އެމިރޭޓްސް އެއަރލައިންސްއިން ރާއްޖެއަށް 13,379 މީހުން ވަނީ އައިސްފައި
ބޯޑަރުތައް ހުޅުވާޅި ފަހުން ރާއްޖެއަށް އެންމެ ގިނައިން މީހުން އުފުލި އެމިރޭޓްސް އަދި ގަތަރުގެ ފްލައިޓްތަކެެއް
ރާއްޖޭގެ ބޯޑަރުތައް އަލުން ހުޅުވާލި ފަހުން ރާއްޖެއަށް އެންމެ ގިނަ އަދަދަކަށް މީހުން ދަތުރު ކޮށްފައި ވަނީ އެމިރޭޓްސް އެއަރލައިނުން ކަމަށް ޓޫރިޒަމް މިނިސްޓްރީގެ ތަފާސް ހިސާބުތަކުން ދައްކައިފިއެވެ.
މިހާތަނަށް އެމިރޭޓްސް އެއަރލައިނުން ރާއްޖެއަށް ދަތުރު ކޮށްފައިވާ މީހުންގެ އަދަދު ވަނީ 13،379 އަށް އަރާފައެވެ. މި މުއްދަތުގެ ތެރޭގައި އެ އެއަރލައިނުން ވަނީ ރާއްޖެއަށް 162 ދަތުރު ކޮށްފައެވެ.
ދެވަނައަށް އެންމެ ގިނަ މީހުން އައި ގަތަރު އެއަރވޭސްއިން މިހާތަނަށް 13،250 މީހަކު ވަނީ ރާއްޖެ އައިސްފައެވެ. އަދި ޖުމްލަ 192 ފްލައިޓް ވަނީ ބާއްވާފައެވެ. މިހާތަނަށް ރާއްޖެއަށް އެންމެ ގިނަ ދަތުރުތައް ކޮށްފައި ވަނީ ގަތަރު އެއަރވޭސްއިންނެވެ.
ރާއްޖޭގެ ގައުމީ އެއަރލައިން، މޯލްޑިވިއަންއިން ވެސް ވަނީ ބޯޑަރުތައް ހުޅުވާލި ފަހުން ރާއްޖެ އާއި ބޭރުގެ ގައުމުތަކާއި ދެމެދު 62 ދަތުރު ކޮށް، 2,152 މީހުން ރާއްޖެއަށް އުފުލާފައެވެ.
ކޮވިޑް-19 ގެ ހާލަތާއި ގުޅިގެން ރާއްޖޭގެ ބޯޑަރުތައް ބަންދު ކުރުމަށް ފަހު އަލުން ހުޅުވާލި ފަހުން، 11 އެއަރަލައިނަކުން ވަނީ ރާއްޖެއަށް ދަތުރުތައް ފަށާފައެވެ. ބޯޑަރުތައް ހުޅުވާލި ފަހުން މިވީ މުއްދަތުގެ ތެރޭގައި ރާއްޖެއަށް ބޭރުގެ އެކި ގައުމުތަކުން 41،571 މީހުން ދަތުރު ކޮށްފައިވާ އިރު، އޭގެ ތެރެއިން 31،801 މީހުންނަކީ ފަތުރުވެރިންނެވެ.
