އިފްލާސްވުމާ އިފްލާސްކުރުމާ ގުޅޭ ބިލު ދިރާސާކުރުމަށް ކޮމިޓީއަށް
28 އޮކްޓޯބަރު 2020 | ބުދަ 08:36އިފްލާސްވުމާއި އިފްލާސްކުރުމުގެ ބިލުގެ ފުރަތަމަ ކިއުން އިއްވާފައިވަނީ މި މަހުގެ 14 ވަނަ ދުވަހު ބޭއްވި ޖަލްސާގަ
ރައްޔިތުންގެ މަޖިލިސް
އިފްލާސްވުމާއި އިފްލާސްކުރުމުގެ ބިލު ދިރާސާކުރުމަށް މަޖިލީހުގެ ޖުޑިޝަރީ ކޮމިޓީއަށް ފޮނުވައިފިއެވެ.
މި ބިލު ބަލައިގަތުމަށް ވޯޓު ދެއްވީ ބުދަ ދުވަހުގެ ޖަލްސާގައި ބައިވެރިވެވަޑައިގެންނެވި 53 މެމްބަރުންނެވެ.
އިފްލާސްވުމާއި އިފްލާސްކުރުމުގެ ބިލުގެ ފުރަތަމަ ކިއުން އިއްވާފައިވަނީ މި މަހުގެ 14 ވަނަ ދުވަހު ބޭއްވި ޖަލްސާގައެވެ. ސަރުކާރުގެ ފަރާތުން ފުވައްމުލަކު އުތުރު ދާއިރާގެ މެމްބަރު މުހައްމަދު ރަޝީދު މި ބިލު ހުށައަޅުއްވަމުން ވިދާޅުވީ ބިލަކީ ދަރަނިވެރިޔާގެ ދަރަނި ނުދެއްކިގެން އެފަދަ ފަރާތެއް އިފްލާސްވުމާއި އިފްލާސްކުރުމުގެ ކަންކަން ބަޔާންކޮށްފައިވާ ބިލެއް ކަމަށެވެ.
މެމްބަރު ވިދާޅުވީ ދަރަނިވެރިޔާ އަރަނިވެރިންނަށް ދައްކަން ޖެހޭ ފައިސާ ނުދައްކާ ގިނަ ދުވަސްތަކެއް ވުމުން އެފަދަ ފަރާތްތަކާއި މެދު އެކަށިގެންވާ ފިޔަވަޅެއް ނޭޅޭ ކަމަށެވެ. އަދި އަރަނިވެރިންގެ ދަރަނި އަދާ ކުރުމަށް ޝަރުއީ ކޯޓަށް ހާޒިރު ނުވެ، ގައުމު ދޫކޮށް ދާއިރު ވެސް އެކަށިގެންވާ ފިޔަވަޅުތައް ނޭޅޭ ކަމަށެވެ.
އޭގެ އިތުރުން ދަރަނި ދެއްކުމުގެ ގާބިލުކަން ނެތްއިރު ވެސް ދަރަނިވެރިޔާ އިފްލާސް ކުރުމުގެ ބަދަލުގައި އެ ފަރާތްތަކުގެ މައްޗަށް އަރަނިވެރިން ފުލުފުލުގައި ފައިސާ ހޯދުމަށް ދައުވާކޮށް ހުކުމާއި އެއްގޮތަށް ފައިސާ ނުދެއްކުމުން އެ ފަދަ ފަރާތްތައް ބަންދުކޮށް ޖަލަށްލަމުންދާ ކަމަށް ވިދާޅުވިއެވެ.
މެމްބަރު ވިދާޅުވީ މަދަނީ އެއްބަސްވުމެއްގެ ދަށުން އަދާ ކުރަންޖެހޭ ޒިންމާއެއް އަދާ ނުކުރެވުނު ނަމަވެސް އެފަދަ މީހެއް ހައްޔަރުކޮށް، ބަންދު ކޮށްގެން ނުވާނެ ކަމަށް ގާނޫނު އަސާސީން ބަޔާން ކޮށްފައިވީ ނަމަވެސް ކަނޑައެޅިގެން އަސާސީ ހައްގާއި ހިލާފަށް ކޯޓުތަކުން އަމަލު ކުރަމުންދާ ކަމަށެވެ. އަދި ހަރުދަނާ އިފްލާސްކުރުމުގެ ނިޒާމެއް ތައާރަފް ވުމުން ކުރިއަރާފައިވާ އެހެން ގައުމުތަކެކޭ ވެސް އެއްފަދައިން އަރަނިވެރިޔާ އިފްލާސްވުމުގެ މަރުހަލާތައް ކަނޑައްތުކޮށް ނިމުމުން އަނެއްކާ ވެސް ވިޔަފާރިކުރުމުގެ ފުރުސަތު ލިބިދޭނެ ކަމަށެވެ.
