ބާސާ އާއި ޔުވެންޓަސްވެސް މޮޅުވެއްޖެ

ޔުއެފާ ޗެމްޕިއަންސް ލީގުގައި އަންގާރަ ދުވަހުގެރޭ ކުޅުނު މެޗުތަކުން ގްރޫޕް ޖީގައި ހިމެނޭ ބާސެލޯނާ އާއި ޔުވެންޓަސްވެސް މޮޅުވެއްޖެއެވެ.

ބާސާ މޮޅުވީ އަމިއްލަ ދަނޑުގައި ފެރެންސްވަރޯސް އަތުން ފަސޭހަކަމާއެކު 5-1 ގެ ނަތީޖާއަކުންނެވެ.

މި މެޗުގައި ބާސާއިން ރަނގަޅު ކުޅުމެއް ދެއްކިއިރު، މެޗުގެ 27 ވަނަ މިނެޓުގައި އެ ޓީމުން ވަނީ ލީޑު ނަގާފައެވެ. ޕެނަލްޓީއަކުން ބާސާއަށް ލީޑު ނަގައިދިނީ ކެޕްޓަން ލިއޮނެލް މެސީއެވެ. މިއީ އޭރިއާ ތެރެއިން މެސީއަށް ކުރި ފައުލަކަށް ރެފުރީ ދިން ޕެނަލްޓީއެކެވެ.

މެޗުގައި ބާސާއިން ލިޑު ފުޅާކޮށްފައިވަނީ ފުރަތަމަ ހާފު ނިމެން ތިން މިނެޓަށް ވެފައި ވަނިކޮށް އަންސޫ ފަޓީ ކާމިޔާބުކުރި ލަނޑުންނެވެ. އަދި ދެވަނަ ހާފު ފަށައިގެން ހަތްވަނަ މިނެޓުގައި ފިލިއްޕޭ ކުޓީނިއޯ ވަނީ ބާސާގެ ތިންވަނަ ލަނޑު ޖަހާފައެވެ.

މެޗުގެ 68 ވަނަ މިނެޓުގައި ރެފުރީ ވަނީ އޭރިއާ ތެރެއިން ބާސާގެ ޑިފެންޑަރު ޖެރާޑް ޕީކޭ ކުރި ފައުލަކަށް އޭނާއަށް ސީދާ ރަތް ކާޑެއް ދައްކާފައެވެ. އެއާއެކު ފެރެންސްވަރޯސްއަށް ޕެނަލްޓީއެއް ލިބުނުއިރު، މި ޕެނަލްޓީ އެޓީމަށް ކާމިޔާބުކޮށްދިނީ އިގޯ ޚަރާޓިނެވެ.

އެކަމަކު މެޗުގެ 82 ވަނަ މިނެޓުގައި ޕެޑްރީ ވަނީ ބާސާއަށް އަލުން ލީޑު ފުޅާކޮށްދީފައެވެ. މިއީ ބާސާގެ ޖާޒީގައި ޒުވާން މިޑްފީލްޑަރު ކާމިޔާބުކުރި ފުރަތަމަ ލަނޑެވެ. އަދި މެޗު ނިމެން މިނެޓަކަށް ވެފައި ވަނިކޮށް ބާސާގެ ފަސްވަނަ ލަނޑު ޖެހީ އޮސްމާނޭ ޑެމްބެލޭއެވެ.

މި ގްރޫޕުގައި ހިމެނޭ ޔުވެންޓަސް މޮޅުވީ އަންގާރަ ދުވަހުގެރޭ ޑީނަމޯ ކިއެވް އަތުން 2-0 ންނެވެ.

ކިއެވްގެ ދަނޑުގައި ކުޅުނު މި މެޗުގައި ކޮވިޑް-19 އަށް ޕޮޒިޓިވްވެފައިވާތީ ޔުވެންޓަސްގެ ތަރި ކްރިސްޓިއާނޯ ރޮނާލްޑޯ ކުޅެފައެއް ނުވެއެވެ. މި މެޗުގެ ފުރަތަމަ ހާފުގައި ލަނޑެއް ނުފެނުނު ނަމަވެސް، ދެވަނަ ހާފު ފަށައިގެން ފުރަތަމަ މިނެޓުގައި ޔުވެންޓަސްއިން ވަނީ ލީޑު ނަގާފައެވެ. ޑެޔާން ކުލުސެވްސްކީގެ އެހީއާއެކު ޔުވެންޓަސްއަށް ލީޑު ނަގައިދިނީ އަލްވާރޯ މޮރާޓާއެވެ.

މެޗުގައި ޔުވެންޓަސްއިން ލީޑު ފުޅާކޮށްފައިވަނީ މެޗު ނިމެން ހަ މިނެޓަށް ވެފައި ވަނިކޮށެވެ. ހުއާން ކުއަޑްރާޑޯގެ އެހީއާއެކު މި ލަނޑުވެސް ޔުވެންޓަސްއަށް ޖަހައިދިނީ މޮރާޓާއެވެ.

ޗެމްޕިއަންސް ލީގުގެ ގްރޫޕް ޖީގައި ކުޅުނު ފުރަތަމަ މެޗުތަކުން ބާސާ އާއި ޔުވެންޓަސްވެސް މޮޅުވިއިރު، މި މަހުގެ 29 ވަނަ ދުވަހު މި ދެ ޓީމު ބައްދަލުކުރާނެއެވެ. އެ މެޗު ކުޅޭނީ ޔުވެންޓަސްގެ ދަނޑުގައެވެ.