ވެންޓިލޭޓަރު މައްސަލައިގައި ދައުވާ ކޮށްދިނުމަށް އެދި އޭސީސީން ޕީޖީ އޮފީހަށް ފޮނުވައިފި
ހެލްތް މިނިސްޓްރީގެ އިސް އޮފިޝަލުންގެ މައްޗަށް ތުހުމަތު ކުރެވޭ
މިނިވަން މުއައްސަސާތަކުގެ ކޮމިޓީގައި އޭސީސީގެ ރައީސް މަރިޔަމް ޝިއުނާ - ވެންޓިލޭޓަރު މައްސަލައިގައި ހެލްތް މިނިސްޓްރީގެ އިސް އޮފިޝަލުންތަކެއްގެ މައްޗަށް ތުހުމަތު ކުރެވޭ
ވެންޓިލޭޓަރުތައް ގަތުމުގައި ބޮޑެތި އޮޅުވާލުންތަކެއް ހިންގާފައިވާ ކަމަށް ބުނެ ހެލްތް މިނިސްޓްރީގެ އިސްވެރިންތަކެއްގެ މައްޗަށް ކުރެވޭ ތުހުމަތާ ގުޅޭ ކޮރަޕްޝަނުގެ މައްސަލަތަކެއްގެ ތަހުގީގު އެންޓި ކޮރަޕްޝަން ކޮމިޝަން (އޭސީސީ) އިން ނިންމައި، ދައުވާކުރަން ފޮނުވައިފިއެވެ.
އޭސީސީން މި މައްސަލައިގައި ދައުވާކުރަން ޕްރޮސެކިއުޓަރ ޖެނެރަލް (ޕީޖީ) އޮފީހަށް ފޮނުވާފައިވަނީ ބުދަ ދުވަހުގެ ވަގުތެއްގައެވެ. އެގޮތުން މި މައްސަލައިގައި ހޯމަ ދުވަހުގެ ނިޔަލަށް ދައުވާ ކުރުމާމެދު ގޮތެއް ނިންމުމަށް މަސައްކަތް ކުރަމުންދާކަމަށް ޕީޖީ އޮފީހުން މައުލޫމާތުދެއެވެ.
އެކަމާ ގުޅޭގޮތުން ރާއްޖެއެމްވީއަށް މައުލޫމާތު ދެއްވަމުން ޕީޖީ އޮފީހުގެ މީޑިއާ އޮފިޝަލު ވިދާޅުވީ، މި މައްސަލަ ޑިއުޓީ ޕްރޮސެކިއުޝަނަށް ތާވަލު ކުރާނީ ބުރާސްފަތި ދުވަހު ކަމަށާއި، މައްސަލައިގައި އޭސީސީން ދައުވާކޮށްދިނުން އެދި ފޮނުވާފައިވާ މީހުންގެ ތަފްސީލުތައް ހާމަ ކުރެވޭނީ ޑިއުޓީ ޕްރޮސެކިއުޝަނަށް ފަހު ކަމަށެވެ.
ވެންޓިލޭޓަރުތަކުގެ މައްސަލާގައި ހެލްތް މިނިސްޓަރު އަބްދުﷲ އަމީންގެ އިތުރުން، ހެލްތް މިނިސްޓްރީގެ ޑެޕިއުޓީ މިނިސްޓަރު އަދި ބިޑް ކޮމެޓީގެ ޗެއާރ ނިޝާމާ މުހައްމަދުގެ މައްޗަށް ތުހުމަތު ކުރެވިފައިވެއެވެ. އަދި ޑައިރެކްޓަރ ފައިނޭންޝަލް އެގްޒެކެޓިވް އަހުމަދު އަސްލަމް އާއި ހެލްތް މިނިސްޓްރީ ބިޑް ކޮމެޓީގެ މެމްބަރުންނާއި އެމިނިސްޓްރީގެ ބައެއް އިސްވެރިންގެ މައްޗަށްވެސް މި މައްސަލައިގައި ތުހުމަތު ކުރެވެއެވެ.
ތަޙުޤީޤަށް އަސަރުކޮށްފާނެ ފަދަ މަޢުލޫމާތު ނުހިމަނައި، މައްސަލާގައި ފާހަގަކުރެވުނު މައިގަނޑު ކަންކަން ހިމެނޭގޮތަށް އޭސީސީން މީގެ ކުރިން ވަނީ ޚުލާޞާ ރިޕޯޓެއް އެކުލަވާލައި 21 މޭ 2020 ގައި ރިޕޯޓު އާންމުކޮށްފައެވެ.
