޭނެ ކަމަށް ޕޮމްޕެއޯ ވިދާޅުވިއެވެ. އަދި އެމެރިކާއިން މިކަން ކޮށްފައި ވަނީ ޑިމޮކްރަޓިކް ގައުމުތަކުގެ އުސޫލުތަކުގެ ތެރެއިން އެގައުމުގެ ރައްޔިތުން އެކަމަށް ބޭނުންވެގެން ކަމަށްވެސް ޕޮމްޕެއޯ ވިދާޅުވިއެވެ.
ރާއްޖެ އަށް ކުރެވިގެން މިދިއަ ދަތުރަކީ މުހިންމު ދަތުރަކަށް ވެގެން ގޮސްފައި ވަނީ މި ސަބަބަށްޓަކައި ކަމަށް ވިދާޅުވެ ޕޮމްޕެއޯ ވަނީ ޑިމޮކްރަޓިކް ދެގައުމަކުން އެއް މަންޒިލަކަށް ވާސިލުވުމަށްޓަކައި އެކުގައި މަސައްކަތްކުރުމުގެ މުހިންމުކަން ފާހަގަކުރައްވާފައެވެ. އަދި ރާއްޖެ އާއި އެކު އެމެރިކާއިން މަސައްކަތްކުރާނީ އެކުވެރިއެއްގެ ހައިސިއްޔަތުން، ޑިމޮކްރަޓިކް ގައުމެއްގެ ހައިސިއްޔަތުން ކަމަށްވެސް ޕޮމްޕެއޯ ވިދާޅުވިއެވެ.
