ގާސިމްގެ ބަންދަށް ކްރިމިނަލް ކޯޓުން 15 ދުވަސް ޖަހައިފި
21 އެޕްރީލު 2017 | ހުކުރު 17:41ގާސިމް ހައްޔަރުކޮށްފައުވަނީ ބުރާސްފަތި ދުވަހުގެ ރޭގައި
ގާސިމް އިބްރާހިމް
ޖުމްހޫރީ ޕާޓީގެ ލީޑަރު، އަދި މާމިގިލީ ދާއިރާގެ މެމްބަރު ގާސިމް އިބްރާހީމްގެ ބަންދަށް ކްރިމިނަލް ކޯޓުން 15 ދުވަސް ޖަހައިފިއެވެ.
ބުރާސްފަތި ދުވަހުގެ ރޭ ގާސިމް އިބްރާހިމް ހައްޔަރުކުރުމަށް ފަހު، ބަންދުގެ މުއްދަތު ޖެހުމަށް ދޫނިދޫން ކްރިމިނަލް ކޯޓަށް ގެންނެވީ ހުކުރު ދުވަހުގެ ހަވީރު 4:00 ގައެވެ.
ގާސިމް ހައްޔަރުކުރުކުރުން ޕްރޮސިކިއުޓަ ޖެނެރަލް މެދުވެރިކޮށް މިފަހަރު އަމުރު ފުލުހުން ހޯދިއިރު، ހުކުރު ދުވަހު ބޭއްވި މުއްދަތުގެ މަޖިލީހުގައި އިންނެވީ، ހައްޔަރުކުރުމުގެ އަމުރު ވެސް ދެއްވި އިސް ގާޒީ އަބްދުލް ބާރީ ޔޫސުފެވެ.
ގާސިމްގެ ގާނޫނީ ވަކީލުންގެ ޓީމުގައި ހިމެނިވަޑައިގަންނަވާ، ރައްޔިތުންގެ މަޖިލީހުގެ މައްޗަންގޮޅީ އުތުރު ދާއިރާގެ މެމްބަރު މާރިޔާ އަހްމަދު ދީދީ ވިދާޅުވީ، މުއްދަތުގެ މަޖިލީހުގައި ގާޒީ ބާރީ އިންނެވި މައްސަލަ ވަކީލުން ފާހަގަ ކުރެއްވި ކަމަށެވެ. ނަމަވެސް ވަކީލުންގެ އެއްވެސް ވާހަކައެއް އަޑު ނާއްސަވާ ގާޒީ އަމިއްލަ ފުޅަން ނިންމެވީ މުއްދަތު މަޖިލިސް ކުރިއަށް ގެންދިއުމަށް ކަމަށެވެ.
ހައްޔަރުކުރުމުގެ އަމުރު ދެއްވި ފަނޑިޔާރަކު، އަލުން އެ އަމުރުގެ މުއްދަތުގެ މައްޗަށް ބަންދުގެ މުއްދަތު އިތުރުކުރަން ނިންމެވުމަކީ މައްސަލައެއް ކަމަށް ވެސް މާރިޔާ ވިދާޅުވި އެވެ.
ގާސިމްގެ މުއްދަތު 15 ދުވަހަށް އިތުރުކުރަން ފުލުހުން ބޭނުންވަނީ ކީއްވެގެންތޯ ނޫސްވެރިން ސުވާލު ކުރެއްވުމުން މާރިޔާ ވިދާޅުވީ އެއަށް ވުރެ މުއްދަތު ކުޑަކުރަން ވަކީލުންގެ ޓީމުން ވަރަށް ދިފާއުގައި ވަރަށް ގިނަ ވާހަކަ ދެއްކެވި ކަމަށެވެ. ނަމަވެސް އެ ވާހަކަތަކަށް އިސް ގާޒީ ރިޔާއަތް ނުކުރެއްވި ކަމަށް މާރިޔާ ވިދާޅުވި އެވެ.
ބުރާސްފަތި ދުވަހުގެ ރޭ ގާސިމް ހައްޔަރުކުރީ ޕްރޮސެކިއުޓަ ޖެނެރަލް އައިޝަތު ބިޝާމް ކްރިމިނަލް ކޯޓުގައި އެދިވަޑައިގަތުމުންނެވެ. ހުކުރު ދުވަހުގެ ބޭއްވި ބަންދުގެ މުއްދަތު މަޖިލީހުގައި ވެސް ޕީޖީގެ ވަކީލުން ވިދާޅުވީ ފުލުހުން ބޭނުންވާ ގޮތަށް ގާސިމް ހައްޔަރުގައި ބެހެެއްޓުމަށް އެދިވަޑައިގަންނަވާ ކަމަށެވެ.
ގާސިމް ދޫނިދޫގައި ބަހައްޓަވާފައި ހުންނަވާ ގޮޅި ބަދަލުކުރަން ވެސް އެދިވަޑައިގެންނެވި ކަމަށާއި ނަމަވެސް ދޫނިދޫއަކީ ވަގުތުން ސިއްހީ ފަރުވާ ދެވޭނެ އިންތިޒާމު ހުރި ތަނެއް ކަމަށް ފުލުހުން ބުނިކަމުގައި މާރިޔާ ވިދާޅުވި އެވެ.
ރައްޔިތުންގެ މަޖިލީހުގެ މެމްބަރުންގެ އިމްތިޔާޒުގެ ގާނޫނާ ހިލާފަށް ކުރިން ފަހަރު ގާސިމް ހައްޔަރުކޮށް، ހަ ދުވަހު ޖަލްގައި ބޭއްވެވިއިރު، ޝަރީއަތްތައް ހިންގަމުން ދަނީ އެފަހަރުގެ ހައްޔަރުކުރުމުގެ މައްޗަށެވެ. އެ ފަހަރު ގާސިމް ދޫކޮށްލީ، އޭނާ ހައްޔަރުކޮށްފައިވަނީ ގާނޫނާ ހިލާފަށް ކަމަށް ކޯޓްގައި ޕީޖީގެ ވަކީލުން ވިދާޅުވުމުންނެވެ.