12 ސޮފްހާގެ މައްޗަށް ތައްޔާރުކޮށް އޭރު އޭސީސީން އާންމުކުރި ރިޕޯޓްގައި ބުނީ، މާލިއްޔަތު ގަވާއިދާ އެއްގޮތަށް ޑޮކިއުމެންޓްތަކާއި އުސޫލުތައް ފުރިހަމަކޮށްގެން ކަންތައްތައް ކުރުމުގައި ދަތިތަކެއް ދިމާވަމުން މަސައްކަތްތަކަށް ލަސްތަކެއްވަމުންދާ ކަމަށް ބަޔާންކޮށް، މެޝިނަރީޒްއާ އިކުއިޕްމެންޓުގެ އަގު 2.5 މިލިއަން ރުފިޔާއަށްވުރެ ބޮޑުވާތީ ހޯދަން ޖެހޭ ޑޮކިއުމެން ހުށައަޅަން ނުޖެހޭ ގޮތަށް ހެލްތުގެ ޓެންޑަ ކޮމިޓީން ނިންމާފައިވާ ކަމަށެވެ. އަދި ކުރިއަށް ގެންދިއުމުގެ ހާއްސަ ހުއްދައަކަށް ހެލްތުން އެދުމުން، އެކަމަށް ހާއްސަ ބަޖެޓެއް ހަމަޖައްސައި އެ ބަޖެޓްގެ ތެރެއިން ސީދާ އެ ޚަރަދު ކުރާގޮތަށް ހެލްތުގެ ބިޑް ކޮމިޓީ މެދުވެރިކޮށް އެފަދަ މަސައްކަތާއި ތަކެތި ހޯދުމުގެ މަސައްކަތް ކުރިއަށް ގެންދިއުމަށް ހާއްސަ ހުއްދައެއް ދީފައިވާ ކަމަށް ފާހަގަކުރެެވޭ ކަމަށެވެ.
އޭސީސީގެ ރިޕޯޓް ނިންމާލަމުން ހުލާސާ ގައި ބުނެފައިވަނީ، ކަނޑައަޅާފައި ހުންނަ އުސޫލުތަކުގެ ބޭރުން، ހާއްސަ ހުއްދަދެވޭ ދެވުމަކީ، ދައުލަތުގެ ޕްރޮކިއުމަންޓުގެ ނިޒާމުގެ މައިގަނޑު މަޤްސަދުތައް ހާސިލުކުރުމަށް ހުރަސްއެޅޭ އަދި ހިރާސް އިތުރުވާނެ ކަމެއްކަން ފާހަގަކުރެވޭ ކަމަށެވެ. އަދި އެފަދަ އަމަލުތަކުގެ ސަބަބުން ދައުލަތުގެ ޕްރޮކިއުމަންޓުގެ ނިޒާމަށް އާންމުން ކުރާ އިތުބާރު ކުޑަވެ، ޝައްކު ކުރުމުގެ ޖާގަ އުފެދުމުގެ އިހުތިމާލު ނުހަނު ބޮޑުވެގެން ދާނެކަމަށެވެ. އެހެން ކަމުން އެ މައްސަލަ އިތުރަށް ތަހުގީގު ކުރަމުންދާ ކަމަށް ރިޕޯޓު ނިންމާލަމުން އޭސީސީން އޭރު ވަނީ ބުނެފަ އެވެ.
ކޮވިޑް-19ގެ ބަލި މީހުންނަށް ފަރުވާދޭން ރާއްޖެއަށް ބޭނުންވާ ވެންޓިލޭޓަރުތައް ހޯދުމުގައި ދުނިޔޭގެ ސިއްހަތު ޖަމިއްޔާ، ޑަބްލިއުއެޗްއޯއާ އެކުގައި ކުރެވިފައިވާ މުއަލާމަތުތަަކަކީ ސައްހަ މައުލޫމާތުކަމަށް ގަބޫލުކުރައްވާކަމަށް ވިދާޅުވެ، އޮޑިޓް ރިޕޯޓަށް ހެލްތް މިނިސްޓަރު އަބްދުﷲ އަމީން ވަނީ މީގެ ކުރިން ރައްދު ދެއްވާފައެވެ.
