ދަނޑުވެރި ކަމަށް ދޫކޮށްފައިވާ ރަށްތަކުގައި ދީފައިވާ މުއްދަތުގައި މަސައްކަތް ނުކުރާނަމަ އެ ރަށްތައް އަނބުރާ ނެގޭނެ: މިނިސްޓަރ
މަސައްކަތްނުކޮށް ހުރި ރަށްރަށުގައި ވަކި ބާވަތްތަކެއް ހެއްދުމަށް އެއް އަހަރުގެ މުއްދަތެއް ވަނީ ދީފައި
ރާއްޖޭގެ ރަށެއްގައި ހައްދަމުން އަންނަ ދަނޑެއް
ދަނޑުވެރިކަން ކުރުމަށް ދޫކޮށްފައިވާ ރަށްތަކުގައި އެކަށީގެންވާ ވަރަށް މަސައްކަތް ކޮށްފައިނުވާ ފަރާތްތަކަށް އެއް އަހަރު ދުވަހުގެ މުހުލަތެއް ކަންކަން ރަނގަޅު ކުރުމަށް ދީފައިވާނެ ކަމަށާއި އެ މުއްދަތުގައި އެކަންކަން ރަނގަޅު ނުކުރާނަމަ ރަށްތައް ހަވާލުކޮށްފައިވާ ފަރާތްތަކުގެ އަތުން ރަށްތައް ނެގޭނެ ކަމަށް މިނިސްޓަރ އޮފް ފިޝްރީޒް، މެރިން ރިސޯސް އެންޑް އެގްރިކަލްޗަރ ޒަހާ ވަހީދު ވިދާޅުވެއްޖެއެވެ.
ދަނޑުވެރިކަމަށް ދޫކޮށްފައިވާ ރަށްތަކުގައި އެކަށީގެންވާ ވަރަށް މަސައްކަތް ކުރަމުން ނުދާއިރު އަދިވެސް އެރަށްތައް ދޫކޮށްފައިހުރީ ކީއްވެތޯ އާއި ދަނޑުވެރިކަމަށް އިތުރު ރަށްތައް ދެމުން ގެންދަނީ ކީއްވެތޯ މެމްބަރުން ވަނީ މިނިސްޓަރަށް ސުވާލު ކުރައްވާފައެވެ. އެ ސުވާލުތަކަށް ޖަވާބު ދެއްވަމުން މިނިސްޓަރ ވިދާޅުވީ ދަނޑުވެރިކަން ކުރުމަށް ދޫކޮށްފައިވާ ފަޅުރަށްތަކުގައި މަސައްކަތް ކުރަމުން އަންނަ ގޮތް މިނިސްޓްރީން ބަލަމުން އަންނަ ކަމަށެވެ. އެގޮތަށް ބެލިއިރު މަސައްކަތް ނުކޮށް ހުރި ރަށްރަށުގައި ވަކި ބާވަތްތަކެއް ހެއްދުމަށް ހަވާލުކޮށްފައިވާ ކަމަށާއި އެބާވަތްތައް އެ ރަށްރަށުގައި ހެއްދުމަށް އަންގާފައިވާނެ ކަމަށް މިނިސްޓަރ ވިދާޅުވިއެވެ.
އަދި މި މުއްދަތުގެ ތެރޭގައި މަސައްކަތް ނުކުރާ ކަމަށްވާނަމަ އެ ރަށްތައް އަތުލާނެ ކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ ދަނޑުވެރިކަން ކުރުމަށް 58 ރަށެއް މިހާރު ދޫކޮށްފައިވާ ކަމަށެވެ. އަދި މިފަހަކުން އިތުރު 6 ރަށެއް ދޫކޮށްފައިވާ ކަަމަށް މިނިސްޓަރ ވިދާޅުވިއެވެ. އެގޮތަށް މަސައްކަތް ކުރަނީ ރާއްޖޭގެ ފުޑް ސެކިޔުރިޓީގެ ނިޒާމު ޚަރުދަނާ ކުރުމަށް ކަމަށް މިނިސްޓަރ ވިދާޅުވިއެވެ.
މިނިސްޓަރގެ މިވާހަކަތަކާއި ގުޅުވައި ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވީ ދަނޑުވެރިކަން ކުރުމަށް ރާއްޖޭގައި ރަށްތައް ދޫކުރަމުން އަންނަތާ ޔަގީނުން ވެސް 32 އަހަރުވެއްޖެ ކަމަށެވެ. ނަމަވެސް ޔަގީންކަމާއެކު ބުނަން އެނގޭ އެއްޗަކީ އެއީ ވިޔަފާރީގައި ދެކޮޅު ޖެހޭ ކަމެއް ނޫން ކަމަށް ނަޝީދު ވިދާޅުވިއެވެ.
ކޮވިޑާއި ގުޅިގެން ސަރުކާރުން އަޅާފައިވާ ފިޔަވަޅުތައް ދިރާސާ ކުރުމަށްފަހު މަޖިލީހުގެ ކޮމިޓީތަކުން ވަނީ ސަރުކާރަށް ލަފާތަކެއް އަރުވާފައެވެ. އޭގައި ދަނޑުވެރިކަމާއި ގުޅޭގޮތުން އަރުވާފައިވާ އެއް ލަފައަކީ ދަނޑުވެރިކަން ކުރުމަށް ބޭނުންވާ ފަރާތްތަކަށް ރަށްރަށުން ބިން ދޫކުރުމުގެ އިންތިޒާމުތައް ކައުންސިލްތައް ހަމަޖެއްސުމެވެ.
ރާއްޖޭގައި ދަނޑުވެރިކަމަށް ދޫކޮށްފައިވާ ރަށްތަކުގައި އެނޫން މަސައްކަތްތައް ކުރާކަމުގެ ޝަކުވާ އަކީ އާންމުން އަބަދުވެސް ކުރަމުން އަންނަ ޝަކުވާއެކެވެ. އަދި އެކަން އެމަގުން ހިނގާތީ އެކަން މޮނިޓަރ ކުރަމުން ގެންދާނެ ކަމަށާއި އަޅަންޖެހޭ ފިޔަވަޅުތައް އަޅުއްވާނެ ކަމަށް މީގެކުރިން ބޭއްވި ޖަލްސާއެއްގައި މިނިސްޓަރ ޒަހާ ވަނީ ވިދާޅުވެފައެވެ.
