ރާއްޖެއާއި ބަންގްލަދޭޝްއާ ދެމެދު ވިޔަފާރީގެ ގުޅުން އިތުރަށް ބަދަހި ކުރެވޭނެ ގޮތްތަކާއި ގުޅޭ ގޮތުން ދެ ގައުމުގެ ދެމެދު މަޝްވަރާ ކޮށްފިއެވެ.
ބަންގްލަދޭޝްގެ ފޮރިން މިނިސްޓަރު ޑރ. އަބުލް ކަލާމް އަބްދުލް މޮމެން ވަނީ ރާއްޖެއިން ބަންގްލަދޭޝްއަށް ކަނޑައަޅުއްވާފައިވާ ސަފީރު އައިޝަތު ޝާން ޝާކިރާއި ބުދަ ދުވަހު ބައްދަލު ކުރައްވާފައެވެ.
ބަންގްލަދޭޝްގެ ސްޓޭޓް ގެސްޓު ހައުސްގައި ބޭއްވި ބައްދަލުވުމުގައި ދެ ބޭފުޅުން ވަނީ ދެ ގައުމުގެ ގުޅިގެން މަސައްކަތް ކުރެވޭނެ ދާއިރާތަކާއި ބެހޭ ގޮތުން ފުޅާ ދާއިރާއެއްގައި މަޝްވަރާ ކުރައްވާފައެވެ. އެގޮތުން ރާއްޖެއާ ބަންގްލަދޭޝްއާ ދެމެދު ޝިޕިން ލިންކްއަކުން ގުޅާލުމުގެ ޝައުގުވެރިކަން ބަންގްލަދޭޝްގެ ފޮރިން މިނިސްޓަރު ފާޅުކުރައްވަފައިވެއެވެ.
ބަންގްލަދޭޝްއިން ހައިކޮލިޓީގެ ގާމެންޓާއި، ފާމަސޫޓިކަލް މެޓީރިއަލްސް، ލެދާ، ޕްލާސްޓިކްގެ އިތުރުން ދަނޑުވެރިކަން ކުރަން ބޭނުންވާ ސާމާނު ރާއްޖެއަށް އިމްޕޯޓް ކުރަން ޑރ. މޮމެން ވަނީ ބާރުއަޅުއްވާފައެވެ. އަދި ހަމަ އެއާއި އެކު ބަންގްލަދޭޝްއިން ރާއްޖެއަށް ހިލަވެލި އެތެރެ ކުރުމުގެ ޝައުގުވެރިކަން ވަނީ ފާޅުކުރައްވާފައެވެ. ރާއްޖެއަށް މިހާރު އެންމެ ބޮޑަށް ހިލަވެލި އެތެރެ ކުރަނީ އަވަށްޓެރި އިންޑިއާއިންނެވެ.
ރާއްޖެއާ ދެމެދު ޝިޕިން ލިންކްއަކުން ގުޅާލުމުގެ ޝައުގުވެރިކަން ބަންގްލަދޭޝްއިން ފާޅުކޮށްފައިވާއިރު ރާއްޖެއާ އިންޑިއާ ދެމެދު ކާގޯ ފެރީގެ ދަތުރުތައް ވަނީ ދާދި ފަހުން ފަށާފައެވެ.
