ލަންކާއަށް މަސް ބޭރުކުރުމަށް އެއްވެސް ހުރަހެއް ނެތް: ޝާހިދު
މިކަމާ ގުޅޭ ގޮތުން ސްރީލަންކާގެ ސަރުކާރުގެ އިސްވެރިންނާއި އެކު މަޝްވަރާ ކުރެވުނު
ލަންކާގެ ބޮޑު ވަޒީރު ރާޖަޕަކްސަ އާއި ފޮރިން މިނިސްޓަރ އަބްދުﷲ ޝާހިދު ސަލާމް ކުރައްވަނީ
ރާއްޖޭގެ މަސްވެރިން ބާނާ މަސް ލަންކާގެ ބާޒާރަށް އެކްސްޕޯޓު ކުރުމަށް އެއްވެސް ހުރަހެއް ނެތް ކަމަށް ފޮރިން މިނިސްޓަރ އަބްދުﷲ ޝާހިދު ވިދާޅުވެއްޖެއެވެ.
ހުކުރު ދުވަހުގެ ރޭ މިނިސްޓަރ ކުރެއްވި ޓުވީޓެއްގައި ވިދާޅުވީ މިކަމާ ގުޅޭ ގޮތުން ސްރީލަންކާގެ ސަރުކާރުގެ އިސްވެރިންނާއި އެކު މަޝްވަރާ ކުރެވުނު ކަމަށެވެ. އަދި މި މަޝްވަރާ ބައްދަލުވުމުގައި އެ ފަރާތްތަކުން ރާއްޖެއިން ލަންކާއަށް މަސް ބޭރުކުރުމަށް އެއްވެސް ހުރަހެއް ނެތް ކަމުގެ ޔަގީންކަން ދެއްވި ކަމަށެވެ.
ފޮރިން މިނިސްޓަރ ޝާހިދު އާއި އެކު މި ބައްދަލުވުމުގައި ބައިވެރިވެވަޑައިގެންނެވީ ސްރީލަންކާގެ ފޮރިން މިނިސްޓަރ ދިނޭޝް ގުނަވަރްދޭނާ އަދި އެ ގައުމުގެ ފިނޭންސް މިނިސްޓަރ ޑަގްލަސް ދެވަނަންދާ އަދި އެގައުމުގެ ފިނޭންސް މިނިސްޓްރީގެ ސްޓޭޓް މިނިސްޓަރ އަޖިތު ކަބްރާލްއެވެ.
ލަންކާއިން އެ ގައުމަށް އެހެން ގައުމުތަކުން މަސް އެތެރެކުރުން ހުއްޓާލަންޖެހޭ ކަމަށް އެގައުމުގެ ރައީސް ގޯޓަބަޔަ ރާޖަޕަކްސަ ވަނީ ވިދާޅުވެފައެވެ. ވެރިކަމާ ހަވާލުވެވަޑައިގެން ޕާލިމެންޓްގައި ބޭއްވި ފުރަތަމަ ބައްދަލުވުމުގައެވެ. އެ މަނިކުފާނު ވިދާޅުވީ މިއީ ސްރީލަންކާގެ ވިޔަފާރިތައް ހިމާޔަތްކޮށް އިގްތިޞާދު ރަނގަޅު ކުރުމަށް އެޅޭނެ ފިޔަވަޅެކެވެ.
މިހާރުވެސް ލަންކާގައި ވަނީ އެ ގައުމަށް އެތެރެކުރާ މުދާ ކޮންޓްރޯލްކޮށް، ދަނޑުވެރިންގެ ވިޔަފާރިތައް ހިމާޔަތްކު ރުމަށް ފިޔަވަޅުތައް އަޅާފައެވެ. އަދި އެ ގައުމަށް އެތެރެ ކުރާ މުދާ ބޭރުކުރުން ވެސް ވަނީ މަނާކޮށްފައެވެ.
