19 ރަށެއްގައި 152 ކޭސް

ރާއްޖޭގެ 19 ރަށެއްގައި މިވަގުތު 152 މީހުން ކޮވިޑަށް ޕޮޒިޓިވްވެފައިވާ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ހާމަކޮށްފިއެވެ.

އެޗްޕީއޭގެ އެންމެ ފަހުގެ މައުލޫމާތުތައް ދައްކާ ގޮތުން އަތޮޅު ތެރެއިން ޕޮޒިޓިވްވެފައިވާ 152 މީހުންގެ ތެރެއިން 93 މީހުންނަކީ ދިވެހިންނެވެ. އަދި 59 މީހުންނަކީ ބިދޭސީންނެވެ.

Advertisement

އަތޮޅުތެރޭގެ ރަށްތަކުގެ ތެރެއިން އެންމެ ގިނަ އަދަދަކަށް މިވަގުތު އެކްޓިވް ކޭސްތައް ހުރީ ލ. ކައްދޫގައިއެވެ. އެއީ 62 ދިވެހިންނެވެ. ކައްދޫ އިން ޕޮޒިޓިވްވި މީހުންގެ ތެރެއިން 34 މީހުންނަކީ ފުރަބަންދުގައި ތިބި މީހުންނެވެ. އަދި 28 މީހުންނަކީ ކޮންޓެކްޓުންނެވެ.

މީގެ އިތުރުން ސ. ގަމުން 55 ބިދޭސީއަކު ޕޮޒިޓިވްވެފައިވާ އިރު، މީގެތެރެއިން 54 މީހުންނަކީ ފުރަބަންދުގައި ތިބި މީހުންނެވެ. އަދި އެކަކަކީ ކޮންޓެކްޓެކެވެ.

ގދ. ތިނަދޫ އިން ފުރަބަންދުގައި ހުރި ތިން މީހަކު ޕޮޒިޓިވްވެފައިވާ އިރު، ގއ. ކޮލަމާފުށިން ޕޮޒިޓިވްވެފައި ވަނީ ފުރަބަންދުގައި ހުރި އެންމެ މީހެކެވެ. އެއަތޮޅު ކަނޑުހުޅުދޫ އިންވެސް ޕޮޒިޓިވްވެފައި ވަނީ ފުރަބަންދުގައި ހުރި މީހެކެވެ. ލ. ގަމުން ފުރަބަންދުގައި ހުރި ތިން މީހުން ވަނީ ކޮވިޑް-19 އަށް ޕޮޒިޓިވެފައެވެ.

ހއ. ކެލާ، ހދ. ހަނިމާދޫ، ރ، އުނގޫފާރު، ބ. އޭދަފުށި، ޅ. ނައިފަރު، އއ. ތޮއްޑޫ އަދި ފ. ނިލަންދޫ އިން ޕޮޒިޓިވް އެކްޓިވް ކޭސްގެ ގޮތުގައި މިވަގުތު ހުރީ ފުރަބަންދުގައި ހުރި މީހެކެވެ. ހދ. ކުރިނބީގައި މިވަގުތު އެކްޓިވް ކޭސްއެއްގެ ގޮތުގައި ހުރީ ސިމްޕްޓޮމެޓިކް ވެގެން ޓެސްޓްކޮށް ޕޮޒިޓިވްވި މީހެކެވެ.

ރ. ވާދޫ އިން ފުރަބަންދުގައި ހުރި ހަތަރު މީހަކު ޕޮޒިޓިވްވެފައިވާ އިރު، ހއ. ހޯރަފުށިން ޕޮޒިޓިވްވެފައި ވަނީ ފުރަބަންދުގައި ހުރި ދެ މީހެކެވެ. އަދި ހއ. ދިއްދޫ އިން ޕޮޒިޓިވްވެފައި ވަނީ ފުރަބަންދުގައި ހުރި މީހަކާއި ހަތަރު ކޮންޓެކްޓުންނެވެ. ހދ. ކުޅުދުއްފުށިން ޕޮޒިޓިވްވެފައި ވަނީ ފުރަބަންދުގައި ހުރި ދެ މީހަކާއި، ތިން ކޮންޓެކްޓުންގެ އިތުރުން، ސިމްޕްޓޮމެޓިކްވެގެން ޓެސްޓު ކުރި ދެ މީހެކެވެ.

އަތޮޅު ތެރޭގައި ކޮވިޑް-19 އަށް ފަރުވާދިނުމަށް ގާއިމްކޮށްފައިވާ ފެސިލިޓީތަކުގެ ތެރެއިން މިވަގުތު މީހުންނަށް ފަރުވާދެމުންދަނީ ގއ. ވިލިނގިލި ކޮވިޑް ފެސިލިޓީގައި އެކަނިއެވެ. އެއީ ފަސް މީހުންނަށެވެ.