ކުޅިވަރުގެ ޤާނޫނަށް އަމަލު ނުކުރެވޭ ކަމަށާއި ސަރުކާރުގެ ކުޅިވަރު ސިޔާސަތުތައް ހުރީ 1980 ގެ އަހަރުތަކުގައި ކުރީގެ ރައީސުލްޖުމްހޫރިއްޔާ މައުމޫން އަބްދުލްގައްޔޫމް ހިންގެވި ގޮތަށް ކަމަށް އެމްޑީޕީގެ ޗެއާޕާސަން އަދި ރައްޔިތުންގެ މަޖިލިހުގެ ހެންވޭރު ހުޅަނގު ދާއިރާގެ މެންބަރު ހަސަން ލަތީފް ވިދާޅުވުމުން، ކުޅިވަރާ ބެހޭ ވަޒީރު އަޙްމަދު މަޙްލޫފް ރައްދު ދެއްވައިފިއެވެ.
މިދިޔަ ހޯމަ ދުވަހު ރާއްޖެޓީވީން ގެނެސްދިން "ކުޅިވަރު ފައިލް" ޕްރޮގްރާމުގައި ވާހަކަ ދައްކަވަމުން ހަސަން ލަތީފް ވިދާޅުވީ ކުޅިވަރު ހިންގުމުގައި ނުރަނގަޅު ކަންތައްތަކެއް ހުރިއިރު، އެކަން ބެލޭނެ ގޮތެއްވެސް ނެތް ކަމަށެވެ. އެކަންކަމަށް ހައްލު ހޯދުމަށް މިދިޔަ އަހަރު ކުޅިވަރުގެ ޤާނޫނު އިސްލާހު ކުރުމަށް ސަރުކާރުން ވައުދުވި ކަމަށާއި، އެކަމަކު މި އަހަރު ނިމިގެންދާއިރުވެސް އެކަން ނުކުރެވިދާއިރު، ޤާނޫނުގައި ބުނާ ގިނަ ގަވާއިދުތައްވެސް ހެދިފައިނުވާ ކަމަށް ވިދާޅުވިއެވެ.
ކުޅިވަރުގެ ކަންކަން ހުރީ 1980 ގައި ސަރުކާރުގައި ކަންކަން ހުރި ހިސާބުގައި ކަމަށްވާއިރު، މިހާރު ފެންނަމުން ދަނީ ކުޅިވަރުގެ އިންތިޚާބުތަކާއި، ކުޅިވަރު ތެރޭގައި މަސައްކަތް ކުރައްވާ ބޭފުޅުން ސަރުކާރު ބޭނުންނުވާ ގޮތަށް މަސައްކަތް ކުރައްވައިފިނަމަ، އެ ބޭފުޅުންނާ ގުޅޭ ސަބަބު ދެއްކުމާ ނުލައި ފިޔަވަޅު އަޅަމުންދާތަން ކަމަށްވެސް ހަސަން ލަތީފް ވިދާޅުވިއެވެ.
އަދި ރާއްޖޭގައި ކުޅިވަރުގެ ކަމަކާ ގުޅިގެން ޝަކުވާއެއް އުފުލާނެ ތަނެއް ހޯދައި، ދެނެގަތުމަކީ އުނދަގޫ ކަމަކަށް ވެފައިވާ ކަމަށްވެސް ހަސަން ލަތީފް ވިދާޅުވިއެވެ.
