ޓެސްޓް ކިޓްތަކެއްގައި މައްސަލަ ޖެހިގެން އެކަން ދަނީ ބަލަމުން: އެޗްއީއޯސީ
އެއީ ގުދަން ކުރުމުގައި ދިމާވި މައްސަލައެއްކަމަށް ވިދާޅުވި
އެޗްއީއޯސީގެ ތަރުޖަމާނު ޑރ. ނަޒްލާ ރަފީޤް
ޓެސްޓް ކިޓްތަކެއްގައި މައްސަލަޖެހިގެން އެކަން ބަލަމުންދާ ކަމަށް ހެލްތް އިމަޖެންސީ އޮޕަރޭޝަން ސެންޓަރ (އެޗްއީއޯސީ) އިން ބުނެފިއެވެ.
ހޯމަ ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި އެޗްއީއޯސީގެ ތަރުޖަމާނު ޑރ. ނަޒްލާ ރަފީޤް ވިދާޅުވީ މިވަގުތު ހުރި ޓެސްޓް ކިޓްތަކުގެ ތެރެއިން އެެއް ޓެސްޓް ކިޓްގެ ބެޗަކުން ފުރިހަމަ ނަތީޖާ ނުނިކުންނަކަން ފާހަގަ ކުރެވިފައިވާ ކަމަށެވެ.
އަދި އެކަން ބެލި ބެލުމުން އެއީ ގުދަން ކުރުމުގައި ދިމާވި މައްސަލައަކުން ފާހަގަ ކުރެވުނު ކަމެއްކަން އެނގިފައިވާ ކަމަށެވެ.
އެކަމުގައި އިތުރަށް ބަލަންޖެހޭ ކަންކަން ބަލައި ޒިންމާދާރު ކުރުވަންޖެހޭ ފަރާތެއް ހުރިތޯ ބެލުމުގެ ކަންތައްތައް އެ އޮންނަ އުސޫލްގެ ތެރެއިން ކުރިއަށްދާ ކަަމަށް ނަޒްލާ ވިދާޅުވިއެވެ.
އަދި ފިޔަވަޅު އަަޅަންޖެހޭ ފަރާތެއްވާނަމަ އެ ފަރާތަކާއިމެދު ފިޔަވަޅު އަޅާނެކަމަށް އޭނާ ވިދާޅުވިއެވެ.
ނަޒްލާ ވިދާޅުވީ ކިޓްތަކުގައި މައްސަލަ ދިމާވެފައިވަނީ އިންޓާރނަލް ކޮންޓްރޯލްގައި ކަމަށާއި އެ ކިޓްތައް ބޭނުން ކޮށްގެން ހެދި ޓެސްޓްތަކުގެ ތެރެއިން ސުވާލު އުފެދޭ އެއްވެސް ނަތީޖާއެއް ރިޕޯޓްކޮށްފައި ނުވާނެ ކަމަށެވެ.
މި މައްސަލަ ދިމާވި ބެޗްގެ 3000 ޓެސްޓް ކިޓް ބާކީ އެބަހުރި ކަމަށާއި އެފަދަ ކަމެއް ތަކުރާރުވިޔަ ނުދިނުމަށް ފިޔަވަޅުތަކެއް އެޅިފައިވާކަން ޑރ. ނަޒްލާ ފާހަގަ ކުރެއްވިއެވެ. އަދި ގުދަން ކުރުމުގެ ސޭފްޓީ މެކޭނިޒަމް އިތުރަށް ވަރުގަދަ ކުރެވިފައި ކަމަށް އޭނާ ވިދާޅުވިއެވެ.
އެގޮތުން އެސްޓީއޯއާއި އެކު އެއްބަސް ވުމެއްގެ ދަށުން، ގެންނަ ކިޓް ތަކުގެ ތެރެއިން ޚާއްސަކޮށް މައިނަސް ފްރީޒިން ޓެމްޕަރޭޗަރ ގައި ބަހައްޓަންޖެހޭ ތަކެތި އެސްޓީއޯގެ ކޯލްޑް ސްޓޯރޭޖްގައި ބެހެއްޓުމަށް އެއްބަސްވެވި، ރައްކައުތެރިކޮށް ގުދަން ކުރެވިފައިވާ ކަމަށެވެ.
ނަޒްލާ ވިދާޅުވީ އެސްޓީއޯއިން ގެނެސްފައި ހުރި 40،000 ރިއެކްޝަންސް މިވަގުތު ވެސް އެބަހުރި ކަމަށާއި އެކިޓްތައް 20 އަކަށް ދުވަހަށް ބޭނުން ކުރެވޭނެ ކަމަށެވެ.
އަދި ކުރިއަށް އޮތް ތިން މަހުގެ ސަޕްލައި ވެސް މިހާރު ވަނީ އެޝުއަރ ކުރެވިފައި ކަމަށެވެ. މީގެ އިތުރުން އޭޑީބީ ޕްރޮޖެކްޓުން އަންނަ 50،000 ރިއެކްޝަން ކުރިއަށް އޮތް ދެ ހަފްތާ ތެރޭގައި އަންނާނެ ކަމަށް ނަޒްލާ ވިދާޅުވިއެވެ.
