މި ފަހުން ހިނގި މާރާމާރީތަކުގެ ފަހަތުގައި ވަނީ މަސްތުވާތަކެތީގެ މައްސަލަތައް: ހޯމް މިނިސްޓަރ
ފަހަތުގައި އުޅެނީ މަސްތުވާތަކެތީގެ މައްސަލަތަކާއި މަސްތުވާތަކެތި ޑީލްކުރުމުގައި ދިމާވެފައި ހުރި މައްސަލަތައް
ހޯމް މިނިސްޓަރ އައްޝެއިޚް އިމްރާން އަބްދުﷲ
މި ފާއިތުވެގެން ދިޔަ ހަފްތާއެއް ދެ ހަފްތާ ތެރޭގައި މާރާމާރީގެ ހަރަކާތްތަކެއް ގިނައިން ހިނގާ ކަން ފާހަގަކުރެވިފައިވާ ކަމަށާއި އެކަމުގެ ފަހަތުގައި ބޮޑަށް އުޅެނީ މަސްތުވާތަކެތީގެ މައްސަލަތައް ކަމަށް ގަބޫލު ކުރައްވާ ކަމަށް ހޯމް މިނިސްޓަރ އައްޝެއިޚް އިމްރާން އަބްދުﷲ ވިދާޅުވެއްޖެއެވެ.
ބުދަ ދުވަހުގެ ޖަލްސާގައި ހޯމް މިނިސްޓަރާއި ސުވާލުކުރުމަށް ހުޅުވާލި ފުރުސަތުގައި އިނގުރައިދޫ ދާއިރާގެ މެމްބަރ ހަސަން އަހުމަދު ވަނީ މި ފަހަކުން ލާއިންސާނީ އަނިޔާތައް އިތުުރުވަމުންދާ ކަމަށާއި އެކަމުގެ ފޮޓޯތަކާއި ވީޑިއޯތައް ފެންނަމުންދާ ކަމަށް ވިދާޅުވެފައެވެ. އަދި އައްޑޫ ސިޓީގައި ވެސް އަނިޔާވެރިކޮށް މީހަކަށް ހަމަލާދީފައިވާ ތަން ފެނިފައިވާ ކަމަށާއި އެކަން ކުރި މީހުން ހޯދިއްޖެތޯ އެއްސެވިއެވެ.
އެ ސުވާލަށް ޖަވާބު ދެއްވަމުން މިނިސްޓަރ ވިދާޅުވީ މާރާމާރީގެ ކަންކަން ތަންކޮޅެއް ގިނަވާން ފަށާފައިވާ ކަން ފާހަގަ ކުރެވިފައިވާ ކަމަށާއި އެކަމުގެ ފަހަތުގައި އުޅެނީ މަސްތުވާތަކެތީގެ މައްސަލަތަކާއި މަސްތުވާތަކެތި ޑީލް ކުރުމުގައި ދިމާވެފައި ހުރި މައްސަލަތައް ކަމަށެވެ. އަދި އެކަންކަން ބަލަމުންދާ ކަމަށް މިނިސްޓަރ ވިދާޅުވިއެވެ.
މަސްތުވާތަކެތީގެ މައްސަލަޔާއި ގުޅޭގޮތުން އެހެން މެމްބަރަކު ކުރެެއްވި ސުވާލަށް ޖަވާބު ދެއްވަމުން މިނިސްޓަރ ވިދާޅުވީ މި ސަރުކާރުން މަސްތުވާތަކެތީގެ ވަބާއިން މުޅި މުޖުތަމައު ސަލާމަތްކުރުމަށް ގިނަ މަސައްކަތްތަކެއް ކުރަމުންދާ ކަމަށެވެ.
އެގޮތުން ނޭޝަނަލް ޑްރަގް އެޖެންސީން އިސްނަގައިގެން ޚާއްސަ ޕްލޭނެއް މިހާރު އެކުލަވާލާފައިވާ ކަމަށާއި އެ ޕްލޭން ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހަށް ހުށަހެޅި އެ ޕްލޭނަށް ބަދަލުތަކެއް ގެނައުމަށް ފަހު ޕްލޭން އެޕްރޫވް ކޮށް ދެއްވާނެ ކަމަށް ވިދާޅުވެފައިވާ ކަމަށް މިނިސްޓަރ ވިދާޅުވިއެވެ.
އޭގެ އިތުރުން މިހާރު ނޭޝަނަލް ޑްރަގް ކޮންޓްރޯލް ސްޓްރެޓެޖީއެއް ހެދުމަށްޓަކައި މަސައްކަތްތަކެއް ކުރަމުންދާ ކަމަށް މިނިސްޓަރ ވިދާޅުވިއެވެ. އަދި މި ހުރިހާ ކަންތައްތަކެއް ގުޅިލާމެހިގެން ދާއިރު ރާއްޖޭގެ މަސްތުވާތަކެތީގެ މައްސަލައަށް ހައްލެއް އަންނާނެ ކަމަށް އުންމީދު ކުރައްވާ ކަމަށް މިނިސްޓަރ ވިދާޅުވިއެވެ. އަދި މި ސަރުކާރު އައި ފަހުން މިކަން ހައްލު ކުރުމަށް މުހިންމު ފިޔަވަޅުތަކެއް އެޅިފައިވާ ކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ މަސްތުވާތަކެތީގެ މައްސަލައަށް ހައްލު ގެނައުމަށް ކުރަމުންދާ މަސައްކަތުގައި ފުލުހުން ކުރަމުންދާ މަސައްކަތްތައް ކުރިޔަށް ވުރެ ޚަރުދަނާ ވެފައިވާ ކަމަށެވެ. އެހެން ނަމަވެސް މިވަބާ ފެތުރިފައިވާލެއް ބޮޑު ކަމުން މަގު މަތިން ފެންނަވަރުގެ ބަދަލުތަކެއް އަދި ނުފެނުނު ކަމުގައި ވިޔަސް ކުރިޔަށް އޮތް ތަނުގައި ގުޅިލާމެހިގެން ކުރެވިގެންދާ މަސައްކަތުން ބަދަލުތަކެއް ފެންނާނެ ކަމަށް ވިދާޅުވިއެވެ.
