2022 ވަނަ އަހަރު ރާއްޖޭގައި ބޯހިމެނުމަށް ނިންމައިފި
20 އޮކްޓޯބަރު 2020 | އަންގާރަ 13:25އެންމެ ފަހުން ރާއްޖޭގައި ބޯހިމަނާފައި ވަނީ 2014 ވަނަ އަހަރު
ރާއްޖޭގެ އާބާދީއަކީ 557،426 މީހުންގެ ތެރެއިން 40.8 އާބާދީ ދިރިއުޅެނީ ވެރިކަން ކުރާ މާލޭގައި
2022 ވަނަ އަހަރު ރާއްޖޭގައި ބޯހިމެނުމަށް ނިންމައިފިއެވެ.
ބައިނަލްއަގުވާމީ ތަފާސްހިސާބު ދުވަހުގެ މުނާސަބަތުގައި ރާއްޖޭގެ ސްޓެޓިސްޓިކް ބިއުރޯއިން ބޭއްވި ހާއްސަ ޖަލްސާގައި ވާހަކަ ދައްކަވަމުން ޕްލޭނިން މިނިސްޓަރު މުހައްމަދު އަސްލަމް ވަނީ 2022 ވަނަ އަހަރު ރާއްޖޭގައި ބޯ ހިމަނަން ނިންމާފައިވާ ކަން ހާމަ ކުރައްވާފައެވެ.
މިނިސްޓަރ ވިދާޅުވީ 2022 ވަނަ އަހަރު ބޯހިމެނުމަށް ވާންޖެހޭ އެންމެހާ ތައްޔާރީތައް ވަމުން އަންނަ ކަމަށާ ބޯހިމެނުން ފުރިހަމަ ވާނީ ރާއްޖޭގެ އެންމެންގެ ވެސް ބައިވެރިވުމާ އެކުހައި ކަމަށް ވިދާޅުވެފައެވެ. އަދި އެކަމަށް އެއްބާރުލުން ދެއްވުމަށް ރައްޔިތުންގެ ކިބައިން ވަނީ އެދިވަޑައިގެންފައެވެ.
މިނިސްޓަރ އަސްލަމްގެ އިތުރުން ނެޝަނަލް ސްޓެޓިސްޓިކް ބިއުރޯއިން ވެސް ވަނީ ރައްޔިތުންގެ އެއްބާރުލުމަށް އެދިފައެވެ. އަންގާރަ ދުވަހު ބޭއްވި މި ރަސްމިއްޔާތުގައި "ކައުންޓް މީ އިން" ގެ ނަމުގައި ލަވައެއް ވެސް ވަނީ އާއްމު ކޮށްފައެވެ.
އެންމެ ފަހުން ރާއްޖޭގައި ބޯހިމަނާފައި ވަނީ 2014 ވަނަ އަހަރު އެވެ. އޭރުގެ ނަތީޖާއިން ދައްކާ ގޮތުގައި ރާއްޖޭގައި ދިރިއުޅޭ މީހުންގެ ޖުމްލަ އާބާދީ އަކީ 402،071 ނަމަވެސް ނޭޝަނަލް ބިޔުރޯ އޮފް ސްޓެޓިސްޓިކްސްގެ އެންމެ ފަހުގެ ހޯދުންތައް ދައްކާ ގޮތުން ރާއްޖޭގެ ޖުމްލަ އާބާދީއަކީ މިހާރު 557،426 މީހުންނެވެ.
މީގެ ތެރެއިން 40 އިންސައްތަ އާބާދީ މާލޭގައި ދިރިއުޅެމުން ދާއިރު، މާލެސިޓީގައި 227،486 މީހުންގެ އާބާދީއެއް އެބައޮތެވެ. މާލެ އޮންނަ ކ. އަތޮޅުގެ އާބާދީ ހިމަނައިފިނަމަ، އާބާދީގެ ދެބައިކުޅަ އެއްބައި މީހުން ދިރިއުޅެނީ މާލެ އާއި މާލެ ކައިރި ރަށްރަށުގައެވެ.
އަތޮޅުތެރޭގެ ރަށްތަކަށް ބަލާއިރު އެންމެ އާބާދީ ބޮޑީ އަދިވެސް އައްޑޫ ސިޓީގައެވެ. އެ ސިޓީގެ އާބާދީއަކީ 26,635 އެވެ. ދެވަނައަށް އެންމެ އާބާދީ ބޮޑީ ހދ. އަތޮޅުގައެވެ. އެ އަތޮޅުގައި 23،157 މީހުން ދިރިއުޅެމުން އަންނައިރު، އެންމެ ގިނަ ބަޔަކު ދިރިއުޅެމުން އަންނަނީ އުތުރުގައި އޮތް ހަމައެކަނި ސިޓީ ކަމުގައިވާ ކުޅުދުއްފުށީގައެވެ.
އައްޑޫ ސިޓީ (ސ. އަތޮޅު) އާއި ހދ. އަތޮޅު ނޫން އެހެން އަތޮޅުތަކަށް ބަލާއިރު، ތިން އަތޮޅެއްގައި 20،000 އިން މަތީގެ އާބާދީއެއް އޮވެއެވެ. އެއީ ބ. އަތޮޅު (21،145 މީހުން)، ރ. އަތޮޅު (20،297 މީޙުން) އަދި އދ. އަތޮޅު (20،248 މީހުން) އެވެ.
ނޭޝަނަލް ބިއުރޯ އޮފް ސްޓެޓިސްޓިކްސް ދައްކާ ގޮތުން ހއ. އަތޮޅުގައި 17،389، ނ. އަތޮޅުގައި 16،706، ށ. އަތޮޅުގައި 15358، ޅ. އަތޮޅުގައި 14،370، ގއ. އަތޮޅުގައި 14،616، ގދ.އަތޮޅުގައި 15،445، އއ. އަތޮޅުގައި 13،638، ތ. އަތޮޅުގައި 11،496، ދ. އަތޮޅުގައި 10،635، ޏ. އަތޮޅު (ފުވައްމުލައް ސިޓީ) 9،873، މ. އަތޮޅުގައި 6،747، ފ. އަތޮޅުގައި 5،941 އަދި ވ. އަތޮޅުގައި 2،688 މީހުންގެ އާބާދީއެވެ. އެންމެ ކުޑަ އާބާދީއެއް އޮތީ ވ. އަތޮޅުގައެވެ.
