ރޫޓްގެ ފައިސާ ފޭރެން އުޅުނު މައްސަލައިގައި މީހަކު ހައްޔަރުކޮށްފި
28 އޮކްޓޯބަރު 2020 | ބުދަ 06:46މި މައްސަލައިގައި ހައްޔަރު ކުރީ 20 އަހަރުގެ ދިވެހި ފިރިހެނެއް
ހޯމަ ދުވަހު ހިނގި މި ހާދިސާގެ ވީޑިއޯގެ ބައެއް މަންޒަރުތައް
ރޫޓް ފައިސާ ފޭރެން އުޅުނު މައްސަލައިގައި މީހަކު ހައްޔަރުކޮށްފިއެވެ.
މި މައްސަލައާއި ގުޅިގެން ފުލުހުން ބުނީ މި މައްސަލައިގެ ތުހުމަތުގައި ކޯޓު އަމުރެއްގެ ދަށުން 20 އަަހަރުގެ ދިވެހި ފިރިހެނެއް އަންގާރަ ދުވަހުގެ ރޭ ހައްޔަރުކޮށްފައިވާ ކަމަށެވެ. މި މައްސަލަ ފުލުހުން އަންނަނީ ތަހުގީގު ކުރަމުންނެވެ.
ހޯމަ ދުވަހު ހިނގި މި ހާދިސާގެ ވީޑިއޯ މީސްމީޑިއާގައި ވައިރަލްވެފައިވާ އިރު، ދައުރުވަމުންދާ ވީޑީއޯއިން ފެންނަ ގޮތުގައި ރޫޓް ފިހާރައިގެ ވޭން ބޭންކް އޮފް ސިލޯން ކައިރިއަށް މަޑުކޮށްލާ ތަނުން ދެ ސައިކަލެއްގައި ތިބި ބަޔަކު ގޮސް ވޭނުން ބާލަން އުޅުން ފޮށިގަނޑު ފޭރި ގަންނަން މަސައްކަތް ކުރެއެވެ. ފޭރެން މަސައްކަތް ކުރި މީހުންގެ ތެރެއިން ބައެއް މީހުން ތިބީ ހެލްމެޓް އަޅާފައެވެ.
ވޭން ކައިރި ހުރި މީހަކަށް ހަމަލާ ދިނުމަށް ފަހު އެމީހުން އެ ފައިސާ ފޮށި ނެގީ ވޭން ތެރޭ އިން އަންހެނަކު އެ ވޭނުން ނެރެފައެވެ. އަދި އެ އަންހެން މީހާއާ ދިމާއަށް އެއްޗެއް ސްޕްރޭ ކުރާ މަންޒަރު ވީޑިއޯއިން ފެނެއެވެ. އެއަށް ފަހު، ފޮށިގަނޑު ނަގައިގެން ގެންދަން އުޅެނިކޮށް އެމީހާ ވެއްޓިފައި އޮއްވާ ބޭންކް އޮފް ސިލޯން އިމާރާތުން ނުކުތް ސެކިއުރިޓީ ގާޑު ފޭރޭ މީހުންގެ އަތުން ފޮށިގަނޑު އަތުލާ މަންޒަރު ފެނެއެވެ.
އެކަމާ ގުޅޭގޮތުން "ރާއްޖެއެމްވީ" އަށް މައުލޫމާތު ދެއްވަމުން ރޫޓްގެ އިސް ބޭފުޅަކު ވިދާޅުވީ، ފޭރެން އުޅުނު ފޮށިގަނޑުގައި 4.2 މިލިއަން ރުފިޔާ ހުރިކަމަށެވެ.
