ހެލްތު ޕްރޮޓެކްޝަން އެޖެންސީގެ ގައިޑްލައިނާ ހިލާފަށް، މުޒާހަރާ ކުރުމުގެ ސަބަބުން ހައްޔަރުކުރި ފަސް މީހުން ދޫކޮށްލައިފި އެވެ.

އާދިއްތަ ދުވަހު ހަވީރު ފުލުހުން ބުނެފައިވަނީ އެޗްޕީއޭގެ ގައިޑްލައިނާ ހިލާފަށް އެއްވުމަށް ކުރިއަށް ގެންދިޔަ ބަޔަކަށް ފުލުހުން ނަސޭހަތްތެރި ވުމުން ވެސް އެއްވުން ކުރިއަށް ގެންގޮސްފައިވާ ކަމަށެވެ. އެހެން ކަމުން ފުލުހުންގެ އަމުރަށް ނުކިޔަމަންތެރި ވެފައިވާ މައްސަލަ އާއި ގުޅިގެން ފަސް މީހަކު ފުލުހުންގެ ހައްޔަރަށް ގެންދެވިފައިވާ ކަމަށް ފުލުހުން ބުންޏެވެ.

އޭގެތެރޭގައި ހިމެނެނީ 2 ދިވެހި ފިރިހެނުންނާއި، 3 ދިވެހި އަންހެނުންނެވެ.

ހައްޔަރުކުރި އެ ފަސް މީހުން ދޫކޮށްލިކަން ހާމަކޮށް، ފުލުހުން ބުނީ އެ ފަސް މީހުން ދޫކޮށްލާފައިވަނީ ނަސޭހަތް ދިނުމަށް ފަހުގައި ކަމަށެވެ.

މި މީހުން އެއްވުން ކުރިއަށް ގެންދިއުމަށް މަސައްކަތް ކޮށްފައި ވަނީ މަޖީދީ މަގު އޮލިމްޕަސް ސަރަހައްދުގައެވެ. އެއްވުން ކުރިއަށް ގެންދާ ސަބަބެއް ކަމަށް އެ މީހުން ބުނެފައި ވަނީ ރޭޕާއި، ގެވެށި އަނިޔާ އާއި ދެކޮޅަށް އަޑުއުފުލުމާއި، ކޮވިޑް-19 ގެ ހާލަތުގައި ސަރުކާރުން އަމަލު ކުރަމުން ގެންދާ ގޮތާއި މެދު ހިތްހަމަނުޖެހުން ކަމަށެވެ. އެޗްޕީއޭގެ ގައިޑްލައިން ބުނާގޮތުން، ގިނަ މީހުން އެއްވާ ގޮތަށް އެއްވުންތައް ކުރިއަށް ގެންދިއުމަކީ މަނާކަމެކެވެ.

މީގެ ކުރިން ވެސް ކޮވިޑަށް ދިން ލުއިތަކާ އެކު މުޒާހަރާތަކެއް ކުރިއަށް ގެންދިޔައެވެ. އެ މުޒާހަރާތަށް ކުރިއަށް ގެންދިޔަތާ ގިނަ ދުވަސްތަކެއް ނުވެ، ކޮވިޑް-19 ކޭސްތަކުގެ އަދަދު ވަރަށް ބޮޑަށް އިތުރުވެ، އިތުރު ފިޔަވަޅުތަކެއް އަޅަން ޖެހުނެވެ.