އެމްއެމްޕީއާރުސީ ޚިޔާނާތާ ގުޅޭ 70،000 އެސްއެމްއެސް ރައީސް ނަޝީދު މަޖިލިހާ ހިއްސާކުރައްވައިފި
މެސެޖުގައި ހުރި ވާހަކަތައް ޖަލްސާގައި ހިއްސާ ކުރެއްވި
އެމްއެމްޕީއާރްސީ ހިޔާނާތް ހިންގާފައިވަނީ ރައީސް ޔާމީންގެ ވެރިކަމުގެ ދައުރުގެ ތެރޭގައި
މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) ގެ ހިޔާނާތާ ގުޅޭ 70،000 އެސްއެމްއެސް، ރައްޔިތުންގެ މަޖިލީހާއި ހިއްސާކޮށްފައިވާ ކަމަށް މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެއެވެ.
ރައީސް ނަޝީދު މިހެން ވިދާޅުވީ ނުހައްގު މުއްސަނދިކަން ހޯދުމަކީ ކުށެއްގެ ގޮތުގައި ކަނޑައެޅުމަށް ދިވެހިރާއްޖޭގެ ޤާނޫނުލްޢުޤޫބާތަށް އިސްލާޙު ގެނައުމުގެ ބިލަށް ކުރެވުނު ބަހުސްގައި، ތަހުގީގީ އިދާރާތަކަށް ކޮރަޕްޝަންގެ މައްސަލަތައް ތަހުގީގު ނުކުރެވެނީ ނުހައްގު މުއްސަނދިކަން ކުށެއްގެ ގޮތުގައި ކަނޑަނޭޅިގެން ނޫން ކަމަށް ވިދާޅުވެ އެ އިދާރާތަކުގެ މަސައްކަތްތަކަށް މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ ފާޑުވިދާޅުވެ ވާހަކަދެއްކެވެމުންނެވެ.
ރައީސް ނަޝީދު ވިދާޅުވީ ކޮރަޕްޝަންގެ މައްސަލައަކަށް އަމިއްލައަށް އިއުތިރާފްވެ، ބޭންކު އެކައުންޓުތަކުން އެކަން ހާމަވާއިރު، ތަހުގީގު ކޮޅެއްގައި ނުޖެހެންވީ އެއްވެސް ސަބަބެއް އެނގިނުލައްވާ ކަމަށެވެ. އެމްއެމްޕީއާރުސީ މައްސަލައަށް އަލިއަޅުއްވާލައްވާ އެމަނިކުފާނު ވަނީ، އެ މައްސަލައިގައި ތުހުމަތު ކުރެވޭ މީހުން ސާފުކޮށް އެނގޭއިރުވެސް ތަހުގީގީ އިދާރާތަކުން އެފަރާތްތަކުގެ މައްޗަށް ދައުވާ ނުއުފުލަނީ ކީއްވެގެންތޯ ސުވާލު އުފައްދަވާފައެވެ.
މީގެ އިތުރުން ރައީސް ނަޝީދު ވިދާޅުވީ ހެންވޭރު އުތުރު ދާއިރާގެ މެމްބަރު އިބްރާހިމް މުއިއްޒުގެ ކަންބޮޑުވުމަކާއި ގުޅިގެން އެމްއެމްޕީއާރުސީގެ މައްސަލައިގައި ޝާމިލުވާ، ކުރީގެ ނައިބު ރައީސް އަހުމަދު އަދީބާއި އޭނާގެ އަރިސް ބޭފުޅުންގެ 70،000 މެސެޖުތައް މަޖިލީހާއި ހިއްސާކުރެއްވި ކަމަށެވެ. އަދި އެ މެސެޖުތަކުގައި ހުރި ވާހަކަތަކާއި އަދީބު އިއުތިރާފްވެވަޑައިގެން ދެއްކެވި ވާހަކަތަކާއި ވެސް ގުޅުމެއް ވާކަމަށް ރައީސް ނަޝީދު ވިދާޅުވިއެވެ.
ރައީސް ނަަޝީދު ވަނީ މީގެން އެއް މެސެޖުގައި ހުރި ވާހަކަތައް ޖަލްސާގައި ހިއްސާ ކުރައްވާފައެވެ.
ނަޝީދު ވިދާޅުވީ މި މައްސަލަައިގެ ހަގީގަތް އެނގުމަށް ތަހުގީގީ މާހިރަކަށް ވާން ނުޖެހޭ ކަމަށެވެ. އަދި އެމަނިކުފާނު ވަނީ ސާފުކޮށް ފެންނަން އޮތް ކަމެއްގެ ތަހުގީގު އަދިވެސް ކޮޅެއްގައި ނުޖެހޭތީ ކަންބޮޑުވުން ފާހަގަކުރައްވާފައެވެ.
އެމްއެމްޕީއާރްސީ ބޮޑު ހިޔާނާތުގެ މައްސަލައިގައި މިހާތަނަށް ހުކުމެއް ކޮށްފައިވަނީ ކުރީގެ ރައީސް އަބްދުﷲ ޔާމީން އާއި ކުރީގެ ނައިބު ރައީސް އަހުމަދު އަދީބަށް އެކަންޏެވެ. ނަމަވެސް މި ހިޔާނާތުގައި ދައުލަތުގެ މުއައްސަސާތަކުގެ ވެރިންނާއި، މަޖިލިސް މެމްބަރުންނާއި ފަނޑިޔާރުންގެ ބައިވެރިވުން އޮތް ކަމަށް ވަނީ ހާމަކޮށްފައެވެ.
