ކުޅުދުއްފުށިން ރެންޑަމް 2 ސާމްޕަލް ޕޮޒިޓިވް

ކުޅުދުއްފުށި ސިޓީން ރެންޑަމް 2 ސާމްޕަލް ޕޮޒިޓިވްވެފައިވާ ކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ހާމަކޮށްފިއެވެ.

އެޗްޕީއޭ އިން ހުކުރު ދުވަހު ހާމަކުރި މައުލޫމާތަށް ބަލާ އިރު، ކުޅުދުއްފުށިން ހުކުރު ދުވަހު 4 މީހަކު ވަނީ ޕޮޒިޓިވްވެފައެވެ. މީގެ ތެރޭގައި ހިމެނެނީ ކޮންޓެކްޓުންގެ ގޮތުގައި ފާހަގަވި 2 މީހުންނާއި ރެންޑަމް 2 މީހުންނެވެ. ކުޅުދުއްފުށީގައި އެކްޓިވް ކޭސްގެ ގޮތުގައި 6 ކޭސްއެއް ހިމެނެއެވެ.

މިހާތަނަށް އެންމެ ގިނަ ކޭސްތައް ފެނުނު ލ. ކައްދޫ ކްލަސްޓަރގައި ހިމެނޭ ސިފައިންގެ ތެރެއިން 32 މީހަކު ވަނީ ބަލިން ރަނގަޅުވެފައެވެ. ކައްދޫގައި އެކްޓިވް ކޭސްގެ ގޮތުގައި މިހާރު ހުރީ 30 ކޭސްއެވެ. އެއީ ހޯމް ކަރަންޓީންގެ 2 މީހުންނާއި ކޮންޓެކްޓުންގެ ގޮތުގައި ހިމެނޭ 28 މީހުންނެވެ. މީގެ އިތުރުން ސ. ގަމުން ފެނުނު ކޭސްތަކުގެ ތެރޭގައި އެކްޓިވް ކޭސްގެ ގޮތުގައި ހިމެނެނީ 2 ކޭސްއެވެ.

ހުކުރު ދުވަހު އަތޮޅުތެރެއިން 77 މީހަކު ވަނީ ބަލިން ރަނގަޅުވެފައެވެ. މިއާއެކު އަތޮޅު ތެރޭގައި އެކްޓިވް ކޭސްގެ އަދަދު ވަނީ 69ށް ދަށްވެފައެވެ. މީގެ ތެރޭގައި ހިމެނެނީ 60 ދިވެހިންނާއި 9 ބިދޭސީންނެވެ. ހުކުރު ދުވަހު އިތުރު 2 ރަށަކުން ވަނީ ކޮވިޑްގެ ކޭސްތައް ފެނިފައެވެ. އެއީ ފުވައްމުލައް ސިޓީންނާއި ރ. ރަސްގެތީމުންނެވެ.

އަތޮޅު ތެރޭގެ ފެސިލިޓިގެ ތެރެއިން ގއ. ކޮވިޑް ފެސިލިޓީގައި 5 މީހަކަށް އަންނަނީ ފަރުވާ ދެމުންނެވެ. އެ އެންމެންނަށް ވެސް ފަރުވާ ދެމުން އަންނަނީ އެޑްމިޓް ކޮށްގެންނެވެ.