ކުޅިވަރުގެ ކަންކަން އަދި މިހުރީ 1980 ގެ ތެރޭގައި ސަރުކާރުގައި ކަންހުރި ހިސާބުގައި. ރައީސް މައުމޫން އަބްދުލްގައްޔޫމް ސަރުކާރު ހިންގެވިއިރު ސަރުކާރުގެ ކަންކަން ހުރި މޭރުމުން ކުޅިވަރުގެ ކަންކަން ހިންގަވަމުން އެ ގެންދަވަނީ. ޝަކުވާއެއް އުފުލާނެ ތަނެއް، އެ ޝަކުވާއެއް އުފުލާނެ ތަނެއް ހޯދާ ދެނެގަތުންވެސް އުނދަގޫ ކަމަށްވެފައި ވަނީ. ދެނެގަނެގެން ޝަކުވާއެއް ލީމަ ދެން އެވާގޮތްވެސް. ބައްލަވާ 1980 ގެ ތެރޭގައި އިންތިޚާބުގައި ވާދަކުރައްވާ ފަރާތްތައް. ސަރުކާރުން ގަޔާނުވާ ގޮތަކަށް އިންތިޚާބެއްގައި ވާދަކުރައްވާ މީހަކު، އިންތިޚާބު ނިމުނީމަ އަދި ނިމުނީކީ ނޫން. އެމީހާ ފަހާ ދުވާނެ މިއީ ގައުމީ އިންތިޚާބުތަކުގައި ކަންކަން ހިނގާފައި ހުރިގޮތް. ހަމަ އެގޮތަށް ކުޅިވަރުގައި އެކަން ފެންނަމުން ދަނީ އޭރާ ތަފާތެއް ނެތް. މި ޤާނޫނުތައް އިސްލާހު ނުކޮށް ތިބީމަ އެކަން ކުރަން ފަސޭހަ ވެގެންދޭ އެގޮތަށް ކަންކަން ކުރަން.ހެންވޭރު ހުޅަނގު ދާއިރާގެ މަޖިލިސް މެންބަރު ހަސަން ލަތީފް
މި ވާހަކައަށް ރައްދު ދެއްވާ ވަޒީރު ކުރެއްވި ޓުވީޓެއްގައި ވިދާޅުވީ ފާއިތުވި ދެ އަހަރުގެ ތެރޭގައި ކުޅިވަރު ސިޔާސީ ނުކުރައްވާ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ވަނީ ރާއްޖޭގެ ކުޅިވަރަށް އިންގިލާބީ ބަދަލުތަކެއް ގެނެސްދެއްވާފައި ކަމަށެވެ. މީގެ ކުރިން އޮތްގޮތާ އަޅާބަލާއިރު، ހުރިހާ ކުޅިވަރަކުންވެސް އެތައް ކުރިއެރުންތަކަކާ ކާމިޔާބީތަކެއް ހޯދާފައިވާކަން އެތުލީޓުންވެސް އަދި ހުރިހާ ކުޅިވަރު އެސޯސިއޭޝަންތަކުންވެސް ގަބޫލުކުރާނެކަން ކަށަވަރުވާ ކަމަށް ވަޒީރު ވިދާޅުވިއެވެ.
ކުޅިވަރު އެސޯސިއޭޝަންތަކާއި ވަރަށް ގާތުން ވަޒީރު މަސައްކަތް ކުރައްވަމުން ގެންދަވާއިރު، ސަރުކާރު ހިންގާ އެމްޑީޕީގެ މަޖިލިސް މެންބަރުންނާއި ވަޒީރާ ދެމެދު ބަހުގެ ހޫނު ހަމަލާތަކެއް މީގެ ކުރިންވެސް ވަނީ ރައްދުކުރެވިފައެވެ. އެގޮތުން ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ އިންތިޚާބާ ގުޅިގެން އޭރު އެމްޑީޕީގެ ޕާރަލަމެންޓަރީ ގްރޫޕް ލީޑަރު އަދި މެދު ހެންވޭރު ދާއިރާގެ މެންބަރު ޢަލީ އާޒިމާއި ވަޒީރާ ދެމެދު ބަހުގެ ހަމަލާތައް ބަދަލު ކުރެވިގެންދިޔައެވެ. އެއަށްފަހު ޓޭބަލް ޓެނިސް އެސޯސިއޭޝަން އޮފް މޯލްޑިވްސްގެ އިންތިޚާބާ ގުޅިގެން ހަސަން ލަތީފާއި، ބައެއް މެންބަރުންގެ ނުރުހުންވެސް ވަޒީރަށް ވަނީ އަމާޒުވެފައެވެ.
