ފާއިތުވި 24 ގަޑިއިރު ތެރޭގައި ރާއްޖެއިން ކޮވިޑް -19 އަށް ޕޮޒިޓިވް ވެފައިވަނީ އެންމެ 24 މީހުން ކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ބުނެފިއެވެ.

އެޗްޕީއޭއިން ހާމަކޮށްފައިވާ ގޮތުން ހޮނިހިރު ދުވަހު ޕޮޒިޓިވްވި ކޭސްތައް ފެނިފައިވަނީ ހަމައެކަނި މާލޭ ސަރަހައްދުންނެވެ. ޕޮޒިޓިވްވި މީހުންގެ ތެރޭގައި ހިމެނެނީ 20 ދިވެހިންނާއި ހަތަރު ބިދޭސީންނެވެ. އެއާއި އެކު ޕޮޒިޓިވްވި މީހުންގެ ޖުމްލަ އަަދަދު ވަނީ 11،178 އަށް އަރާފައެވެ.

ފާއިތުވި 24 ގަޑިއިރުގެ ތެރޭގައި ޓެސްޓް ކުރެވިފައިވާ ސާމްޕަލްގެ އަދަދަށް ބަލާއިރު، 1572 ސާމްޕަލް ވަނީ ޓެސްޓް ކޮށްފައެވެ. މި ވަގުތު އެކްޓިކް ކޭސްތަކުގެ އަދަދު 1038 އަށް ތިރިވެފައިވާ އިރު، ރިކަވަރވީ މީހުންގެ އަދަދުތައް ވަނީ 10،097 އަށް އަރާފައެވެ.

އައިސޮލޭޝަން ފެސިލިޓީތަކާއި ހޮސްޕިޓަލްތަކަށް ބަލާއިރު، އައިސޮލޭޝަން ފެސިލިޓީތަކުގައި ތިބި މީހުންގެ އަދަދަކީ 369 އެކެވެ. އަދި ހޮސްޕިޓަލުގައި އެޑްމިޓް ކޮށްގެން ފަރުވާ ދެމުން ދަނީ 43 މީހަކަށެވެ. ހޮނިހިރު ދުވަހުގެ ހެނދުނުގެ ވަގުތެއްގައި މި ބަލީގައި 67 އަހަރުގެ ދިވެހި ފިރިހެނަކު ނިޔާވެފައިވާ އިރު، ރާއްޖެއިން މި ބަލީގައި މަރުވީ މީހުންގެ އަދަދު ވަނީ 36 އިތުރުވެފައެވެ.

ޕޮޒިޓިވް ކޭސްތައް މަދުވަމުން ދިޔަނަމަވެސް ރައްކައުތެރިކަމުގެ ގޮތުން އަޅާފައިވާ ފިޔަވަޅު ތަކަށް ސަމާލުކަން ދިނުމަށް އެޗްޕީއޭއިން އިލްތިމާސް ކުރެއެވެ. އެގޮތުން އެޗްޕީއޭގެ ގައިޑްލައިންތަކާއި އެއްގޮތަށް އަމަލު ކުރުމަށާއި، ސާފުތާހިރު ކަމަށް ޚާއްސަ ސަލާމުކަމެއް ދިނުމަށް ވެސް ވަނީ އިލްތިމާސް ކޮށްފައެވެ.