ގެސްޓް ހައުސްތައް ހުޅުވުން ލަސްވީ އެކަމަށް ފުރިހަމައަށް ތައްޔާރުވުމަށް: އެޗްއީއޯސީ
15 އޮކްޓޯބަރު 2020 | ބުރާސްފަތި 05:02ގައިޑްލައިންގައިވާ ގޮތަށް އެންމެން އަމަލުކުރާނަމަ އިގްތިސާދީ އެއްވެސް ހަރަކާތެއް ނުހުއްޓޭނެ
ކާސާ ގެސްޓް ހައުސް؛ މިއަދުން ފެށިގެން ހާއްސަ ގައިޑްލައިނަކާއެކު ރަށްރަށުގައި ގެސްޓްހައުސް އަލުން ވަނީ ހުޅުވާފައި
ގެސްޓް ހައުސްތައް ހުޅުވަން އޮތް މުއްދަތަށްވުރެ ލަހުން ހުޅުވުނީ އެކަމަށް ވާންޖެހޭ ފުރިހަމަ ތައްޔާރީތަކަށްފަހު މަސައްކަތް ފަށައި ގަތުމަށް ކަމަށް ހެލްތް އެމަރޖެންސީ އޮޕަރޭޝަން ސެންޓަރ (އެޗްއީއޯސީ) އިން ބުނެފިއެވެ.
ގެސްޓް ހައުސްތައް ބުދަ ދުވަހު ރަސްމީކޮށް ހުޅުވުމާއި ގުޅޭގޮތުން ވާހަކަ ދައްކަވަމުން، އެޗްއީއޯސީގެ ފަތުރުވެރިކަމުގެ ކަންކަމާއި ގުޅޭ ބައިގެ އިސްކޮށް ހުންނަވާ ހަސަން މުހައްމަދު ވިދާޅުވީ ގެސްޓް ހައުސްތައް ހުޅުވުމަށްޓަކައި ހަދާފައިވާ އުސޫލުތައް އަދި ގައިޑްލައިންތަކަކީ މިކަމާއި ގުޅުން ހުރި އިދާރާތަކުގައި މަޝްވަރާ ކުރެވިގެން އެއްކޮށް ނިންމާލެވިފައިވާ އުސޫލުތަކެއް ކަމަށެވެ. އަދި މި ގައިޑްލައިންގައި ހުރި ކަންތައްތަކަކީ ޑްރާފްޓް ކުރުމުގެ މަރުހަލާގައި އެކިއެކި ފަރާތްތަކާއި މަޝްވަރާ ކުރެވިގެން އިސްލާހުތައް ގެނެވިފައިވާ ކަންކަން ކަމަށެވެ.
ހަސަން ވިދާޅުވީ ރައްކާތެރިކަމުގެ ފިޔަވަޅުތަކާއެކު ވެސް ރަށްރަށަށް ގެސްޓުން ދިޔަ ނަމަވެސް އެހިސާބުން އެ މީހުންނަށް ހިދުމަތްދޭ ފަރާތްތަކުން އަމަލު ކުރަންވީ މުހިންމު ކަންތައްތަކެއް ހިމެނޭ ކަމަށެވެ. އަދި އިލްތިމާސް އަކީ ގައިޑްލައިންގައި ހުރި ކަންތައްތަކަށް އަހުލުވެރިވެ އޭގައި ހުރި ކަންތައްތަކާއި އެއްގޮތަށްތޯ ތައްޔާރުވެ މަސައްކަތް ކުރުން ކަމުގައި އޭނާ ވިދާޅުވިއެވެ.
ހަސަން ވިދާޅުވީ ގައިޑްލައިނާ އެއްގޮތަށް ކަންކަން ކުރެވޭނެނަމަ އިގްތިސާދީ ހަރަކާތްތައް ހުއްޓާލަން ޖެހޭ ހިސާބަށް ނުދާނެ ކަމަށެވެ. އަދި ރިސޯޓްތަކުގެ ތަޖުރިބާ އަކީ ވެސް ގައިޑްލައިނާ އެއްގޮތަށް ކަންކަން ކުރިއަށް ގެންދިއުމުން ރަނގަޅަށް އެކަންވުން ކަމަށާއި، ރިސޯޓްތަކުގައި ފަތުރުވެރިންގެ ކޭސްތައް މަދު އަދި އައުޓްބްރޭކެއް ނެތް ކަމަށެވެ. އަދި ރަށްރަށުގައި ވެސް ގައިޑްލައިނާ އެއްގޮތަށް ކަންކަންދާނަމަ، ކަންކަން ރަނގަޅުވާނެ ކަމަށެވެ.
