މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) ގެ ހިޔާނާތާ ގުޅޭ 70،000 އެސްއެމްއެސް، ރައްޔިތުންގެ މަޖިލީހާއި ހިއްސާކޮށްފައިވާ ކަމަށް މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެއެވެ.
ރައީސް ނަޝީދު މިހެން ވިދާޅުވީ ނުހައްގު މުއްސަނދިކަން ހޯދުމަކީ ކުށެއްގެ ގޮތުގައި ކަނޑައެޅުމަށް ދިވެހިރާއްޖޭގެ ޤާނޫނުލްޢުޤޫބާތަށް އިސްލާޙު ގެނައުމުގެ ބިލަށް ކުރެވުނު ބަހުސްގައި، ތަހުގީގީ އިދާރާތަކަށް ކޮރަޕްޝަންގެ މައްސަލަތައް ތަހުގީގު ނުކުރެވެނީ ނުހައްގު މުއްސަނދިކަން ކުށެއްގެ ގޮތުގައި ކަނޑަނޭޅިގެން ނޫން ކަމަށް ވިދާޅުވެ އެ އިދާރާތަކުގެ މަސައްކަތްތަކަށް މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ ފާޑުވިދާޅުވެ ވާހަކަދެއްކެވެމުންނެވެ.
ރައީސް ނަޝީދު ވިދާޅުވީ ކޮރަޕްޝަންގެ މައްސަލައަކަށް އަމިއްލައަށް އިއުތިރާފްވެ، ބޭންކު އެކައުންޓުތަކުން އެކަން ހާމަވާއިރު، ތަހުގީގު ކޮޅެއްގައި ނުޖެހެންވީ އެއްވެސް ސަބަބެއް އެނގިނުލައްވާ ކަމަށެވެ. އެމްއެމްޕީއާރުސީ މައްސަލައަށް އަލިއަޅުއްވާލައްވާ އެމަނިކުފާނު ވަނީ، އެ މައްސަލައިގައި ތުހުމަތު ކުރެވޭ މީހުން ސާފުކޮށް އެނގޭއިރުވެސް ތަހުގީގީ އިދާރާތަކުން އެފަރާތްތަކުގެ މައްޗަށް ދައުވާ ނުއުފުލަނީ ކީއްވެގެންތޯ ސުވާލު އުފައްދަވާފައެވެ.
އެންޓި ކޮރަޕްޝަން ކޮމިޝަން އާއި ގުޅިގެން ތި ފާހަގަކުރެއްވި ނުކުތާތަކުގައި އަޅުގަނޑަށް އިތުރަށް ދެންނެވެން އޮތް މައުލޫމާތަކީ 444 ރުފިޔާ އަޅުގަނޑުގެ މައްޗަށް ބޮޑު ތަހުގީގެއް ހިންގަވާ އެ ފައިސާ ޖުރިމަނާގެ ގޮތުގައި އަޅުގަނޑު ދައްކައިފިން. ދެން ކަނޑައެޅިގެން އެމީހާގެ އަމިއްލަ އިއުތިރާފުންނާއި އަދި އެމީހާގެ އަމިއްލަ ބޭންކު އެކައުންޓުންނާއި އަދި ވަށައިގެން ތިބި އެންމެން ގޮވަމުންދާ އެމްއެމްޕީއާރުސީގެ މައްސަލަ ނުވޭ. ވަރަށް ރަނގަޅަށް ތިވިދާޅުވަނީ އަޅުގަނޑަކަށްވެސް އެއްގޮތަކަށް ވެސް ވިސްނައިގަންނަން ނޭނގޭ މިންވަރަށް އޮޅިފައި މިހާރު މިހުރީ އެމްއެމްޕީއާރުސީގެ މައްސަލަގައި ތުހުމަތު ކުރެވޭ މީހުން ސާފުކޮށް އެނގޭއިރުގައި އެކަމާ ގުޅިގެން އެންޓި ކޮރަޕްޝަން ކޮމިޝަނުންވެސް އަދި ފުލުސް އޮފީހުންވެސް ޕްރޮސެކިއުޓަރ ޖެނެރަލްވެސް އެއްވެސް ދައުވާއެއް ނުއުފުލާ ތިއްބަވާ ސަބަބެއް އެއީ އަޅުގަނޑުވެސް ވަރަށް ބޮޑަށް ހުއްޓުން އަރާ ކަމެއް.ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު
މީގެ އިތުރުން ރައީސް ނަޝީދު ވިދާޅުވީ ހެންވޭރު އުތުރު ދާއިރާގެ މެމްބަރު އިބްރާހިމް މުއިއްޒުގެ ކަންބޮޑުވުމަކާއި ގުޅިގެން އެމްއެމްޕީއާރުސީގެ މައްސަލައިގައި ޝާމިލުވާ، ކުރީގެ ނައިބު ރައީސް އަހުމަދު އަދީބާއި އޭނާގެ އަރިސް ބޭފުޅުންގެ 70،000 މެސެޖުތައް މަޖިލީހާއި ހިއްސާކުރެއްވި ކަމަށެވެ. އަދި އެ މެސެޖުތަކުގައި ހުރި ވާހަކަތަކާއި އަދީބު އިއުތިރާފްވެވަޑައިގެން ދެއްކެވި ވާހަކަތަކާއި ވެސް ގުޅުމެއް ވާކަމަށް ރައީސް ނަޝީދު ވިދާޅުވިއެވެ.
