20 އަހަރަށްވުރެ ގިނަ ދުވަސްވީ އުޅަނދުތައް ނައްތާލަނީ
ނައްތާލެވޭނެ އުޅަނދުގެ ތެރޭގައި 100ށް ވުރެ ގިނަ ޓެކްސީ
ފުލުހުން ޓޯކޮށްފައިވާ އުޅަނދުތަކުގެ ތެރެއިން ނުގެންގޮސް ހުރި އުޅަނދުތަކެއް ނައްތާލަނީ
ރާއްޖެ އެތެރެކޮށް ދުއްވާ އުޅަނދުތަކުގެ ތެރެއިން 20 އަހަރަށްވުރެ ގިނަ ދުވަސްވެފައިވާ އުޅަނދުތައް ނައްތާލުމުގެ ޕްރޮޖެކްޓެއް ހިންގުމަށް ޓްރާންސްޕޯޓް މިނިސްޓްރީން ނިންމައިފިއެވެ.
އެއްގަމު އުޅަނދުފަހަރުގެ ތާޑު ޕާޓީ އިންޝުއަރެންސް ކުރަން ނުޖެހޭ ގޮތަށް ހެދުމުގެ އިތުރުން އުޅަނދުތައް ގަރާޖެއްގައި ރަޖިސްޓްރީ ކުރުން ލާޒިމު ނުވާ ގޮތަށް އެއްގަމު ދަތުރުފަތުރުގެ ގާނޫނަށް ހުށަހަޅާފައިވާ އިސްލާހުތަކާ ގުޅޭ ގޮތުން މަޝްވަރާ ކުރުމަށް ބުރާސްފަތި ދުވަހު ރައްޔިތުންގެ މަޖިލީހުގައި ބޭއްވި ގައުމީ ތަރައްގީ އާއި ތަރިކައިގެ ކޮމިޓީގައި ވާހަކަ ދައްކަވަމުން ޓްރާންސްޕޯޓް މިނިސްޓްރީގެ ޑެޕިއުޓީ މިނިސްޓަރ ޝިމާޒު އަލީ ވިދާޅުވީ 20 ނުވަތަ 30 އަހަރަށްވުރެ ގިނަ ދުވަސްވެފައި ހުރި ވެހިކަލް ނައްތާލުމުގެ ޕްރޮޖެކްޓެއް ފުލުހުންނާއި ގުޅިގެން އަންނަ އަހަރު ފެށުމަށް ރާވާފައިވާ ކަމަށެވެ.
އަދި މީގެ ތެރޭގައި 100ށް ވުރެ ގިނަ ޓެކްސީ އުމުރު ހަމަވެފައި އެބަހުރި ކަމަށާއި، މިކަމުގެ ސަބަބުން ޕާކްކުރުމުގެ މައްސަލައަށް ކޮންމެވެސް ވަރެއްގެ ހައްލެއް ލިބިގެންދާނެ ކަމަށެވެ. ނަމަވެސް މިއީ އާންމުނަށް ލިބޭ އާމްދަނީ އާއި ގުޅުން ހުރި ކަމެއް ކަމަށާއި، އެކަމާއި ގުޅިގެން ވެސް ކަމާއި ބެހޭ މިނިސްޓްރީތަކާއި މަޝްވަރާ ކުރަމުންދާ ކަމަށެވެ.
ކެރިން ކެޕޭސިޓީ އާއި ގުޅޭގޮތުން ހޯރަފުށީ ދާއިރާގެ މެންބަރު އަހުމަދު ސަލީމް ކުރެއްވި ސުވާލަކަށް ޖަވާބު ދެއްވަމުން ޝިމާޒު ވިދާޅުވީ ކެރިން ކެޕޭސިޓީ ކަނޑައަޅަން ގާނޫނުން ލާޒިމްކުރަނީ މީހުން ދިރިއުޅޭ ރަށެއް ވެއްޖެއްޔާ ކައުންސިލްތަކަށް އަދި އިންޑަސްޓްރިއަލް ސަރަހައްދެއް ވެއްޖެއްޔާ މިނިސްޓްރީއަށް ކަމަށެވެ.
މީގެ އިތުރުން މާލޭގައި މަލްޓި ސްޓޯރީ ބިލްޑިންގ ހެދިގެންދާ އިރު އެ ސަރަހައްދުތަކަށް ނިސްބަތްކޮށް ބެލުމަށްފަހު އަންނަ އަހަރު ވެހިކަލް އެތެރެކުރަން ކޮންމެވެސް ވަރެއްގެ ކޯޓާއެއް ލިބިގެންދާނެ ކަމަށާއި، މިހާރު އޮތްގޮތަށް ގަވާއިދަށް ބަދަލެއް ނުގެނެސް ކެރިން ކެޕޭސިޓީ ކަނޑައަޅައިފި ނަމަ އަންނަ އަހަރު އިތުރު ވެހިކަލްތަކެއް އެތެރެ ނުކުރެވޭނެ ކަމަށެވެ. އަދި އެތެރެކުރެވޭ ވެހިކަލްއެއް އެތެރެކުރުމުގެ ކުރިން އެ ވެހިކަލް އެތެރެކުރާ ފަރާތަކަށް ކާރު ރަޖިސްޓްރީ ކުރެވޭނެކަން އެނގިގެން ދިއުމަކީ ވެސް ކެޕޭސިޓީއަށްވުރެ އިތުރަށް އުޅަނދު ގެންނަ މައްސަލަ އަށް ލިބިގެންދާނެ ހައްލެއް ކަމަށެވެ.
ޝިމާޒު ވިދާޅުވީ އެ ގަވާއިދު ގެޒެޓް ކުރުމާއެކީގައި އެކަމަށް ހައްލެއް ލިބިގެންދާނެ ކަމަށެވެ. އަދި ކެރިން ކެޕޭސިޓީގެ ވާހަކަ ދައްކާ އިރު މާލޭއަށް އެތެރެކޮށްފައި ހުރި ވެހިކަލްތަކުގެ އަދަދަށް ބަލާ އިރު 4 ފުރޮޅުލީ 7000 ވެހިކަލް އެބައޮތް ކަމަށާއި، އެއީ ކާރާއި ޖިޕާއި ޕިކަޕާއި ލޮރީއާ އެކު ކަމަށެވެ. އަދި މާލޭގެ މަގުތަކުގެ އޭރިއާއަށް ބަލާ އިރު ކެރިން ކެޕޭސިޓީ ކަނޑައަޅާފައިވާނަމަ އަންނަ އަހަރު ވެސް ވެހިކަލް އެތެރެ ނުކުރެވޭނެ ކަމަށެވެ.
