ޖެނުއަރީ މަހު ބާސާއަށް ބަދަލުވާން ޑިޕާއި ބޭނުންވޭ

އަންނަ އަހަރުގެ ޖެނުއަރީ ޓްރާންސްފާގައި ބާސެލޯނާއަށް ބަދަލުވާން ލިޔޯނަށް ކުޅެމުން އަންނަ ނެދަލެންޑްސްގެ ފޯވާޑް މެމްފިސް ޑިޕާއި ބޭނުންވާ ކަމަށް ރިޕޯޓުތައް ބުނެފިއެވެ.

އުމުރުން 26 އަހަރުގެ ޑީޕާއި އަކީ ބާސާގެ މިހާރުގެ ކޯޗު ރޮނާލްޑް ކޫމަން، ނެދަލެންޑްސްގެ ގައުމީ ފުޓްބޯޅަ ޓީމުގައި އިރުޝާދު ދީފައިވާ ކުޅުންތެރިއެކެވެ. ކޫމަނުގެ އެދުމުގެ މަތިން ބާސާއިން މި ނިމުނު ޓްރާންސްފާގައި ޑިޕާއި ހޯދުމަށް ވަނީ މަސައްކަތް ކޮށްފައެވެ. ޑިޕާއި އަމިއްލަ ގޮތުން ބާސާއަށް ބަދަލުވުމަށް އެއްބަސްވި ނަމަވެސް، ބާސާ އާއި ލިޔޯނާ ދެމެދު ރަސްމީކޮށް އެއްބަސްވުމަކަށް އައިސްފައެއް ނުވެއެވެ.

ރިޕޯޓުތައް ބުނާ ގޮތުން ޑިޕާއި އަދިވެސް ހުރީ ބާސާއަށް ބަދަލުވުމުގެ އުންމީދުގައެވެ. އެގޮތުން ޖެނުއަރީ ޓްރާންސްފާގައި ބާސާއިން އަނެއްކާވެސް އޭނާ ހޯދުމަށް މަސައްކަތް ކުރާނެ ކަމަށް ޑިޕާއި އުންމީދުކުރާ ކަމަށްވެސް ރިޕޯޓުތައް ބުނެއެވެ.

މީގެ ކުރިން ލިޔޯނުގެ ރައީސް ޖިއަން-މިކޭލް އައުލަސް ވެސް ވަނީ ޑިޕާއި ބާސާއަށް ބަދަލުވާން އަދިވެސް ބޭނުންވާ ކަމަށް ވިދާޅުވެފައެވެ. އޭނާ ވިދާޅުވީ ބާސާއަށް ބަދަލުވާން ޑިޕާއި ކުރެވެންހުރި ހުރިހާ ކަމެއް ކުރާނެ ކަމަށާއި، އެގޮތުން މިހާރު އޭނާ އިންތިޒާރު ކުރަނީ ޖެނުއަރީ ޓްރާންސްފާއަށް ކަމަށެވެ.

މީގެ ކުރިން މެންޗެސްޓާ ޔުނައިޓެޑަށްވެސް ކުޅުނު ޑިޕާއި ލިޔޯނާ ގުޅުނީ 2017 ވަނަ އަހަރު، ހަތަރު އަހަރާ ބައިގެ އެއްބަސްވުމެއްގެ ދަށުންނެވެ. ލިޔޯންގައި ޑިޕާއި މޮޅު ކުޅުމެއް ދައްކަމުން އަންނައިރު، އޭނާ ވަނީ މިހާތަނަށް ލިޔޯނަށް ކުޅެދިން 144 މެޗުގައި 58 ލަނޑު ކާމިޔާބުކޮށްފައެވެ.

ބާސާއިން ޑިޕާއީ ހޯދަން މަސައްކަތް ކުރިއިރު، މި ނިމުނު ޓްރާންސްފާ ބާޒާރުގައި އެ ޓީމުން ވަނީ އުރުގުއޭގެ ފޯވާޑް ލުއިސް ސުއަރޭޒް އެތުލެޓިކޯ މެޑްރިޑަށް ވިއްކާލާފައެވެ.