ގާސިމް ހައްޔަރުކުރަން ކްރިމިނަލް ކޯޓުގެ އިސް ގާޒީ ނެރުއްވި އަމުރުގައި ވަނީ ރައްޔިތުންގެ މަޖިލިހުގެ ރައީސާއި ނައިބު ރައީސްގެ އިތުބާރު ނެތްކަމަށް ހުށަހެޅޭނީ 42 މެމްބަރުންގެ ސޮޔާއެކު ކަމަށް މި މަހުގެ 10 ގައި ފާސްކުރުމާ ގުޅިގެން، މަޖިލިހުގެ ރައީސް އަބްދުﷲ މަސީހްގެ އިތުބާރު ނެތްކަމަށް ހުށަހެޅުމަށްޓަކައި 42 މެމްބަރުންގެ ސޮއި ހޯއްދެވުމަށް މެމްބަރުންނަށް ގާސިމް އެކި ގޮތްގޮތުން ނުފޫޒު ފޯރުވަމުންދާ ކަމަށެވެ. އަދި ސަލާމަތީ ބާރުތަކުގައި މަސައްކަތް ކުރާ ފަރާތްތަކާއި ފަނޑިޔާރުންނަށް ނުފޫޒު ފޯރުވަން މަސައްކަތް ކޮށް އަދި ރައްޔިތުންގެ މެދުގައި ފިތުނަ އާއި ބިރުވެރިކަން އުފެއްދުމަށް ގާސިމް މަސައްކަތް ކުރާ ކަމުގެ ތުހުމަތު ވެސް ކޯޓު އަމުރުގައި ކޮށްފައިވެ އެވެ.
ގާސިމް އިބްރާހިމް އިސްވެ ހުންނަވައިގެން މ. ކުނޫޒްގައި ސިލްސިލާކޮށް ބާއްވަމުންދާ ޖަލްސާތަކުގައި އެ ކަންކަމަށް ބާރު ލިބޭ ފަދަ މޭރުމަކުން ވާހަކަ ދައްކަމުން ދާތީ އާއި މި ކަންތައްތަކަކީ މިހާރު ތަހުގީގު ކުރަމުންދާ ކަންތައްތަކެއް ކަމަށް ވާތީ، ގާސިމް އިބްރާހިމް މުޖުތަމައު އަށް ދޫކޮށްފައި ބެހެއްޓުމަކީ މައްސަަލައިގެ ތަހުގީގަށް ބޮޑެތި ހުރަސްތަކެއް އެޅި އަދި މި ކަންކަމާ ގުޅޭ ގޮތުން ލިބެން ހުރި ހެކި ފޮރުވާ އަދި ހެކިބަސް ދޭން ތިބި ފަރާތްތަކަށް ނުފޫޒު ފޯރުވާ، އެ ހެކި ނައްތާލުމަށް ފުރުސަތު ތަނަވަސް ވެގެން ދާނެ ކަމެއް ކަމެއް ކަމަށާއި، އަދި ގާސިމް އިބްރާހިމް މުޖުތަމައު އަށް ދޫކޮށްފައި ބެހެއްޓުމަކީ މުޖުތަމައުގެ ސަލާމަތަށް ހުރި ނުރައްކަލެއް ކަމުގައި ފެނުމަކީ ވެސް އޭނާ ހައްޔަރު ކުރަންޖެހޭ ސަބަބެއް ކަމަށް ކޯޓް އަމުރުގައިވެ އެވެ.
ގާސިމް ހައްޔަރުކުރުން ގިނަ ބަޔަކު އަންނަނީ ކުށްވެރިކުރަމުންނެވެ.
ގާސިމް ކޯޓަށް ހާޒިރުކުރެއްވި ވަގުތު، އެ ސަރަހައްދުގައި ހުންނަވައި ކުރީގެ ރައީސް މައުމޫން އަބްދުލް ގައްޔޫމްގެ ދަރިކަލުން، ދިއްގަރު ދާއިރާގެ މެމްބަރު ފާރިސް މައުމޫނު ވިދާޅުވީ މަޖިލީހުގެ ގަވާއިދުގައި 42 މެމްބަރުންގެ ސޮއި ހޯދަން ޖެހޭނެ ކަމަށް ބުނެފައިވާއިރު، މަޖިލީހުގެ ރިޔާސަތުގެ އިތުބާރު ނެތްކަމަށް ހުށަހެޅުމަށް، ސޮއި ހޯދުމަކީ މަޖިލީހުގެ މެމްބަރުން ކުރައްވަންޖެހޭނެ ކަމެއް ކަމަށެވެ. އެއީ ކުށަކަށް ވެގެން ނުވާނެ ކަމަށް އޭނާ ވިދާޅުވި އެވެ.
މިފަހަރު ވެސް ގާސިމް ހައްޔަރީ، ކުރިން ވެސް ކޮށްފައިވާ ތުހްމަތުތަކުގެ މައްޗަށް ކަމަށްވާއިރު، ގާސިމް ދިރިއުޅޭ ގެއަށާއި އޭނާގެ އިމާރާތްތަކަށް ފުލުހުން ވަދެ، ބަލައި ފާސްކުރި ނަމަވެސް އެއްވެސް ހެއްކެއް ފެނިފައި ނެތް ކަމަށް އޭނާގެ ވަކީލުން ވަނީ ވިދާޅުވެފަ އެވެ.