އަމީން ވިދާޅުވެފައިވަނީ، ވެންޓިލޭޓަރުތައް ގެންނަން ޑަބްލިޔުއެޗްއޯގެ އެހީތެރިކަމަށް އެދުމުން ރާއްޖޭގައި ހުންނަ ޑަބްލިޔުއެޗްއޯގެ ރެޕްރެޒެންޓޭޓިވް ވަނީ މެދުއިރުމަތިން ވެންޓިލޭޓަރު ސަޕްލައި ކޮށްދޭ ކުންފުންޏެއްގެ މައުލޫމާތު ހިއްސާކޮށްފައި ކަމަށެވެ. ނަމަވެސް ވެންޓިލޭޓަރު ހޯދަން ޑަބްލިޔުއެޗްއޯއާ ރަސްމީ އެއްވެސް ސިފައެއްގައި ލިޔެކިޔުންތަކެއް ބަދަލު ކުރެވިފައި ނުވާ ކަމަށާއި، އެ ކުންފުންޏަކީ ޑަބްލިޔުއެޗްއޯ ރިކޮމެންޑް ކޮށްފައިވާ ކުންފުންޏެއް ނޫން ކަމަށް އޮޑިޓް ރިޕޯޓުގައި ބުނެއެވެެ. އެކަމަކު އަމީން ވިދާޅުވި ގޮތުގައި ރަސްމީގޮތުން މުއާމަލާތެއް ޑަބްލިޔުއެޗްއޯއާ ނުކުރެވޭ ކަމަށް ބުނުމުގެ ޖާގައެއް ނެތް ކަމަށެވެ.
މިނިސްޓަރު އަމީން ވިދާޅުވެފައި ވަނީ، ކޮވިޑް-19ގެ ހާލަތާއި ގުޅިގެން މިނިސްޓްރީގެ މުވައްޒަފުން މަސައްކަތް ކޮށްފައިވާނީ އިހްލާސްތެރިކަމާއި އެކީ ރައްޔިތުންގެ ފުރާނަ ސަލާމަތް ކުރުމަށްޓަކައި ހަވާލުކުރެވުނު މަސްއޫލިއްޔަތުގެ ތެރެއިން ކަމަށެވެ.
ބިޑް ކޮމިޓީގެ ޗެއަރ ނިޝާމާ މުހައްމަދު ވިދާޅުވީ، ވެންޓިލޭޓަރުތައް ގެންނަން ދުބާއީގެ ކުންފުންޏަށް ހަވާލުކޮށްފައިވަނީ އެ ކުންފުނީގެ ފަންނީ އަދި ގާބިލުކަމަށް ބެލުމަށްފަހު ކަމަށެވެ. ވެންޓިލޭޓަރުގެ މައްސަލާގައި އަމަލުކޮށްފައިވަނީ ހެޔޮ ނިޔަތުގައި ކަމަށް ނިޝާމާ ވިދާޅުވާ ވިދާޅުވުން އޭނާ ވަނީ ތަކުރާރު ކުރައްވާފައެވެ.
އޮޑިޓަރ ޖެނެރަލްގެ އޮފީހުން އާންމު ކޮށްފައިވާ ހެލްތް މިނިސްޓްރީ ކޮވިޑް-19 ކޮމްޕްލަޔަންސް އޮޑިޓްގައި ބޮޑެތި މަކަރާއި ހީލަތުން ކޮރަޕްޝަނަށް ތުހުމަތުވާ ގޮތަށް އެތައް މިލިއަން ރުފިޔާއެއް ހަރަދުކޮށްފައިވާ މައްސަލަ ތަކެއް ފެންމަތިވެފައިވާއިރު، މި އޮޑިޓް ރިޕޯޓު ނެރުމާއި ގުޅިގެން މި މައްސަލާގައި އޭސީސީން ނެރެފައިވާ ރިޕޯޓާއި އަދި އޭސީސީން މިނިވަން މުއައްސަސާތަކުގެ ކޮމެޓީއަށް ހާޒިރުވެ ދެއްކި ވާހަކަތަކާއި ދިމާ ނުވާކަން ވަނީ ހާމަވެފައެވެ. މި މައްސަލަ ބަލައި ދިނުމަށް އެދި މަޖިލީހުގެ ރައީސް މުހައްމަދު ނަޝީދު މަޖިލީހުގެ މިނިވަން މުއައްސަސާތަކާ ބެހޭ ކޮމިޓީއަށް ފޮނުވުމުން ބުދަ ދުވަހު އޭސީސީ މަޖިލީހަށް ހާޒިރު ކުރުމަށް އޭރު ނިންމާފައިވެއެވެ.
