130 ކިލޯގެ މަސްތުވާތަކެތީގެ މައްސަލާގައި އިސްކޮށް ހުރި ޝަހީބަކީ ޕީއެންސީގެ ކައުންސިލް މެމްބަރެއް!
14 އޮކްޓޯބަރު 2020 | ބުދަ 07:3419 ވަނަ ރައްޔިތުން މަޖިލިސްގެ އިންތިޚާބުގައި ޝަހީބުވަނީ ވިލިނގިލީ ދާއިރާއިން ވާދަކޮށްފައިވޭ
ޝަހީބު އިބްރާހިމާއި ޕީޕީއެމްގެ ލީޑަރޝިޕްގެ ބޭފުޅުން
ކަނޑުމަގުން ރާއްޖެއަށް އެތެރެ ކުރި 130 ކިލޯގެ މަސްތުވާތަކެތީގެ މައްސަލާގައި އިސްކޮށް ހުރި މީހެއް ކަމަށް ފުލުހުން ތުހުމަތު ކޮށްފައިވާ ޝަހީބު އިބްރާހިމް އަކީ ޕީއެންސީގެ ކައުންސިލް މެމްބަރެއްކަން ހާމަވެއްޖެއެވެ.
ފުލުހުން ވަނީ ބުދަ ދުވަހު މިޑްރަގު ނެޓްވޯކުގެ އިސް މީހުން ކަމަށް ތުހުމަތު ކުރެވޭ މީހުންގެ ވަނަވަރު ހާމަކޮށްފައެވެ. އެގޮތުން މި މައްސަލާގައި ޕީއެންސީގެ އިސްބޭފުޅުންނަށް ގުޅާލުމުން ފޯނު ނުނަންގަވާތީ އިތުރު މައުލޫމާތު ލިބޭ ގޮތް ވަނީ ނުވެފައެވެ.
ފުލުހުން ބުނެފައިވަނީ މިތަކެތި ރާއްޖެއަށް އެތެރެ ކުރުމުގައި އިސްކޮށް ހުރި ފަރާތްތަކަކީ ގއ. ވިލިނގިލި/ލައިޓްހައުސް، ޝަހީބް އިބްރާހިމް (42އ) އާއި ހއ. ހޯރަފުށި/ ވައިލެޓްވިލާ، އަހްމަދު މޫސާ (48އ) އެވެ.
މީގެ ތެރޭގައި ހިމެނޭ ޝަހީބަކީ ކުރީގެ ރައީސް އަބްދުﷲ ޔާމީންގެ ވެރިކަމުގެ އެކި މިނިސްޓްރީތަކުގެ މަތީ މަގާމުތައް ވެސް ފުރުއްވާފައިވާ ބޭފުޅެކެވެ. އަދި އޭނާއަކީ 19 ވަނަ ރައްޔިތުން މަޖިލިސްގެ އިންތިޚާބުގައި ވެސް ގއ. ވިލިނގިލީ ދާއިރާއަށް ވާދަކޮށްފައިވާ ކެންޑިޑޭޓެކެވެ.
ޝަހީބަށް މަސްތުވާތަކެތީގެ ގިނަ ތުހުމަތުތައް ކުރެވޭއިރު، 2019 ވަނަ އަހަރުގެ ނޮވެމްބަރު މަހުގެ ތެރޭގައި ރާއްޖެއަށް މަސްތުވާތަކެތި އެތެރެކުރާކަމަށް ތުހުމަތުކުރެވޭ މައްސަލައަކާ ގުޅިގެން ރާއްޖޭގެ ކަނޑުގެ ސަރަހައްދު ތެރެއިން ފުލުހުންގެ ބެލުމުގެ ދަށަށް ގެނައި އިރާން ބޯޓުގެ މައްސަލައާ ވެސް އޭނާ ގުޅުން އޮތް ކަމަށް ފުލުހުން ބުނެއެވެ. އަދި ރާއްޖެއަށް މަސްތުވާތަކެތި އެތެރެކުރަން އުޅުނު ކަމުގެ ތުހުމަތުގައި ހިފެހެއްޓި އިރާން ބޯޓުން ހައްޔަރުކުރި 7 މީހުންނާއި ޖާމިނު ވެފައިވަނީ ޝަހީބެވެ. އަދި އެމައްސަލާގައި ޝަހީބާއި އީރާން 7 މީހުން ކްރިމިނަލް ކޯޓުން ވަނީ ބަންދުން ދޫކޮށްލާފައެވެ.
