ކަނޑުއޮތްގިރީގައި މަސް ބަންދު ކުރުމުގެ ހިދުމަތް ދިނުމަށް 4 ފަރާތަކުން ޝައުގުވެރިކަން ފާޅުކޮށްފައިވޭ: މިފްކޯ
12 އޮކްޓޯބަރު 2020 | ހޯމަ 19:09ހިދުމަތް އަލުން ހުޅުވާލީ ސިނާއަތް ފުޅާކުރުމުގެ ގޮތުން
ކަނޑުއޮތް ގިރި ގައި ބޮޑުކަންނެއްޔާއި ފަރުމަސް ބަންދު ކުރެވޭނެ
މިފްކޯގެ ޕްރެސެސިން ޕްލާންޓު، ''ކަނޑުއޮތްގިރީ ފިޝްވިލެޖް'' ގައި މަސް ބަންދުކޮށް ދިނުމުގެ ހިދުމަތް އަލުން ފައްޓަން ތައްޔާރުވަމުންދާއިރު 4 ފަރާތަކުން ޝައުގުވެރިކަން ފާޅުކޮށްފައިވާ ކަމަށް މިފްކޯއިން ބުނެފި އެވެ.
ރާއްޖެޓީވީގެ ފަލަ ސުރުޙީ ޕްރޮގްރާމްގައި ވާހަކަދައްކަވަމުން މިފްކޯގެ މެނޭޖިން ޑިރެކްޓަރު، އިސްމާއިލް ފައުޒީ ވިދާޅުވީ ކަނޑުއޮތްގިރި އިން އާއްމު ފަރާތްތަކަށް ދެމުންއައި މަސް ބަންދު ކޮށްދިނުމުގެ ހިދުމަތް އަލުން ހުޅުވާލުމުގެ މަގްސަދަކީ، މަސްވެރިކަމުގެ ސިނާޢަތް ފުޅާކުރުމަށް ސަރުކާރުން ގެންގުޅޭ ސިޔާސަތުގެ ދަށުން ބޮޑުކަންނެލީގެ އިތުރުން ފަރުމަހުގެ ބާވަތްތައް ވެސް ބަންދުކޮށް ރާއްޖެއިން ބޭރު ކުރެވޭ މަހުގެ ބާވަތްތައް އިތުރު ކުރުން ކަމަށެވެ.
އަދި އެކްސްޕޯޓް ކުރުމުގައި އާއްމުންގެ ބައިވެރިވުން އިތުރު ކުރުމުގެ މަގްސަދުގައި ކަމަށް ފައުޒީ ވިދާޅުވި އެވެ.
ކަނޑުއޮތްގިރި ގައި ބޮޑުކަންނެއްޔާއި ފަރުމަސް ބަންދު ކުރަން އެދޭ ފަރާތްތަކާއި އެކީ މި މަސައްކަތް ކުރިއަށް އޮތް ހަފްތާއެއް ދުވަހުގެ ތެރޭގައި ފެށިގެންދާނެ ކަމަށް ވެސް ފައުޒީ ވިދާޅުވި އެވެ.
އެ ކުންފުނިން ބުނީ، އެކްސްޕޯޓް ކުރެވޭ ތާޒާ މަހުގެ ބާވަތްތައް އިތުރުވެގެން ދިޔުމުން، ރާއްޖެ އަށް އެތެރެވާ ބޭރު ފައިސާގެ މިންވަރު އިތުރުވެގެން ދިޔުމުގެ މަގު ތަނަވަސް ވެގެންދާނެ ކަމަށެވެ.