މަޖިލީހަށް 70،000 ޓެކްސްޓު، ފޯނުގެ ޓެކްސްޓް، އެސްއެމްއެސް. އެއީ ކުރީގެ ނައިބު ރައީސްގެ ފޯނާއި އަދި ކުރީގެ ނައިބު ރައީސްގެ ގާތް އެކި އެކި ބޭފުޅުންނަށް ކުރައްވާފައިވާ ޓެކްސްޓުތައް. އަދި ހަމައެއާއިއެކީގައި ނައިބު ރައީސް އަމިއްލަފުޅަށް އެ ބޭފުޅާ އިއުތިރާފް ވެވަޑައިގެންނެވިއިރުގައި އެތައް އެތައް ވާހަކައެއް ކިޔާދެއްވައިފި.ރައްޔިތުންގެ މަޖިލީހުގެ ރައީސް މުހައްމަދު ނަޝީދު
ރައީސް ނަަޝީދު ވަނީ މީގެން އެއް މެސެޖުގައި ހުރި ވާހަކަތައް ޖަލްސާގައި ހިއްސާ ކުރައްވާފައެވެ.
އެމްއެމްޕީއާރުސީގެ ވައްކަމުގެ ހުނަރުވެރިކަން. އޭގެ ކުޅަދާނަކަން ނުވަތަ އޯޝަން 11 މިންވަރު، އޯޝަން މިންވަރު ދެނެގަނެފިއްޔާ އަޅުގަނޑަށް ހަނދާންވާ އެއް ޓެކްސްޓެއްގައި އޮވޭ، 'އެދެނީ ފައިސާ ގޯންޏެއް ގެންގޮސް ގެއަކަށް ލާ ދިނުމަށް އެއް ޓެކްސްޓުން. ދެން ޖަވާބުގައި ވިދާޅުވަނީ އެ އެދޭ ގޯނި ގެންދަން ހުރި ކެރިއަރު ޖަވާބުގައި ވިދާޅުވަނީ މިހާރު އަސުރަށް ގޮވަނިއްޔޭ. އަސުރަށް އަރާލާފައި މި ދަނިއްޔޭ. ތި ގޯނި ހިފައިގެން ގޮސް އެ ގެއަކަށް ގޯނި ލާން. ދެން އަޅުގަނޑު ހިތައް އެރީ الحمد لله އޭ އަސުރަށް އަރާ ކަމާ މިކަންކަން އަރާ ކަން އެނގޭ ކަމީ ވަރަށް ބޮޑު ނަސީބެއްތާއޭ މި ހުރިހާ ކަމެއް ހިނގަމުންދާއިރު.ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު
ނަޝީދު ވިދާޅުވީ މި މައްސަލަައިގެ ހަގީގަތް އެނގުމަށް ތަހުގީގީ މާހިރަކަށް ވާން ނުޖެހޭ ކަމަށެވެ. އަދި އެމަނިކުފާނު ވަނީ ސާފުކޮށް ފެންނަން އޮތް ކަމެއްގެ ތަހުގީގު އަދިވެސް ކޮޅެއްގައި ނުޖެހޭތީ ކަންބޮޑުވުން ފާހަގަކުރައްވާފައެވެ.
އެމްއެމްޕީއާރްސީ ބޮޑު ހިޔާނާތުގެ މައްސަލައިގައި މިހާތަނަށް ހުކުމެއް ކޮށްފައިވަނީ ކުރީގެ ރައީސް އަބްދުﷲ ޔާމީން އާއި ކުރީގެ ނައިބު ރައީސް އަހުމަދު އަދީބަށް އެކަންޏެވެ. ނަމަވެސް މި ހިޔާނާތުގައި ދައުލަތުގެ މުއައްސަސާތަކުގެ ވެރިންނާއި، މަޖިލިސް މެމްބަރުންނާއި ފަނޑިޔާރުންގެ ބައިވެރިވުން އޮތް ކަމަށް ވަނީ ހާމަކޮށްފައެވެ.