އެހެން ނަމަވެސް ތަކުރާރުކޮށް ވަޒީރު ވަނީ ގައުމީ ކުޅިވަރު އެސޯސިއޭޝަނެއް ބައިނަލްއަގުވާމީ އިދާރާއަކުން ސަސްޕެންޑް ކުރާނެ ފަދަ ކަމެއް ނުކުރައްވާނެ ކަމަށާއި، އެމްޑީޕީގެ އެއްވެސް މެންބަރަކުވެސް އެމަނިކުފާނު މެދުވެރިކުރައްވާ އެސޯސިއޭޝަނެއްގެ އިންތިހާބު "ހިލާލެވޭނެ" ކަމަށް ގަބޫލުކޮށްގެން ނުވާނެ ކަމަށް ވިދާޅުވެފައެވެ.
އަޅުގަނޑު ނިސްބަތްވާ ޕާޓީ ނޫނީއްޔާ މި ކޯލިޝަނަށް ނިސްބަތްވާ ޕާޓީއެއްގެ މީހަކުވެސް ހީކޮށްގެން ނުވާނެ އަޅުގަނޑު މި މަގާމުގައި ހުރީތީ އިލެކްޝަނެއްގެ ތެރެއިން ގޯސްކޮން އައިސް މަގާމަކަށް އާދެވޭނެ ކަމަށް. އެ ޖާގައެއް ނުދޭނަން. އަޅުގަނޑުމެން ވެރިކަމަށް އައީ ވޯޓުންނޭ ކަން ކުރާނީ ކޯޓަކުން ނޫނޭ ކިޔާފައި. އެހެންވީމާ މިތަނުގައި އަޅުގަނޑު ހުރެގެން އިންތިޚާބެއް ހިލާލާކަށް ފުރުސަތެއް ނުދެވޭނެ. ގަދަ މީހާ އައިސް ވިން ކުރަންވީ. އިންތިޚާބެއްގައި ގަދަ ބަޔަކު ވޯޓު ގިނަ ބަޔަކަށް ހުރަސް އަޅައިގެން އެ މީހުންނަށް ނާދެވޭނެ ގޮތަކަށް ކަމެއް ކުރަން އުޅެނިއްޔާ އޭގެ ތެރެއަށް އަޅުގަނޑު ވަންނާނަން. އެކަމަކު މިހާރު ފެންނަނީ ނަންބަރު ނެތި އަޅުގަނޑު ވައްދައިގެން ކަންކަން ގޯސްކުރާތަން.ކުޅިވަރާ ބެހޭ ވަޒީރު އަޙްމަދު މަޙްލޫފް
ކުޅިވަރުގެ ކަންކަމުގައި ގޯސްކޮން ކަންކަން ކުރައްވާ ކަމަށް، އެމަނިކުފާނަށް އަމާޒުކޮށް އެފަދަ ވާހަކަތައް ދައްކަވަނީ ސީދާ އެމަނިކުފާނު ނިސްބަތްވާ މަޖިލިސް މެންބަރުން އެކަނި ކަމަށްވެސް މަޙްލޫފް ވަނީ ވިދާޅުވެފައެވެ.
ކުޅިވަރު އެސޯސިއޭޝަންތައް ސަސްޕެންޑް ނުކުރާނެ ކަމަށް ބަޔަކަށް ހީވާނަމަ އެއީ ވަރަށް ބޮޑު ގޯހެއް ކަމަށާއި، ނުފޫޒު ފޯރުވާ ކަންކަން ގޯސްކޮށް ކުރާނަމަ ބައިނަލްއަގުވާމީ އިދާރާތަކުން މަޑުން ނުތިބޭނެކަން ޔަގީން ކަމަށް ވަޒީރު ވިދާޅުވިއެވެ.
ކުޅިވަރުގެ 99 އިންސައްތަ އެސޯސިއޭޝަންތަކަށް ވަޒީރު މަސައްކަތް ކުރާ ގޮތް ރަނގަޅު ކަމަށާއި، އެކަން އެސޯސިއޭޝަންތަކުންވެސް ގަބޫލުކުރާ ކަމަށް މަޙްލޫފް ވިދާޅުވިއެވެ
